Amnestiya Para Sa Mga Overstayers, Hanggang 23 March 2011 Na Lang

Makikita ang mga overstayers na nagkukumpol sa may Khandara Bridge sa Jeddah at naghihintay na sila ay ma-deport.

by Max Bringula (published in Abante ME Edition on 18 January 2011)

Alinsunod sa Royal Decree ng Saudi Arabia noong 23 September 2010 na nagbibigay amnestiya (o kapatawaran) sa mga overstayers o mga pilgrims na ang Umrah/Haj visa ay expired o palso na at maging ang mga visit visa holders na ang visa ay expired na rin, inihayag ng Philippine Consulate sa Jeddah ang mga alintuntunin na galing sa Saudi Ministry of Foreign Affairs para sa mga nagnanais na i-avail ang Royal Amnesty na malapit ng magtapos sa 23 March 2011.

Sa Circular Note No. 91/74/27523/31 na may petsang 24 November 2010, nakasaad ang ganito:

A. Para sa mga na-apprehend (o nahuli ng police authorities) na Overstayer o ang Umrah, Haj o Visit Visa ay expired na -

1) Sila’y dadalhin sa immigration authorities para imbistigahan at kunan ng biometric documentation (o fingerprinting).

2) Ipapatawag ng Jawazat ang kanilang visit visa sponsor o ang agent o kumpanya na nag-arrange ng kanilang umrah o haj para dalhin ang passports ng mga nahuling overstayer, pati na ang kanilang airline tickets pauwi sa Pilipinas.

3) Tapos nito, i-issuance na sila ng Jawazat ng deportation visas at palalayain taglay ang garantiya na pauuwiin ng kanilang sponsors sa loob ng dalawang linggo.

4) Kapag di tinupad ng sponsor o agent ang pagpapa-uwi, tatanggalan sila ng lisensiya at di na makakapag-transact pa.


B. Para naman sa mga Overstayer na nag-surrender voluntarily (o kusang-loob) at may hawak na valid passport at airline ticket -

Sila’y iimbistigahan din na isasagawa ng Director for Expatriates (Wafeeden) of the General Directorate for Jawazat bago sila bigyan ng exit visa at payagang makauwi.

Itinatagubilin din ng Philippine Consulate sa Jeddah sa mga pilgrims at visit visa holders na nais mag-avail ng amnestiya na ihanda ang mga sumusunod na dokumento:

1) Orihinal o kopya ng Pasaporte na ginamit nang pumasok sa bansang Saudi Arabia kung saan naroon ang tatak ng kanilang entry number and date.

2) Airline Ticket at SR 120 kung walang passport o kung ang passport ay expired na.

Kapag handa na ang mga ito, makipag-ugnayan sa Philippine Consulate General – Assistance to Nationals Section para sa kakailanganing travel documents at mga dapat pang gawin tulad ng finger-printing at iba pang biometric documentation.

Samantala, ating ipinapaalala sa mga kababayan natin at muling uulitin na ang Amnestiya na in-issue ng Saudi government ay para lamang sa mga overstayer o pilgrims na ang Umrah/Haj visa ay palso na o sa mga visit visa holders na ang visa ay expired na rin, at hindi ito para roon sa mga takas o tumakas sa kani-kanilang employer, o maging yaong mga nahuli sa iba’t ibang kaso at na-detained.

Kung kaya’t huwag maniniwala sa mga taong mangangako na kayo ay pauuwiin sa pamamagitan ng Amnestiya at hihingan kayo ng pera pang-ticket, o kaya’y magpapayo sa inyo na pumunta sa Jeddah at doon ay i-avail ang nasabing Amnestiya dahil ito’y para sa mga overstayers lamang sa mga kadahilanang nabanggit na sa itaas.

Bagama’t wala pa man ang Amnestiya ay ginagawa na noon ang modus-operandi na ito na kung tawagin ay “backdoor”. Subalit di lahat ng mga sumusubok at kumakapit sa ganitong sistema ay nagtatagumpay. Kadalasan mas higit pang hirap at panganib ang kanilang nasusuungan kumpara kung boluntaryong lalapit sa Embahada at POLO officials at hihingi ng tulong at suporta para sila maka-uwi ng maayos sa pamamagitan ng exit visa at di sa pamamagitan ng deportation na siyang kinasasadlakan ng mga nagba-backdoor at ng mga takas na nahuhuli ng mga authorities.

Dapat ding tandaan na kapag ang isang expatriate worker ay pinauwi sa pamamagitan ng deportation, sila’y di na makababalik pang muli para makapag-trabaho sa Saudi Arabia.

