Paalala sa mga First-Time Overseas Filipino Workers

by Max Bringula Chavez
(published in Abante ME Edition, 31 Jan-12)

Sa bagong Guidelines na inilabas ng Philippine Bureau of Immigration kamakailan, may mga mahahalagang inpormasyon na dapat malaman ng mga bagong manggagawa o yaong first time na magtratrabaho sa abroad.

Ang circular ay lumabas noong 12 January 2012 at ngayo’y malawakang ipinatutupad sa lahat ng international airport at sea port ng bansa.

Narito ang mga dapat tandaan ng kapwa natin OFWs lalo na yaong mga aalis pa lamang ng Pilipinas for the first time:

1) Tiyakin na taglay ninyo ang mga sumusunod na dokumento na siyang isa-submit sa Immigration sa Pilipinas para makalabas ng bansa – valid passport, visa, airline o sea craft ticket, at overseas employment certificate (OEC).

Dapat na ang mga nabanggit na dokumento ay validated ng Labor Assistance Center (LAC). Ang LAC ay matatagpuan sa mga international airports at seaports ng Pilipinas.

2) Tiyakin na ang visa ninyong hawak o nakatatak sa inyong passport ay valid at lehitimo. Kung may discrepancy o pagkakaiba sa position/job title kumpara sa nakalagay sa OEC, dapat magbigay ang Ahensiya na nag-process ng inyong pag-alis ng Undertaking on Visa Usage (VVU), at ang manggagawa naman ay dapat mag-submit o gumawa ng Declaration of Awareness and Consent. Ang dalawang dokumento na ito ang dapat ipakita sa LAC para i-validate ang inyong papeles at mapayagan kayong umalis.

3) Ang mga Household Service Workers (HSW) ay di sakop ng Undertaking on Visa Usage (VVU). Kung kaya’t dapat ang visa na hawak ay yung para sa Household Service Workers lamang. Hindi puwedeng gumamit ng ibang visa. Ang HSW ay di paaalisin ng bansa kapag magkaiba ang visa niya sa kanyang aktuwal na trabaho.

4) Tiyakin na ang inyong papeles ay hindi “reprocess” o yaong ang dokumento na inyong tangan ay para sa iba pero ipinagamit sa inyo. Malalamang “reprocess” ang inyong dokumento kung ang job description/position sa visa ay iba sa nakasaad sa OEC, PDOS Certificate, at iba pang mahahalagang papeles tulad ng kontrata. O kaya naman, ang pangalan ng employer o ng kumpanyang pagtratrabauhan ay magkaiba sa nakasaad sa work visa at sa OEC.

Pag nagkagayon, di papaalisin ng Immigration ang manggagawa at kukumpiskahin ang mga dokumentong hawak at dadalhin sa POEA upang doon ay magkaroon ng imbestigasyon.

Para naman sa mga Balik-Manggagawa (o returning workers) at nagbabakasyon lamang, kailangan ding tiyakin na tangan ang mahahalagang dokumento kapag babalik na sa bansang pinagtratrabauhan tulad ng passport, valid visa, airline o sea craft ticket, at OEC na in-issue ng POEA kung sa atin kumuha o ng POLO kung sa bansang pinagtratrabauhan kumuha.

TSD Readers’ Corner:
(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Pagkuha ng OEC (Overseas Employment Certificate)

Ako po si Marilou na nagtratrabaho sa Dhahran, Saudi Arabia. Saan po ako puwedeng makakuha ng OEC? Magbabakasyon ako ngayong March 20, 2012. Gusto ko sanang dito na kumuha. Ano po ba ang kailangang dalhin at saka anong araw at oras po bukas ang opisina at saang lugar po? – from Marilou in Saudi Arabia.

Marilou, may schedule na inilaan ang POLO-Eastern Region Operations sa mga gustong kumuha ng OEC. Ito ay isinasagawa tuwing Miyerkules at Huwebes mula ala-una hanggang alas-kuwatro ng hapon. (1:00-4:00) sa Al Bustan Hotel, Alkhobar. Ang mga kailangan mong dalhin ay valid passport at kopya ng e-Ticket (o airline ticket). - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Matinding Paglamig, Naranasan sa Buong Saudi

by Max Bringula Chavez
(published in Abante ME Edition, 29 January 2012)

Ang nararanasang labis ng paglamig ng panahon sa buong Saudi Arabia mula pa noong Biyernes, 20 January 2012, ay tinatayang siya ng pinakamalamig sa nakalipas na dalawampung taon.

