Friday, April 30, 2010

Secrecy and Sanctity of the Ballot



by Max Bringula (Abante ME Edition, 29 April 2010)

Isa sa napakahalagang bahagi ng nagaganap na overseas absentee voting (OAV) at ng darating na halalan sa atin sa May 10 ay yung tinatawag nating “secrecy and sanctity of the ballot” na ang ibig sabihin sa payak na pananalita ay yung kahalagahan ng isang boto ng bawat botante na ito’y mapag-ingatan, mabilang at di mawalan ng halaga. Kaya’t ganoon na lamang ang pag-iingat at pagbabantay na ginagawa sa oras ng halalan hanggang sa oras ng pagbilang ng mga boto.

Sa ating batas ay nakasaad ang tungkol dito, sa Section 2 ng Article V – Suffrage ng 1987 Philippine Constitution na ganito ang sabi, “The Congress shall provide a system for securing the secrecy and sanctity of the ballot as well as a system for absentee voting by qualified Filipinos abroad.”

Ano ang ibig sabihin ng dalawang term na nabanggit dito – ang secrecy at sanctity of the ballot. Sa secrecy of the ballot, ang ibig sabihin ay di dapat malaman ng ibang botante o maging ng mga election inspectors o kung sino man na nasa loob ng vicinity ng presinto kung sino ang sinulat ng botante sa balota. Kaya nga’t ang balota ay ibibigay sa botante ng SBEI (Special Board of Election Inspector) na nakatiklop at ibabalik din sa kanila ng nakatiklop pagkatapos bumoto. Dagdag pa rito, bawat presinto ay may designated cubicle o kung wala man ay mayroong secret folder na ginagamit upang maging tabing sa isusulat ng botante sa balota.

Dahil dito, ipinagbabawal din ang pagkuha ng larawan sa loob ng presinto. Kung may picture-taking man, ang shot ay dapat ay mula sa malayo.

Ang sanctity of the ballot naman ay ang pagpapahalaga at pag-respeto sa boto. Hindi dapat itong sabotahen, sirain o ano pa mang iba’t ibang pamamaraan na ginagamit upang ma-invalidate ang boto o di siya maisama sa pagbilang. Ito ang dahilan kung bakit may tinatawag na Poll Watcher mula sa iba’t ibang political party at concerned citizen group na nakatalaga sa bawat presinto upang siyang mag-bantay sa boto na ito’y maihuhulog sa ballot box at maisasama sa oras ng bilangan. Ito rin ang dahilan kung bakit may mga accredited poll-watcher body na pinipili ang COMELEC tulad ng NAMFREL o ang PPCRV (Parish Pastoral Council for Responsible Voting), at Ito rin ang dahilan kung bakit may mga programang tulad ng Ako ang Simula at Boto Mo, I-Patrol Mo ng ABS-CBN at Eleksiyon 2010 ng GMA-7.

Bawat isa’y naghahangad ng malinis at maaayos na halalan. “The secrecy and sanctity of the ballot” ay dapat matiyak di lang ng mga botante, kungdi higit sa lahat ng pamahalaan at ahensiya nito. Ang sinumang mahuling lumalabag rito ay may karampatang parusa ayon sa isinasaad ng batas.

Ito rin ang tinalakay ni Labor Attache David Des Dicang ng POLO-Eastern Region Operations nang siya’y magpatawag ng pulong kamakailan ng mga volunteers, marshals at poll watchers sa nagaganap na OAV sa Alkhobar, Saudi Arabia.

Sa nasabing pulong, kanyang ipinaliwanag ang tungkuling ng bawat isa. Ilan sa mga binigyan-diin sa pulong ay ang mga sumusunod:

1) Yun lamang mga opisyales at may mga designated ID’s ang maaaring makapasok sa presinto tulad ng Special Board of Election Inspectors (SBEI), opisyales ng POLO-ERO, Poll Watchers na anim bawat partido (isa sa bawat presinto) at designated media personnel.

2) Ang mga Poll Watchers ay dapat may taglay na Appointment Letter at ID sa partidong kanilang kinabibilangan.

Ipinakilala sa pulong na iyon ang representative ng dalawang partido na may Poll Watchers, sina Mr. Robert Gaffud ng Bangon Pilipinas Party at Mr. Jerry de Guzman ng Gabriella.