Sa mga iba pang katanungan at paglilinaw, kayo’y maaaring makipag-ugnayan sa Philippine Consulate sa Jeddah sa pamamagitan ng:

a) Pagtawag sa sa numerong 050-5691801 at hanapin si Vice Consul Lorenzo Rhys G. Jungco

b) Sumulat sa P.O. Box 4794, Jeddah 21412, Saudi Arabia o kaya sa address na Uum Al Qurah St., Rehab District, Jeddah KSA

c) Mag-fax sa 00-966-02-66967697

d) Mag-eMail sa pc.jeddah@gmail.com

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Di Pagtupad sa Kontrata

Sir Max, ako po si Jhoel na nagtratrabaho dito sa Dammam. Nabasa ko po yung column nyo dated 12 January 2011 sa Abante tungkol sa sitwasyon ng kababayan natin na si Alan. Sir pareho po kami ng sitwasyon. Yung pinirmahan po naming contract sa Pinas eh malinaw na nakalagay dun na ang basic namin ay SR 1000 plus SR 200 for food allowance, at 8 hours lamang, pero nung dumating kami rito ginawang SR 700 basic, SR 300 food allowance, at fix overtime. Tapos, 11 hours ang duty namin everyday. Pag Friday, pinapapasok pa kami ng umaga. May OT yun pero maliit lamang. Minsan na kaming nagtanong sa manager namin pero ganun daw talaga ang patakaran dito sa Saudi. Sa halip na kami’y maintindihan, napag-initan pa kami. Ano po ba ang magandang gawin dito? Sana po matulungan ninyo kami at mga kababayan natin dito, at para rin hindi na sila makapanloko pa ng ibang mga kababayan natin. – Jhoel of Dammam

Dear Jhoel, ang kaso mo ay isang uri rin ng paglabag sa batas ng Saudi Labor na tinatawag natin na pagpapalit ng kontrata (change of contract). Kung kayo’y walang ibang pinirmahan na kontrata nang dumating kayo rito na nagsasaad na kayo’y pumapayag sa pagbabago ng inyong kontrata, maaari ninyong ilapit sa Saudi Labor Office ang ginawa sa inyo pati na ang mahabang oras ng pagtratrabaho kung saan ay walong oras lamang dapat. Mas mainam na makipag-ugnayan kayo sa Embassy representatives natin sa Eastern Province upang kayo’y matulungan sa dapat ninyong gawin. Maaaring makipag-ugnayan muna sila sa inyong employer at kausapin upang maisaayos pa ang inyong kalagayan bago tuluyang mag-sampa ng kaso laban sa inyong employer at yan ay kung siya ninyong nais. Maaari silang tawagan sa mga sumusunod na numero – 8941846 / 8651951 / 8942890, o kaya sa kanilang Hotline na 050-1269742. -Max

Hanggang Kailan, Hanggang Saan

Ang mahabang linya ng mga Pilipino sa OFW Lane sa Ninoy Aquino International Airport (NAIA) na pabalik-balik na lamang sa abroad.

Max Bringula (pubished in Abante ME Edition on 12 January 2011)

Ito marahil ang katanungang nararapat lamang na bigyan ng higit na pansin. Pagkat kadalasan marami sa atin ang lumalabis at lumalagpas sa hangganan.

At ito’y kitang-kita sa mga kaganapang nararanasan natin at nagaganap sa ating kapaligiran. Hindi na tayo kailangang lumayo pa para matunton ang nais ipakahulugan ng katagang “hanggang kailan, hanggang saan?”

Tingnan na lamang natin ang ating sarili at pakasuriin. Dito’y maaapuhap agad ang kasagutan sa tanong na nabanggit.

Bilang mga OFW na ang tanging nais ay mabigyan ng kaginhawaan at magandang kinabukasan ang mahal sa buhay, dumarating din kung minsan ang katanungang hanggan kailan nga ba na tayo ay mangingibang-bayan?

Bumibilang na ng isa at dalawang dekada ang karamihan sa atin, at ang iba’y tatlong dekada pa nga, subalit narito pa rin nakikipagsapalaran sa malayong lupain. Pumuti na ang buhok at ang iba’y numipis na at naubos pa, subalit nakikipagsabayan pa rin sa mga bagong henerasyon ng tinaguriang mga Bagong Bayani.