Halos zero degrees na ang temperatura sa ibang lugar lalung-lalo na sa bulubunduking bahagi ng Central at Northern region ng Saudi Arabia tulad ng Al Jouf, Tabuk, Hail, Arar, Turaif, Hafr Al Batin at Al Qaisumah. Gayundin sa bahagi ng Makkah at Madinah.

Bagamat ang tag-lamig na ito’y di lamang sa Saudi Arabia kungdi sa buong Arabian Peninsula na kinabibilangan din ng mga bansang Bahrain, Kuwait, Qatar, Oman, UAE, kasama ang Yemen.

Ayon sa Presidency of Meteorology and Environment (PME), ang paglamig na nararanasan ay tatagal pa hanggang sa unang linggo ng Pebrero ng taong kasalukuyan.

Kung kaya’t pinag-iingat ang lahat upang di mabiktima ng labis ng “excessive cold snaps” na maaaring maging sanhi ng pagkakasakit tulad ng ubo, sipon at pananakit ng katawan. Magsuot ng makakapal na damit lalo na kung lalabas o nasa open area.

Nagbigay rin ng babala ang Directorate General of Civil Defense ng Saudi sa lahat ng mamamayan nito at mga expatriates na mag-ingat sa paggamit ng heaters na kadalasa’y nagiging dahilan ng sunog kapag di nabantayan at napabayaang nakabukas o nakasindi ng mahabang oras. Dapat huwag patatagalin na umaandar ang heater o hahayaang nakabukas ito lalung lalo na kung matutulog na.

Kung gagamitin naman ang heater ng air-conditioning unit (AC), dapat ay dagdag ingat din. Kumpunihin muna ng maigi ito kung safe ba na gamitin lalo na kung luma na ang A/C at matagal nang di nagagamit ang heater.

Magkakaroon din ng sandstorms at heavy fog sa ibang bahagi ng Saudi Arabia na magdudulot ng zero visibility. Kaya’t pinag-iingat ang mga motorists sa oras na magkaroon ng ganitong kaganapan. Mas makakabuting tumigil na lamang kaysa ituloy ang biyahe at maging delikado sa daan.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Mahahalagang Inpormasyon Kaysa sa mga Larawan Lamang

Bakit po mas marami ang mga pictures ng kung anu-anong paligsahan kaysa sa mga matitino at mahalagang bagay ang nailalathala sa Focus in the Middle East? Suhestiyon ko po sana na ang mabasa po namin sa napakalaking espasyo na yan ay yung kapaki-pakinabang na artikulo na kapupulutan ng inpormasyon at aral sa mambabasa ng Abante Middle East Edition. Maraming salamat po. – from a reader in Saudi Arabia.

Kabayan, maraming salamat sa iyong puna at suhestiyon. Hayaan mo’t ipararating natin sa Editor In-Chief ng pahayagang ito ang iyong valid concern. Gayunpaman, sinisikap ng manunulat, columnist at contributors ng pahayagang ito na maging balanse sa aming paglalahad, na mapagbigyan ang mga kapwa natin OFWs na mailathala ang kanilang iba’t ibang community activities, at makapagbigay ng mahahalagang inpormasyon at panulat na magdudulot ng aral at inspirasyon sa masusugid nating tagasubaybay at mambabasa ng Abante ME Edition, di lamang ng Tinig sa Disyerto. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

The Ambassador Visited the Emirs

Ang Emir ng Qassim Region kasama si Ambassador Tago. Ang Deputy Emir ng Riyadh Region habang nakikipag-usap sa Ambassador. Ang Emir ng Eastern Region sa opisina nito sa Dhahran kasama ang Ambassador.

by Max Bringula Chavez
(published in Abante ME Edition, 27 Jan 2012)

The Ambassador starts the year right.

Sa layuning lalo pang mapagtibay at mapalawig ang relasyon ng Pilipinas at Saudi Arabia kung saan mayroong halos isang milyong OFWs na nagtratrabaho’t naninirahan, minabuti ng Ambassador ng Pilipinas sa Saudi Arabia, Hon. Ezzedin H. Tago, na bumisita sa pamunuan ng bawat rehiyon nito. Tatlong magkaka-ibang lugar ang kanyang binisita – ang Riyadh, Qassim at Eastern Region.

Buraidah, Qassim Region

Sa unang araw pa lamang ng taong 2012, itinakda agad ni Ambassador Tago ang pagbisita sa bahaging Kanluran, ang Qassim Region kung saan malugod na tinanggap ng Emir ng Qassim Region, His Royal Highness Prince Faisal bin Bandar bin Abdulaziz Al Saud, ang Ambassador sa opisina nito sa Buraidah. Nagkaroon ng pag-uusap ang magkabilang-panig at tinalakay ang mga mahahalagang “issues of mutual interest to both countries”, pati na ang pagtutulungan sa pangkabuhayan or investment. Pinuri rin ng Emir ang malaking kontribusyon ng manggagawang Pilipino sa kaunlarang tinatamo ng Saudi Arabia, at ang pagiging masipag, tapat at husay nito sa pagtratrabaho.