3) Hindi dapat nakikipag-usap ang mga Poll Watchers sa mga botante upang hindi maakusahan ng electioneering. Kung may katanungan ang mga botante, sa SBEI’s sila dapat lalapit, o sa Marshals at volunteers. Subalit mainam na sa SBEI idirekta ang tanong pagka’t sila ang itinalaga ng COMELEC na mamahala sa eleksiyon at sila’y binigyan ng awtoridad na sumagot at gumawa ng karampatang aksiyon kung kakailanganin.

4) Maaaring magsuot ng T-shirt ng kanilang partido o kandidatong iboboto ang isang botante. Hindi ito ipinagbabawal. Ito’y personal choice niya as long na walang hayagang makikita na ang nasabing botante ay nangangampanya kungdi siya ay maaakusahan ng electioneering.

*********
TSD Readers’ Corner:
(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Mula sa isang mambabasa at botante sa Saudi Arabia -

Gud PM, Sir Max. Ako po yung nagtanong sa inyo dati kung pwede me bumoto dito sa Alkhobar pero registered me sa Riyadh. Ang reply nyo ay hindi pwede. Kababasa ko lang now sa column nyo about “Tagging System” (published on 26 April 2010) na pwede na akong bumoto dito sa Alkhobar sa IPSA. Thanks for the info. God bless you and your family.

Panawagan sa Nakakakilala kay Bernadette – mula kay Emy ng Bahrain

Kung sino po ang nakakakilala kay Bernadette Montalban Perez, please let her know na hinahanap sya ni Emy. Text nyo na lang po ako dito sa roaming nbr ko (00-639281723142).


(For comments and reactions, please eMail at maxbringula@yahoo.com or send text message only on 00-966-502319535)

Monday, April 26, 2010

"Tagging System", Ini-Adopt ng COMELEC sa OAV


by Max Bringula (Abante ME Edition, 26 April 2010)

Magandang balita ang ating natanggap mula sa Embahada ng Pilipinas sa Riyadh patungkol sa desisyon ng COMELEC na i-adopt ang “Tagging System” sa overseas absentee voting (OAV) na ginaganap sa Riyadh at Alkhobar. Ito’y batay sa sulat ni COMELEC Commissioner Armando C. Velasco, Chairman of the Committee on Overseas Absentee Voting (COAV) kay Nestor N. Padalhin, Vice-Chairman ng DFA-OAVS.

Ang desisyong ito ng COMELEC ay bunga ng sulat, eMail at tawag na natanggap ng ahensiya mula sa mga botante ng Riyadh at Alkhobar na ang kanilang pangalan ay napunta sa ibang lokasyon. Ang mga botante ng Alkhobar na nagparehistro sa Alkhobar ay napunta ang pangalan sa CLOAV (Certified List of Absentee Voters) ng Riyadh, at yung mga nagpa-rehistro sa Riyadh, ay napunta naman ang pangalan sa CLOAV ng Alkhobar.

Dati-rati sa ganitong pangyayari, makakaboto lamang ang isang botante sa presinto kung saan naroon ang kanyang pangalan. Kung kaya’t yung mga nasa Alkhobar ay kailangan pang pumunta sa Riyadh na apat na oras ang biyahe kung sa di inaasahang pangyayari ang pangalan nila ay napunta sa Riyadh, and vice-versa, yung mga nasa Riyadh ay kailangan pang pumunta sa Alkhobar kung ang pangalan naman nila ay napunta sa Alkhobar.

Subalit sa tagging system na ipapairal ng COMELEC, maaari ng bumoto ang mga botante sa Alkhobar na ang pangalan ay napunta sa listahan sa Riyadh, at vice-versa yung mga nasa Riyadh na ang pangalan ay napunta naman sa listahan ng Alkhobar. Isang magandang development ito at pabor sa mga botante.

Sa pamamagitan ng tagging system, maaari na silang bumoto either sa Philippine Embassy sa Riyadh, o sa International Philippine School in Alkhobar (IPSA), o sa International School in Buraydah (PISB). Samantala, magkakaroon naman ng daily reporting at the end of the day ang dalawang lokasyon kung sino ang bumoto sa Riyadh na ang pangalan ay nasa Alkhobar, at kung sino ang bumoto sa Alkhobar na ang pangalan ay nasa Riyadh upang hindi madodoble ang boto ng isang botante kung saka-sakaling ito’y boboto ulit sa ibang lokasyon.