Hanggang kailan nga ba, tatang, hanggang saan nga ba, kuya, na ika’y makikipagbuno sa ilalim ng init ng araw, na titiisin ang tinding lamig ng panahon, ang pag-iisa sa halos maraming taon na di kapiling ang mahal sa buhay?

Wala naman marahil ang magnanais na manatili sa ibang bayan habang panahon, ang di masilayan ang Lupang Sinilangan. Sabi nga ng awitin ni Gary V., “Babalik Ka Rin”. For there is no better place like home.

Ang tanong nga lamang, “hanggang kailan, hanggang saan?” Kailan darating ang panahong iyon? Hanggang saan aabutin ang hiningang taglay?

Hawak natin ang kasagutan. Nasa ating mga kamay ang ikatatagal o ikadadali ng panahon. Sa puntong ito, ang nais iparating ng inyong lingkod sa bawat kapwa natin OFW at sa mga masugid na tagasubaybay ng ating panulat ay ang matutunan nating maging masinop at ang pagkakaroon ng konkretong balakin sa buhay.

Iwasan na ang pamumuhay na bara-bara. Yung ugaling “bahala na”. Hindi iniisip ang darating na bukas. Kung gumastos parang laging galit sa pera. Ubos-ubos biyaya, kinabukasan ay nakatunganga. Gastos dito, gastos doon.

Kaya’t sa halip na makapag-ipon, ang makapag-pundar, karamihan ay umuuwi ng wala pa rin. Kung kaya’t babalik na naman sa pag-a-abroad dahil naubos na ang dalang kinita sa mahabang panahon.

Ang bagay na ito’y di dapat sisihin sa OFW lamang, kungdi maging sa pamilya ng bawat OFW sa Pilipinas. Ang akala kasi ng karamihan, pinupulot lamang ang dolyar sa disyerto, o sinusungkit lamang na parang bituin ang dinar o riyals sa sampayan. Kung kaya’t kung gumastos ay para bagang iyon na ang huling araw at wala ng darating na bukas, samantalang ang pobreng OFW ay nagdidildil lamang sa corned beef at pritong itlog araw-araw.

Ang iba naman kung manghingi sa ama o ina na nasa abroad, o kay kuya o ate na nasa ibang bansa ay ganun-ganun na lamang. Urgent pa kung minsan at kapag di mo napagbigyan, ikaw pa ang lumalabas na masama.

Hanggang kailan nga ba mangingibang-bayan si Inang o si Tatang? Hanggang saang lupain makararating si Kuya o si Ate?

2011 na. Simula na naman ng isang bagong dekada. Ilang dekada pa kaya ang dapat nating abutin bago tuluyang makapag-pundar, makapag-impok at magkaroon ng direksiyon ang ating buhay? Hindi pa huli ang lahat, kabayan.

Simulan natin. Hindi bukas, hindi sa makalawa, kungdi ngayon na. Now na.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Malaking Tulong Para sa mga OFW

Hi kuya Max, salamat sa walang-sawa mong pagbibigay ng tamang paalala sa tulad naming malalayo sa mga mahal sa buhay. Lalo kaming lumalakas sa bawat paalala sa iyong mga mensahe. – from Leonora Saricon, a widow from Doha, Qatar

Di Pagtupad sa Kontrata

Good PM po, Sir Max. Ako po si Alan Lascuna, isang OFW dito sa Abha, Saudi Arabia. May itatanong lang ako tungkol sa aking trabaho at sa aking employer. Ang problema kasi ay may pinirmahan ako na contract na galing sa Agency ko sa Pilipinas na 8 hours lang po ang magiging trabaho. Pag lumagpas na sa 8 hours, may bayad na. Ngayon, sobra sa 8 hours ang trabaho ko at wala pang rest day sa loob ng isang lingo. Ano po ba ang dapat kong gagawin? – from Alan of KSA

Dear Alan, salamat sa iyong pagsulat. Tungkol dito sa iyong tanong, dapat lamang na sundin kung ano ang nakasaad sa pinirmahan mong kontrata. Ang paglabag ng iyong amo sa tamang bilang ng oras ng pagtratrabaho at di pagbibigay ng rest day o day-off ay paglabag din sa isinasaad ng Saudi Labor Law. Mainam na sumangguni ka sa mga kinatawan ng ating Konsulada sa Jeddah kung saan sila ang nakakasakop sa Abha, at hingin ang kanilang tulong na kausapin ang iyong amo na tuparin ang kontrata, pati na ang pagbibigay ng day-off. Ito ang kanilang numero – 0515124797 o 02-6658462 ext. 101. - Max

EOW Schedules Sa Taong 2011, Mayroon Na / Passport Renewal by Appointment Na Rin

Makikita ang maayos na pagsasagawa ng nakaraang Embassy On-Wheels sa Alkhobar, Saudi Arabia noong 16-17 December 2010.

Max Bringula (published in Abante ME Edition on 10 January 2011)

Inihayag kamakailan lang ng Embahada ng Pilipinas sa Riyadh, Saudi Arabia ang buong schedule ng Embassy On-Wheels (EOW) o ang regular na consular services na kanilang isinasagawa sa lugar na malayo sa Embahada at Konsulada ng Pilipinas tulad ng Alkhobar, Al Jouf, Hail, Buraydah at Jubail sa Saudi Arabia, at ng Sana’a sa Yemen.

Narito ang buong schedules ng EOW sa taong 2011:

27-28 Jan - Alkhobar / 10-11 Feb - Al Jouf / 24-25 Feb – Alkhobar / 24-25 Mar – Alkhobar / 14-15 Apr – Hail / 28-29 Apr – Alkhobar / 19-20 May – Alkhobar / 09-10 Jun – Sana’a, Yemen / 23-24 Jun – Alkhobar / 07-08 Jul – Buraydah / 21-22 Jul – Alkhobar / 11-12 Aug – Alkhobar / 15-16 Sep – Jubail / 29-30 Sep – Alkhobar / 20-21 Oct – Alkhobar / 03-04 Nov – Sana’a, Yemen / 17-18 Nov – Alkhobar / 08-09 Dec – Alkhobar.

Ang layunin ng maagang pagkakaroon ng EOW Schedules ay para maiwasan ang pagdagsa ng maraming aplikante na nagre-renew ng passport o nagpapa-notarize ng mga mahahalagang dokumento.

Bagamat tentative ang nasabing schedules, malaking tulong pa rin ito pagkat maisasaayos ng maigi ng sinumang OFWs ang kanilang pagpunta nang di maaapektuhan ang kani-kanilang trabaho o kaya’y di mabibitin ang iskedyul ng kanilang pagbabakasyon. Di tulad ng dati na parang nangangapa sa dilim ang aplikante dahil di tiyak kung magkakaroon ba ng Embassy On-Wheels o ito’y mapo-postpone na siyang naging kalakaran noong nakaraang taon.

Kahanga-hanga ang hakbanging ito na nais ipatupad ni Charge d’ Affaires, Hon. Ezzedin H. Tago na siyang humalili kay Ambassador Antonio P. Villamor. Tulad ng kanyang ipinangako nang bumisita ito sa Eastern Province, Saudi Arabia, sisikapin ng Embahada na maihatid ang kanilang serbisyo sa mga lugar na kung saan naroroon ang mga Pilipino.

Hindi lamang ang EOW Schedules ang isinaayos ni Hon. Tago, kungdi ang pagsasagawa ng Appointment System sa passport services. Ito’y makapagbibigay ng malaking kabawasan sa bilang ng daragsang aplikante dahil yun lamang nasa listahan ang hahayaang makapag-renew o makapag-apply ng passport, at yung hindi maisasama sa listahan ay siya naming uunahin sa susunod na EOW schedule.

Ang Appointment System ay sisimulan sa buwang ito ng Enero 2011.

Papaano makapagpapalista?

May dalawang paraan. Una ay sa pamamagitan ng eMail. Walang dapat gawin kungdi mag-eMail sa eowappointment@philembassy-riyadh.org. Ilagay ang inyong buong pangalan, contact number at ang lugar o siyudad sa Saudi Arabia kung saan kayo naroroon.

O kaya naman ay mag-send ng SMS (text message) sa 054-0269731 at ilagay ang sumusunod:

EOW(space)Full Name(space)City in KSA

Halimbawa: EOW Juan Dela Cruz Dammam

Para sa mga family applicants, ipinapaalala na ilagay ang pangalan ng bawat miyembro ng pamilya na magpapa-renew o mag-aaplay ng pasaporte. Kungdi, isa lamang ang maililista, yun lamang nagpadala ng eMail o SMS.

Isang linggo bago ang EOW Schedule, ilalagay ng Embahada sa kanilang website (www.philembassy-riyadh.org) ang mga pangalan ng makapag-a-avail ng passport services. Yung mga hindi mapapasama ay siya namang uunahin sa listahan sa susunod na EOW schedule.