Sa sulat na ipinadala ni Vice-Consul Roussel R. Reyes ng Philippine Embassy, Riyadh, sa mga Accredited Community Partners (ACPs), kanyang hiniling sa mga Filipino community leaders na i-dissiminate ang inpormasyon na ito sa lahat ng kanilang mga miyembro at mga registered voters. Kanya ring idinagdag na ang Committee on Overseas Absentee Voting (COAV) ay maaari nang ma-access on line sa pamamagitan ng YAHOO Messenger at Facebook account. Idagdag lamang ang kanilang account na comelec_oav@yahoo.com.

Samantala, nawa’y masolusyunan din yung mga botante naman na nawala o na-de-list ang kanilang pangalan sa CLOAV kahit na sila’y nakaboto naman sa 2004 at 2007 national election. Sa ngayon kasi, wala pang konkretong sagot na maibigay ang mga nakatalagang Election Inspectors ng mga presinto sa nagaganap na OAV, kungdi ang pagsasabi na sila’y sumulat o mag-inquire sa COMELEC. Nawa’y bago pa dumating ang May 10 na siyang huling araw ng OAV ay may masilayang pag-asa ang mga kababayan natin na sila’y makakaboto sa taong ito.

Pagkat sa sulat na ipinadala ng COMELEC dated 20 April 2010, binabanggit na ang dahilan ng pagkaka-delisted ng pangalan ng ibang mga botante ay sa dahilang sa COAV Records ng 2004 at 2007, walang pirma o thumbmark na makita sila sa records. Kailangan kasing pumirma at mag-thumbmark ang botante sa COAV Record pagkatapos niyang bumoto at ihulog ang balota sa ballot box. Kung papaano na di sila nakapirma o nakapag-thumbmark ay isang malaking katanungan.

*********

TSD Readers’ Corner:(Para sa mga masusugid nating mambabasa ng TSD (Tinig sa Disyerto), tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Mula kay Almira ng Bahrain tungkol sa Voter’s ID

Gud PM, Mang Max. Si Almira po ito from Bahrain. Pwede po mag-ask sa inyo? Kapag nakaboto na ako sa embassy, may makukuha ba ako na voter’s ID katunayan na bumoto ako?

Dear Almira, ang voter’s ID ay ipinadadala ng COMELEC sa iyong address sa Pilipinas na iyong isinulat sa registration from nang ika’y mag-register para sa OAV. I-tsek mo sa inyo sa Pilipinas kung dumating na. Samantala, sa bagong advisory ng COMELEC, itinigil na nila muna ang paggawa ng voter’s ID pagkat may balak na pag-iisahin na lamang ang ID sa Pilipinas, at kasama rito ang voter’s ID.

(For comments and reactions, please eMail at maxbringula@yahoo.com or send text message only on 00-966-502319535)

Friday, April 23, 2010

Mga Iba't Ibang Katanungn sa OAV



by Max Bringula (Abante ME Edition)

Kasabay ng paninimula ng Overseas Absentee Voting (OAV) nitong April 10 na magtatagal hanggang May 10 na siyang araw ng eleksiyon sa Pilipinas ay ang pagsulpot din ng iba’t ibang katanungan hinggil sa isinasagawang OAV sa iba’t ibang bahagi ng mundo kung saan may botanteng Pinoy.

Minabuti ng inyong lingkod na ilathala ang mga katanungang ito para na rin sa kaliwanagan at kaalaman ng nakararami.

1) Names Delisted from the Voters’ List

Isa sa pinakamalimit na tanong na ating natatanggap ay tungkol sa pagkaka-tanggal (o pagkaka-delisted) ng pangalan ng mga botante sa Voter’s List na inilabas ng COMELEC bagamat nakaboto naman sila sa eleksiyon ng 2004 at 2007. Walang maibigay na konkretong kasagutan ang opisyales ng Embahada tungkol dito kungdi ang pagsasabing may mga kadahilanan ang COMELEC kung bakit dine-list nila ang mga ito. Gayunpaman, kanilang nire-recommend na magpadala ng inquiry sa COMELEC ang mga na-delist ang pangalan. Maaaring mag-fax sa numerong 00-632-5212952 o tumawag sa kanilang telepono 00-632-5522251. O kaya naman ay mag-eMail sa coav@comelec.gov.ph o sa comelec_coav@yahoo.com at copy-furnished ang Embahada (para sa Riyadh, filembry@sbm.net.sa at sa Eastern Region, polo_ero2005@yahoo.com).

Maaari ring mag-fax sa Overseas Absentee Voting Secretariat ng DFA sa numerong 00-632-8330914, o tumawag sa kanilang telepono 00-632-8344361, o kaya’y tawagan ang OAV Section ng ng Philippine Embassy sa Riyadh kung kayo’y nasa Saudi Arabia sa kanilang telepono na (01) 4820507 ext. 2127, o mag-fax sa numero (01) 4883945.

Nawa’y may magagawa pang paraan na makaboto ang mga na-delist ang pangalan bago matapos ang May 10, 2010 na siyang huling araw ng botohan para sa OAV.

2) Names Transferred to Other Location

May mga pagkakataon naman na ang pangalan ng botante ay napunta sa ibang lokasyon. Ano ang dapat gawin sa ganito upang makaboto?

Tulad sa itaas, mag-eMail sa COMELEC (coav@comelec.gov.ph or comelec_coav@yahoo.com) at copy-furnished ang Embahada (filembry@sbm.net.sa kung nasa Saudi Arabia at polo_ero2005@yahoo.com kung nasa Eastern Region, Saudi Arabia) upang payagan siyang makaboto kung saan siya naroroon at nag-register at hindi sa lugar kung saan napunta ang kanyang pangalan.

3) Voter is transferred to Other Location

Sa ganitong pagkakataon, kailangang i-request ng botante sa kanilang kumpanya na payagan siyang pumunta muna sa lugar kung saan siya orihinal na nag-register. Halimbawa, kung ang botante ay nag-register sa Alkhobar, subalit nalipat ang work place niya sa Riyadh, kailangang pumunta siya sa Alkhobar at doon bumoto. Hindi na maaaring mailipat pa ang registration niya sa Riyadh sa panahong ito kung saan nakapaglabas na ang COMELEC ng Certified List of Overseas Absentee Voters (CLOAV).

4) Voter Went Home for Vacation

May mga nagtatanong din na kung sakaling sila ay magbabakasyon, maaari ba silang bumoto sa Pilipinas bagamat sila’y naka-rehistro sa ibang bansa bilang overseas absentee voter?

Ang sagot dito ay hindi. Hindi na maililipat pa ang registration pagkat nakapaglabas na ang COMELEC ng CLOAV. Kung magbabakasyon, dapat sikaping makaboto muna bago uuwi ng Pilipinas, o kaya’y sikaping makabalik sa lugar o bansa na pinagtratrabauhan o naninirahan bago matapos ang May 10.

5) Security of Voter’s Vote or Ballot

May mga nag-aalala naman sa seguridad ng kanilang boto na hindi magkakaroon ng dayaan at mababale-wala ang kanilang boto.

May nakatalagang SBEI (Special Board of Election Inspectors) sa oras ng botohan at maging sa oras ng pagbibilang ng boto. Sila’y nai-train na mangalaga sa seguridad ng boto. Bukod pa rito ay may nakatalaga rin na SBRCG (Special Ballot Reception and Custody Group) na siya nag-iingat ng lahat ng mga accountable election forms and paraphernalia na ginagamit sa eleksiyon. Sila ang nagha-handover nito sa SBEI sa simula ng eleksiyon at sila rin ang tatanggap nito pagkatapos, kasama na ang mga ballot boxes. Ang lugar na pinaglalagyan ng mga ito ay naka-double lock kung saan ang susi ay hawak ng magkaibang tao.

Dagdag pa rito, may mga Poll Watchers na mula sa iba’t ibang partido o kandidato na pinapayagang mag-monitor ng kaganapan sa botohan at sa pagbibilang ng boto.

May nakapagsabi sa amin at nagtatanong kung bakit karton lamang ang gamit sa ballot box at di yung nakagawiang yari sa bakal tulad ng nakikita sa Pilipinas. Itinatanong din nila kung bakit ordinaryong ink lamang o stamp pad ang ginagamit sa mga bumuboto na itinatatak sa kanilang daliri at di yung dating indelible ink.

Sa puntong ito ating ipinarating na sa COMELEC ang bagay na ito upang hingin ang kanilang paliwanag o kasagutan sa bagay na ito.

Paalala rin natin sa mga di pa nakakaboto na magtungo na sa malapit na Embahada at Konsulada ng Pilipinas o sa Philippine School na ginagamit para sa OAV upang bumoto. Huwag ng hintayin pa ang huling araw upang di sumabay sa pagdagsa ng mga botante.