Samantala, ang Embassy On-Wheels sa buwang ito ay gaganapin sa 27 & 28 January sa International Philippine School in Alkhobar (IPSA), Eastern Region, Saudi Arabia.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Nagtratrabaho ng Walang Working Visa

Ako po si Nor na nagtratrabaho bilang housemaid dito sa Bahrain. Pumunta po ako rito na tourist visa at nakapasok sa amo ka sa pamamagitan ng agency. Ngayon ay 14 months na ako. Nung isang araw ay aksidenteng nakita ko ang aking passport at doon ay nakita kong business visa pala ang itinatak nila sa passport ko na valid for 4 weeks. Posible po kaya na di nila ako ginawan ng visa for two years? Wala rin akong kontrata na pinirmahan. Wala rin po akong hawak na Iqama (residence permit) at hindi nila ako pinapasama sa mga lakad nila. Sa bahay lang ako. – Nor from Bahrain

Dear Nor, tama ang iyong iniisip. Di ka kinuhanan ng working visa ng amo mo kungdi business visa lamang na maaaring nire-renew niya lamang tuwing mag-e-expire na ito. O kaya naman ay ini-extend nya lamang ang tourist visa mula nang ika’y magtrabaho na sa kanya. Ito ang dahilan ng di mo pagkakaroon ng residence permit pagkat di maaaring bigyan nito ang tourist o business visa holder. Ito rin ang dahilan kung bakit di ka isinasama sa lakad nila sa labas dahil baka ikaw ay masita na walang valid working visa. Kung gayon, illegal na maituturing ang pagtratrabaho mo sa iyong amo, at maaari kang mahuli. Mainam na ipagbigay-alam mo ito sa Embahada natin diyan sa Bahrain upang matulungan ka nila ng nararapat mong gawin. - Max

Ahmad N. Albinali and Sons Co. Held First Inter-Color Basketball Tournament

Before the First Game starts, the ceremonial toss of ball was performed Mr. Farid M. Salem, Executive Vice-President for the teams, IT-COM and JUBAIL Team. The IT-COM Taem who bagged the Best in Uniform award. The Technical Committee of the tournament led by its Tournament Director, Mr. Lons Concepcion.

Max Bringula (published in Abante ME Edition on 08 January 2011)

Tagged as 1st ANASCO (Ahmed N. Albinali and Sons Co.) Inter-Color Basketball Tournament, Ahmed N. Albinali Holding Company held their first ever basketball tournament among its Filipino employees with no other than the company’s Executive Vice-President, Mr. Farid M. Salem as its Guest Speaker who delivered the Inspirational Message to the participating teams and pointed out that the tournament is ably supported in behalf of Ahmad N. Albinali Holding Company.

The event commenced last 16 December 2010 at AB New Camp Basketball Court located at 2nd Industrial, Dammam, Saudi Arabia with eight (8) teams vying for the prestigious championship title, namely:

IT-COM – Alfie Vinculado, Joshua Salva, Benjie Huit, Archie Vinculado, Bobby Relarcosa, Sarlani Baguisi, Edmund Samia, Angelo Briones, Joel dela Cruz, Wilbert Bartilit, Ariben Santiago, Allan Rubio, Carmelo Wengco and Reynard Malicad

NEW WORKSHOP – Fidel Dasigao, Bryan Fernandez, Ryan Baje, Russel Estrada, Joseph Matandac, Rod Tatulo, Leopoldo Panaligan, Max Opingo, Amante Pablo, Edwardo Castillo, Noel Pialago, Larry Lou, Domingo Alcantara, Niceforo Violeta, Allan Reyes, Ashok Bogati and Aurelio Canillo

JUBAIL – Edilberto Diola, Daryl Roquez, Benjamin Implica, Rolando Rojas, Rodel Jimenez, Boyet Mausisa, Dennis Concepcion, Rafael Urbano, Joel Gueta, Dante Nasal, Roy Coladila, Gary Sumalag, Patrick Luage, Nenors Funa, Joegenes Malibnunas and Julio Cardona

NEW CAMP – Fernan Esguerra, Ronalito Giron, Ferdinand Celedonio, Sonny Victorino, Jun Baltazar, Ronald Laron, Francisco Tobias, Joseph Francisco, Roy Rabago, Elmer Castro, Floro Bisnar, Rod Simeon, Felix Tolentino, Nino Bautista and Edgar Caluza

MA’ADEN – Christopher Ebron, Bilal Ahmad, Deney Matthew Oirme, Clark Salvador, Allan Secoya, Rowell Antonio, Jojo Balila, Alvin Serapion, Noel Tubice, Artemio Gascon, Roberto De Guzman, Randy Ruiz, Reymar Celorico, Conrado Rabe Jr., Edwin Malibunas, Jamlech Sebigan and Raffy Raneses