(For comments and reactions, please eMail at maxbringula@yahoo.com or send text message only on 00-966-502319535)

Monday, April 19, 2010

Mga Kaganapan sa Overseas Absentee Voting




by Max Bringula (Abante ME Edition, 18 April 2010)

Mag-iisang linggo na mula ng umpisahan ang Overseas Absentee Voting (OAV) noong nakaraang Sabado, 10 April 2010 na magtatagal hanggang 10 May 2010, na siya namang takdang araw ng eleksiyon sa Pilipinas.

Isinasagawa ang OAV tatlumpung araw (30 days) bago ang aktuwal na eleksiyon sa atin para sa mga land-based OFWs, at 60 days naman sa mga seafarers. Ito’y batay sa nakasaad sa Section 29, Article VI, Resolution No. 6466 ng Republic Act No. 9189, o mas kilalang “The Overseas Absentee Voting Act of 2003” upang bigyan ng higit na panahon ang mga OFWs na malayo sa embahada o konsulada na makaboto.

Ang OAV rin ang unang makakasubok sa automated election gamit ang precinct count optical scan (PCOS), na isasagawa sa Pilipinas sa darating na halalan sa May 10. Ito’y sinimulan na sa Hongkong at Singapore, ang dalawang bansang napili na mayroong malaking populasyon ng OFWs. Si Rowena Dela Cruz ang kauna-unahang Pilipino sa Hongkong na bumoto sa kauna-unahang automated election ng Pilipinas, at si Lydia Deligente naman sa Singapore.

Nasa Hongkong si Congressman Teodoro Locsin at ilang mga COMELEC officials upang obserbahan ang botohan roon kung saan mayroong 24,743 certified voters. Sa unang araw ng OAV ay nakapagtala ang Hongkong ng 997 voters.

Samantala, nai-report na may isang precinct count optical scan (PCOS) sa Bayanihan Kennedy Town Center sa Hongkong na di gumana at ayaw tanggapin ang balota kahit na wala namang markings at malinis at maayos namang nai-shade yung bilog sa balota. May ibinigay na replacement pero ganoon din, hindi rin magamit. Ang pahayag ng COMELEC at Smartmatic, ito’y dahilan daw ng lamig at humidity sa lugar ng HongKong.

Nawa’y di mangyari ang ganito sa araw ng halalan sa Pilipinas sa darating na May 10, kungdi malaking dagok ito sa magiging kaayusan ng eleksiyon sa atin. Dapat nakahanda na ang COMELEC at Smartmatic sa ganitong pangyayari na maaaring maganap at mayroon agad silang nakahandang alternatibo. Dapat ay may naka-antabay na pamalit sa depektibong PCOS. Suriing maigi ang mga nasabing makina bago pa man dumating ang araw ng halalan. May tatlong linggo pang natitira bago ang aktuwal na eleksiyon.

Ayon kay Commissioner Gregorio Larrazabal ng COMELEC, walang daily counting na magaganapap sa OAV, kungdi ang mga boto o election returns ay itra-transmit electronically sa Manila sa May 10, at ang canvassing of votes ay gagawin sa Manila.

Ayon naman sa latest report mula kay Commissioner Armando Velasco, mayroon ng 16,879 overseas Filipinos na nakaboto as of 14 April 2010. 7,258 ay mula sa Asia Pacific; 2891 naman sa Europe; 2,902 sa America at 3,828 sa Middle East kung saan kabilang ang Saudi Arabia, UAE, Qatar at Bahrain. (Source: GMA News)

Sa Saudi Arabia at ibang bahagi ng Middle East, normal namang isinasagawa ang OAV, bagama’t maraming mga botante ang di makaboto pagkat wala ang kanilang pangalang sa CLOAV (Certified List of Absentee Voters) na inilabas ng COMELEC bagama’t sila’y nakaboto naman noong 2004 at 2007. Sila’y hinilingang sumulat sa COMELEC upang maiparating ang kanilang kalagayan at maaksiyunan kung makakaboto pa ba sila o hindi sa taong ito.

Maaaring i-verify ang pangalan ninyo kung kasama sa CLOAV. Bumisita sa website ng COMELEC sa www.comelec.gov.ph o sa website ng Philippine Embassy ng Riyadh sa www.philemb-riyadh.org.

Kung may katanungan tungkol sa OAV, maaaring tumawag sa OAV Section ng Embassy sa kanilang telepono na (01) 4820507 ext. 2127, o kaya naman ay sumulat o mag-eMail sa filemb@sbm.net.sa o mag-fax sa numero na (01) 4883945.

Sa Riyadh, buong puwersang nagtungo sa Philippine Embassy ang miyembro ng SBRCG (Special Ballot Reception and Custody Group) at ng SBEI (Special Board of Election Inspectors) maaga pa lang para ihanda ang mga election paraphernalia at matiyak ang kaayusan ng botohan. Ang mga grupong nabanggit ay dumaan sa 3-day extensive training-workshop na isinagawa ng COMELEC sa pangunguna ni Commissioner Elias R. Yusoph.

Batay sa report na natanggap natin mula sa Riyadh, ang unang botante nila ay si Mr. Manuel A. Amora na nagtratrabaho sa King Abdulaziz City for Science and Technology (KACST). Kasama niyang nagtungo sa Embahada upang bumoto ang iba pang miyembro ng OFW Congress. Ang pinakabata namang bumoto ay si Michael San Diego, 19 years old pa lamang at estudyante ng Second Philippine International School in Riyadh. Nagpadala naman ng poll watcher ang grupo ng Gabriela sa katauhan ni Mr. Mario Ben upang mag-observe sa kalakaran ng eleksiyon sa Riyadh.

Samantala, dito sa Eastern Province, Saudi Arabia, kung saan mayroong mahigit na 20,000 ang certified voters, maayos namang naisasagawa ang overseas absentee voting. Isang araw bago mag-simula ang OAV, inasikaso ni Labor Attache David Des T. Dicang, kasama ng iba pang opisyales ng POLO-ERO ang paghahanda ng balota at mga election paraphernalia, at ang pag-finalize ng magiging mga Marshalls sa buong buwan ng OAV mula April 10 hanggang May 10, gayundin ang mga poll watchers mula sa iba’t ibang accredited group at political party. Ang Bangon Pilipinas Party ni Bro. Eddie Villanueva na kumakandidato bilang Pangulo ng Pilipinas ay nagpadala na ng kanilang mga poll watchers di lamang sa mga araw ng botohan, kungdi sa mismong araw ng pagbibilang na gaganapin mula ala-una ng hapon sa May 10, 1010.


For comments and reactions, please eMail at maxbringula@yahoo.com or send text message only on 00-966-502319535)

Sunday, April 18, 2010

Isang Makulay at Matagumpay na PBL Opening









by Max Bringula
Abante ME Edition, 16 April 2010

The images speak for itself. It was colorful and magnificent. Ganito maituturing ang katatapos na opening ceremony ng PBL Season 5 o Pag-asa Basketball League na ginanap noong Biyernes, 09 April 2010, sa sa Multi-Purpose Function Hall ng IPSA (International Philippine School in Alkhobar).

Isang makulay at matagumpay na ceremony ang nasaksihan ng manonood at mga panauhin nang pormal na simulan ang PBL Season 5.

Naging panauhing pandangal sa nasabing okasyon si Labor Attache David Des T. Dicang ng POLO-Eastern Region Operations na siyang naghatid ng Inspirational Remarks. Kasama niyang dumalo ng hapong iyon ang dalawang bagong opisyales na manunungkulan sa POLO-Eastern Region Operations, sina Welfare Officer Ron Lionel M. Bartolome at si Sergio Borgueta bilang Administrative Officer. Kanyang ipinakilala ang dalawa at hinilingang magbigay ng kanilang maikling pananalita. Si WelOff Ron Lionel ay naghandog pa ng awitin na siyang ikinasiya ng mga naroroon.

Dumalo rin sina Mr. Reggie Montana, AFCSCOM (All Filipino Community and Sports Commission) Overall Chairman, Ms. Mary Jane Tupas, President – OFW Congress, at Mr. George Palencia, Chairman – United Bicolanos, at Founder and Chairman ng FAHAP (Filipino Association of HR and Administrative Professionals).

Labing-tatlong koponan ang lumahok sa Season na ito (anim sa Class A at pito sa Class B) na ang pawang hangarin ay makamit ang prestihiyosong PBL Championship Trophy sa Category A at sa Category B. Ang mga koponang ito ay ang mga sumusunod:

Class A – Day by Day, GMC Thunders, JCLORIM Warriors, JIL Theos, JUSL at UR Divine Desert University.