HEAD OFFICE – Leni Quinto, Roberto Sta. Ana, Rodel Wong, Melvin Cruz, Roman Dizon, Joel Baje, Ericson Tangonan, Mohhamad Dabbas, Issa Sweiden, Ronald Bernat, Nilo Bardaje, Lowell Morante and Brian Pilapil

ROAD DIVISION – Ronald Alvear, Kelly Sarabia, Sherwin Gajo, Albert Sarondo, Joey Casabaet, Angelo Donato, Herbert Bautista, Arnel Mateo, Arnel Rodriguez, Richard Garcia and Allan Chun

PATISSERIE SUISSE – Quinegem Balangigi, Dennis Flores, Felix Posadas, Jayson Corpuz, Albert Villarino, Glenn Natal, Orly Canumay, Joaldrin Isla, Joseph Rabara, Chris Mark Ramos, Arhmer Mallari, Mohd Bangcalingan, Michael Doctor, August Arcao and Roldan Ariagame

After the usual Parade of Teams, Mr. Lons Concepcion, the AB Tournament Director, gave the Welcome Remarks who proudly announced that all teams are bona fide employees of Ahmad N. Albinali Holding Company. He also emphasized to the players that the tournament is exclusively for ANASCO, and therefore every one of them must give their support to ensure its success.

This was followed by Awarding of Certificates of Participation to all players individually, and the Certificate of Appreciation to BRAD (Basketball Referee Association in Dammam) headed by their Commissioner, Mr. Ely Panahon, and their Secretary General, Mr. Choy Tubaying.

Special Award was also given for Best in Uniform which was conferred to IT-COM Team.

There were two games that were held during the opening which is between the IT-COM versus JUBAIL Team in the First Game, which the latter won by 67-29, followed by the NEW CAMP versus NEW WORKSHOP in the Second Game which is a tight fight with only 9 points lead by New Workshop over its opponent New Camp in 61-59 result of the game to cap their first win in the tournament.

The games are scheduled every Thursday that will start at 6:30 PM for the first game and 8:00 PM for the second game.

In behalf of Filipino employees of Ahmad N. Albinali Holding Company, Mr. Lons Concepcion expressed their heartfelt thanks to the owner of the company, Sheikh Samir A. Albinali and Sheikh Bassam A. Albinali, for making the tournament possible.

Likewise, to the unwavering support of the committees, to Mr. Farid Salem, Executive Vice-President, to Mr. Mahmoud Aziz, who served as the Tournament Adviser, and to Mr. Tyrone Valangenberg of company’s Catering Division for accommodating Ma’aden and Jubail Team to participate in the event.

Ahmad N. Albinali and Sons Company (ANASCO) prides itself as one of the first four civil contractors of ARAMCO (Arabian American Oil Company) since oil exploration in 1937. Now the company specializes in providing contracting services to petroleum, petrochemical and civil construction sectors. Ahmad N. Albinali and Sons is also the first Saudi company to undertake specialist telecommunications contracting work in the Kingdom of Saudi Arabia in the early 90’s. Right now, the company continues to broaden its expertise and build on its recognized strengths through strategic joint venture partnerships. (Source: http://albinali.com/aboutus.aspx).

2011, Simula ng Bagong Dekada

Max Bringula (Abante ME Edition, 07 January 2011)

Ilang araw ng nakalalayag ang 2011 mula ng ito’y ating salubungin. Isa’t isa na ring napipigtas ang araw nito hanggang sa maubos ulit nang di natin namamalayan. Kamukat-mukat mo, malapit na naman ang Pasko.

Paulit-ulit lang, paikot-ikot lamang. Ang naganap na’y mangyayaring muli at ang natapos na’y muling sisimulan.

It is a never-ending cycle. May umaalis, may dumarating. At ang dumarating ay muling aalis. At sa bawat paglisan, may bakas na naiiwan na maaaring nagdulot ng kagalakan o kaya’y ng kalungkutan.

Sa paglisan ng taong 2010, ano kaya ang alaala nito na lilingunin natin? Mga alaala ng tagumpay, ng pagkaka-ahon sa kahirapan, at pagkakaroon ng pag-asa sa abang kalagayan. At ano naman ang mga alaala na di na nais pang muling balikan?