Class B – CCWIM Eagles, CLSF Markers, JCILSA, JCPP Eagles Wings, JTLG, Living Water at Salt & Light.

Ang ceremony ay sinimulan sa pagpapalabas ng footages ng nakaraang apat na seasons, ang Season 1 hanggang Season 4 na nilikha ng Creative Arts Ministry ng JIL, at sinundan ng Parade of Teams kasama ang kanya-kanyang muse at mascots. Ang Pambansang Awit ng Pilipinas ay pinangunahan naman ni Allisa Andrea E. Liangco ng JCCF, Jubail, at ang Sportsmanship Oath ni Jhun De Rama ng UR Divine Desert University.

Sumunod dito ay ang Opening Remarks ng inyong lingkod bilang Chairman ng Pag-asa Community Support Group kung saan aking binigyang-diin sa mga koponan na maglaro na may kahinahunan at hangaring manalo di lamang sa mata ng mga manonood at kapwa manlalaro, kungdi higit sa lahat, ang manalo sa mata ng Diyos.

Samantala, tinanghal na Best Muse sina Cheska Pauline Agas at Samantha Nicole Agas na mula sa JCILSA, at ang Salt and Light bilang Best in Uniform. Napili namang Most Organized Team ang JIL Theos.

Naghandog naman ng special numbers ang grupo ng Day by Day, ang UR Lighthouse, JCLORIM Dancers, Sumphonia, Bangon Kabataan at Triune Movers. Si Mr. Bong Buella ng FILPOP at Mr. Jun Daniel ng UR-Lighthouse ang naging Hosts ng nasabing okasyon.

Sa unang game na ginanap, nanalo ang JCLORIM Warriors against GMC Thunders ang back-to-back Champion ng PBL Season 3 & 4 sa score na 70-68 sa Category A, at ang JTLG Eagles against TJM-4 Markers sa score na 55-49 sa Category B.

Ang PBL ay taunang liga na isinasagawa ng Pag-asa Community Support Group sa Eastern Province, Saudi Arabia para sa kanilang mga miyembro. Ito’y nasa ika-limang Season na mula ng ito’y mag-umpisa noong 2006. Taun-taon din na nagkakaroon ng tema o theme ang liga, at sa taong ito, ang tema ay “Sama-samang Nagkakaisa sa Pagpapalakasan”.

Ang organizing committee ng PBL sa taong ito ay binubuo nina: Tim Mallari (Commissioner), Robert Punzalan (Asst. Commissioner), Ervin Bayona (Head-Technical Committee), Dennis Oliver (Asst. Head – Technical Committee), Arthur Valeros (Head-Table Committee), Alex Ventura (Asst. Head-Table Committee), Junald Pellazar (Asst. Head-Table Committee), Tony Gloria (Marketing & Promotion), Robert Punzalan (Finance), George Conejos (Secretary) Mike Abrera (Logistic) at Luis Macaraeg at Lito Migabon sa Support.

(For comments and reactions, please eMail at maxbringula@yahoo.com or send text message only on 00-966-502319535)

Saturday, April 10, 2010

Overseas Absentee Voting, Magsisimula Ngayon


by Max Bringula (Abante ME Edition, 10 April 2010)

Magsisimula ngayon, diyes ng Abril, ang Overseas Absentee Voting (OAV) sa iba’t ibang bahagi ng mundo kung saan may mga Pilipinong botante, o yung mga overseas absentee voters. Ito’y isang buwang isasagawa mula April 10 hanggang 10 May 2010, na siyang takdang petsa naman ng Halalan sa Pilipinas. (Yung mga seafarers o mga nagtratrabaho sa barko ay may 60 days naman para bumoto.)

Ang OAV o ang pagboto in absentia ay naisa-batas noong 2003 sa ilalim ng Republic Act No. 9189, o mas kilalang “The Overseas Absentee Voting Act of 2003”. Ito’y naglalayon na mabigyan ng pagkakataong makaboto ang mga Pilipinong nasa labas ng bansa.

Unang nagkaroon ng OAV noong National Election ng 2004 at nasundan ito noong 2007. Ang taong 2010 bale ang pangatlong overseas absentee voting na gaganapin.

Ang pagboto ay isinasagawa sa bawat Embahada at Konsulada ng Pilipinas sa ibang bansa kung saan mayroong botanteng Pinoy, o kaya’y sa Philippine schools na accredited ng Department of Education o DepEd.