Kung tutuusin, ang 2010 ay pagtatapos ng isang dekada (mula 2000 hanggang 2010), at ang 2011 ay simula naman ng panibagong dekada na ating haharapin.

Sa pagpasok ng taong 2011, marami ang umaasa na hihigitan nito ang tagumpay na nakamit sa mga nakalipas na taon. Na higit na makikilala ang Pilipinas sa iba’t ibang larangan, di lamang sa palakasan tulad ng boxing kung saan iniluklok ni Manny Pacquiao ang Pilipinas sa rurok ng tagumpay. Hinangaan di lamang ang galing ni Pacman, kungdi maging ang bansang Pilipinas.

Gayundin ang nagawa ni Charice Pempengco sa larangan ng pag-awit nang ito’y kilalanin na pinakamagaling sa bagong henerasyon at higit pa marahil sa popularidad at galing nina Beyonce, Mariah Carey, Celine Dion, atbp. Dahil dito’y buong pagmamalaking itinanyag ni Charice ang Pilipinas sa mata at pandinig ng mundo.

Ang husay, abilidad at hospitality ng milyun-milyong overseas Filipino workers (OFW) sa iba’t ibang bahagi ng mundo ay nakapagbigay naman ng pagkilala sa Pilipinas sa kakayahan at galing ng mamamayan nito. Katunayan, marami sa mga ibang lahi ang nagsasabing mas higit nilang gusto ang mga Pilipino kumpara sa iba.

Kung kaya’t nararapat lamang na ating mapanatili ang tagumpay na nakamit. Hindi maging ningas-kugon kungdi ipagpatuloy ang ibayo pang pagpapa-inam ng ating kakayahan at galing bilang lahing-Pilipino. Tuluyan ng iwaksi at limutin ang di kanais-nais na gawi – ang corruption, ang pagmamalabis sa kapwa, ang pagyurak sa karapatang-pantao, ang pagwawalang-bahala sa mabuti at tamang gawain, ang katamaran at pagiging pala-asa sa iba.

Bagong taon na. Simula ng isang bagong dekada. Bilang Pilipino na nagmamahal sa sariling bayan, tayo’y sama-sama, tulong-tulong at hawak-kamay na hahakbang tungo sa tagumpay. Haharap sa darating na bukas ng may matibay na pananalig sa Poong Maykapal at bagong pag-asa sa Inang Bayan.

2011, simula ng isang bagong dekada ng pagpapala at tagumpay.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Sa artikulong “Papaano Magiging Merry ang Pasko” (22 Dec 2010)
Hi Kuya Max, Merry Christmas po. May the good Lord give us more blessings together with your family. Ako po si Venus Alvarez from Bahrain. Nabasa ko po ang article nyo na “Merry ang Pasko”. Totoo po yun lalo na sa atin na OFW. Lahat po ng sinulat ninyo nakapagbibigay ng aral at liwanag sa mga kababayan natin. Isa na po ako roon. Lalo na po ang mga kapatid natin na naliligaw ng landas sa buhay. More power, kuya. God bless. – Venus from Bahrain

Hi kuya, Merry Christmas. Merry ka ba ngayong Krismas? Tama ka kuya, ang salitang iyan ay bukam-bibig nating mga Pinoy, pero iba ang nasa loob ng damdamin. – Vicky from KSA

Hello po, kuya Max. Ako si Ed Nacs. Sensya na po kung istorbo po ako. Gusto ko pong magkaroon ng textmate. Thanks po. – Ed from KSA, CP No. 00-966-557134326

Papaano Magiging “Merry” ang Pasko?

Max Bringula (published in Abante ME Edition on 22 December 2010)

Ang pagsapit ng Kapaskuhan ay isa sa pinakamasayang okasyon sa Pilipinas (at marahil maging sa ibang bansa man). Ito’y pinakaka-abangan ng marami, lalo na ng mga negosyante at mangangalakal sa atin.

Pag-tapak pa nga lamang ng Setyembre ay may simoy Kapaskuhan na. Maririnig na ang awiting Pamasko na pinatutugtog sa mga radio station, AM o FM man. Naglipana na rin ang mga iba’t ibang Christmas decors na itinitinda tulad ng Parol o Christmas lanterns, Christmas Tree, at mga patay-sinding Christmas lights. Makikita rin ang iba’t ibang pang-regalo sa bata man o sa matatanda na itinitinda kasabay ng pagsulputan ng mga bazaars o tiangge at ang pagdami ng taong dumarayo sa malls at department stores para mamili o mag-Christmas shopping.

At habang papalapit ng papalapit ang mismong araw ng Pasko, lalo namang nagiging kapana-panabik ang bawat araw na dumarating. Marahil habang binabasa nyo ito, ilang araw na lang Merry Christmas na.

Subalit ang tanong, “sadya nga bang Merry ang Christmas”? Sa mga nagdarahop, at isang kahig, isang tukang mga kababayan natin, magiging Merry kaya ang Christmas sa kanila?

Sa mga naulila at nawalan ng mahal sa buhay sanhi ng iba’t ibang kadahilanan, maaaring di nila madama kung Merry nga ba ang Christmas.

Sa mga Samahan ng Malalamig ang Pasko dahil iniwan ng minamahal, o kaya’y sadyang walang nagmamahal, siguradong hindi Merry ang Christmas para sa kanila.

At sa mga pamilya kung saan ang mahal sa buhay ay nasa ibang bansa na nagtratrabaho at malayo sa kanilang piling sa araw ng Pasko, maaaring di lubos na Merry ang kanilang Christmas.

At sa ating mga OFW, sa bawat isang nasa labas ng bansa na nagtitiis ng hirap para sa ating mga mahal sa buhay, sa inyo na nagbabasa ngayon nitong Tinig sa Disyerto, Merry ba ang Christmas nyo?

Papaano nga ba magiging Merry ang Christmas?

Madalas nating naririnig ang pagbati na iyan, “Merry Christmas”. Bukam-bibig na natin. Sinasambit bagama’t di lubos na batid kung bakit naging Merry ang Christmas.

“Merry Christmas”, sa Tagalog “Maligayang Pasko”. Ano nga ba ang ibig sabihin nito?

Ito’y Merry o lubos na kasiya-siya pagkat ito’y araw ng pagdiriwang ng kapanganakan o pagdating ng Dakilang Manunubos na nagligtas sa sangkatauhan sa kaparusahan sanhi ng kasalanan.

Ito’y Merry o labis-labis ang kagalakang nadarama pagkat ito’y araw ng pagbibigayan, ng pagmamahal at pagpapatawaran. Sa ganitong araw lalong tumitingkad ang pag-ibig sa bawat isa, ang pag-uunawaan at pagtutulungan.

Sa ganitong paraan magiging Merry ang Christmas.

Hindi nasusukat sa dami ng salapi na ating hawak o ng materyal na bagay na ating taglay ang kagalakang madarama sa Araw ng Kapaskuhan. Hindi sa dami ng regalong ating matatanggap o pagbating maririnig. Hindi rin ito makikita sa dami ng pagkain sa hapag-kainan, o kung sino ang ating kasama o hindi kasama.

Kahiman isang Riyal o Dinar lang marahil ang laman ng ating bulsa, kahit simpleng celfon lang ang gamit natin, kahiman malayo sa mahal sa buhay, kung mayaman naman tayo sa pag-ibig, sa kagandahang-asal at may dalisay na pananalig sa Poong Maykapal at pagkilala sa nagkakaloob ng tunay na kasiyahan at kagalakan, natitiyak kong magiging Merry ang ating Christmas.

Merry Christmas po sa inyong lahat.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Mula kay Francis Franco, isang OFW sa Alkhobar, Saudi Arabia

Nakakalungkot mang isipin na tayong mga OFW ay malayo sa ating mga pamilya sa araw ng Pasko na dapat na nagkakasama at nakakatipon sa napakahalagang okasyong ito, but we need to sacrifice. Ang iba naman sa ibang araw o buwan ginagawa ang pag-celebrate ng Christmas together with their loved ones. Sabi nga nila araw-araw naman ay Pasko. Para sa akin, isang simpleng salitang SALAMAT, NGITI, PAGBATI at PAGDASAL sa aking pamilya, masasabi kong Merry na ang Christmas ko.

Dito sa Saudi nakakalungkot talaga minsan. Matutulala ka na lang sa kakaisip sa mga mahal sa buhay sa pilipinas. Minsan nga makikita mo na lang sarili mo na malayo ang tingin. Lalo na ngayong pasko o kapag nagdaan ang birthday mo na nagiisa ka. Mahirap, pero kailangan magtiis para sa mga mahal sa buhay. Salamat na lamang dahil mayroon tayong mga kaibigan na maituturing nating pangalawang pamilya. Ganyan ang buhay sa abroad. Masaya minsan malungkot, minsan may konting sandstorm pero dapat wag susuko. God bless sa lahat ng OFW. Mabuhay ang mga Bagong Bayani.