Samantala, ang Automated Voting gamit ang precinct count optical scan (PCOS) machines na sisimulan sa Pilipinas sa halalang ito ay isasagawa rin sa overseas absentee voting. Subalit sa Hongkong at Singapore lamang. Ito’y sa dahilang ang dalawang bansang nabanggit ay siyang may pinakamaraming registered Filipino voters. May 95,355 voters sa Hongkong at sa Singapore ay may 31,853 voters. Mahigit na kalahating milyon ang certified absentee voters sa buong mundo. Ito ang inilahad ng COMELEC (Commission on Elections).

Ang mga overseas absentee voters sa ibang bahagi ng mundo, kasama na ang Middle East, ay manual voting pa rin ang gagawin, either by personal voting o by postal voting.

Dito sa Middle East, handing-handa na ang Embahada at Konsulada sa Saudi Arabia, UAE, Qatar, Kuwait, Oman at Bahrain para isagawa ang OAV sa kani-kanilang lugar.

Sa Saudi Arabia ang voting period ay magsisimula ng 9:00 AM hanggang 5:00 PM during weekdays sa Riyadh, at 11:00 AM to 7:00 PM naman sa Alkhobar. Tuwing Huwebes at Biyernes naman, 10:00 AM to 6:00 PM sa Riyadh, gayundin sa Alkhobar. Ang OAV sa Alkhobar ay gagawin sa IPSA (International Philippine School in Saudi Arabia), at sa Riyadh naman ay sa Embassy grounds mismo.


Mga Dapat Tandaan Kapag Boboto

UNA – dalhin ang Voter’s ID o kung wala man ay yung registration slip na ibinigay sa inyo noong kayo’y nagpa-rehistro. Kung wala pa rin ito at nawaglit, pumunta pa rin sa poll precinct at sabihin ang pangalan taglay ang inyong ID o pasaporte na mapagkikilanlan na kayo iyon upang kanilang i-verify sa listahan ng Certified List of Overseas Absentee Voters (CLOAV) kung ang pangalan ninyo ay naroon.

Samantala, maaari ninyong i-verify rin kung ang pangalan ba ninyo ay kasama sa CLOAV bago tumungo sa precinct. Bumisita sa website ng COMELEC sa www.comelec.gov.ph o sa website ng Philippine Embassy ng Riyadh sa www.philemb-riyadh.org.

Kung may katanungan tungkol sa OAV o kung wala ang inyong pangalan sa CLOAV, maaari kayong tumawag sa OAV Section ng Embassy sa kanilang telepono na (01) 4820507 ext. 2127, o kaya naman ay sumulat o mag-eMail sa filemb@sbm.net.sa o mag-fax sa numero na (01) 4883945.

Puwede ring kayong tumawag mismo sa COMELEC sa Pilipinas sa telepono na 00-632-5522251 o mag-fax sa 00-632-5212952, o sa DFA Overseas Absentee Voting Secretariat sa telepono na 00-632-8344361 o 00-6332-8329725, o mag-fax sa 00-632-8330914.

IKALAWA – ang mga iboboto ninyo lamang ay ang mga sumusunod: Presidente (isa), Bise-Presidente (isa), Senators (labindalawa), at isang Party-List. Maaaring kayong magdala ng sample ballot o listahan ng inyonng iboboto.

IKATLO – habang bumoboto, huwag makikipag-usap kaninuman (o sa ibang mga botante) na nasa loob ng precinct maliban sa mga nakatalagang personnel doon.

IKA-APAT – pagkatapos bumoto, tiklupin ang inyong balota tulad kung papaano ito ibinigay sa inyo ng mga SBEI (Special Board of Election Inspectors) o yung mga itinalaga para isagawa ang botohan. Ibigay ang balota sa SBEI at mag-thumb mark sa ilalim na bahagi ng balota at sa listahan ng OAV List na ituturo sa inyo. Pagkatapos nito, ide-detach ng SBEI ang bahagi ng balota o yung coupon at ibabalik sa inyo ang Balota na siya ninyong ihuhulog sa Ballot Box.

Dapat ding tandaan na huwag ninyong pupunitin ang balota o susulatan ng kung ano o lalagyan ng kahit anong marka, maliban sa isusulat ninyong pangalan na iboboto upang di ma-invalidate ang inyong boto.

Tayo ng bumoto. Gamitin ang inyong karapatang maghalal ng karapat-dapat na manungkulan sa ating bansa.