Ipinaaabot naman ng butihing Ambassador ang pasasalamat sa Saudi Arabia sa pagkalinga nito sa libu-libong OFWs sampu ng kanilang pamilya.

Nauna rito, nakipagpulong din ang Ambassador sa miyembro ng Qassim Chamber of Commerce and Industry kung saan natalakay ang pagtutulungan sa infrastructure development, agriculture, at business process outsourcing (BPO) tulad ng call centers at medical services.

Riyadh Region

Sumunod na araw, January 2, nakipagkita naman ang Ambassador sa Deputy Emir ng Riyadh Region, His Royal Highness Prince Mohammad bin Saad bin Abdulaziz Al Saud, na siyang pansamantalang tumatayong Emir ng Riyadh Region. Sa kanilang pag-uusap, natalakay ang pagpapalawig pa ng bilateral relations ng dalawang bansa lalo na sa trade and investment. Parehong sumang-ayon ang magkabilang-panig na ipagpatuloy ang ganitong ugnayan at pagbisita upang lalo pang tumibay ang partnership ng Pilipinas at Saudi Arabia sa iba’t ibang larangang makakabuti sa bawat isa.

Eastern Region

Ang ikatlong rehiyon sa itinerary ng Ambassador ay ang Eastern Region na naganap noong January 7 sa Dhahran nang bisitahin ng butihing Ambassador ang Emir ng Eastern Region, His Royal Highness Prince Mohammad bin Fahd bin Abdulaziz.

Kasama ni Ambassador Tago sa pagbisitang ito ang First Secretary and Consul Roussel Reyes at Labor Attaché ng Eastern Region, Adam Musa.

Sa pag-uusap na naganap, muling ipinaabot ni Ambassador Tago ang pasasalamat sa Saudi Arabia sa pagtanggap sa libu-libong OFWs na naging second home na ng maraming Pilipino.

Inanyayahan naman ng Emir ng Eastern Region ang mga Filipino businessmen na mag-invest sa Saudi Arabia. Wika niya, “there are many investment opportunities in the Kingdom that are open to foreign investors.”

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Housing Loan sa SSS

Mayroon po akong housing loan sa SSS na di nahulugan at malapit ng ma-remata. Pag-ibig member po ako. Pwede ko pa ba na ipa-assume ito sa Pag-ibig at sa kanila na lang ako maghuhulog kaysa kukuha ako ng bagong housing loan? Thank you, Sir Max and more power to you at sa Tinig sa Disyerto. – from a reader in Saudi Arabia

Kabayan, ang pagkakaalam ko ay walang housing loan ang SSS at usually ay salary loan lamang ang kanilang binibigay sa mga miyembro nito. Gayunpaman, kung mayroon ka mang housing loan sa SSS, sa palagay ko’y hindi maaaring i-assume ito ng Pag-ibig sa dahilang magka-ibang ahensiya ang dalawa. Upang mabigyan ka ng tama’t eksaktong kasagutan ay aking ini-refer ang iyong katanungan sa Pag-ibig Corner ng pahayagang ito. Hintayin mo lamang ang kanilang magiging katugunan sa iyong tanong. Ugaliin mo ring magbasa ng Pag-ibig Corner ng Abante ME Edition kung saan ang iba’t ibang katanungan tungkol sa Pag-ibig Fund ay tinatalakay. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Pagpapalit ng Profession sa Iqama, Puwede Pang Humabol

by Max Bringula Chavez
(published in Abante ME Edition, 24 January 2012)

Puwede pang humabol ang sinumang nagnanais na mapalitan ang profession sa kanilang residence permit o Iqama. Ito ang inihayag ng Ministry of Labor ng Saudi Arabia kaalinsabay ng kanilang pagsisikap na maisaayos ang Saudi labor market.

Bibigyan ng palugit ang mga expatriates hanggang 22 February 2012 (30/03/1433-H) para mapalitan ang kanilang profession. Ayon sa tagapagsalita ng Ministry of Labor, mahigit kumulang na 35,000 foreign workers na ang nakinabang sa programang ito mula ng ilunsad noong 29 November 2011.

Ito’y bahagi rin ng pagsisikap ng Saudi government na mapaigting ang programang Nitaqat o yaong pagkakaroon ng mas malaking porsiyento ng Saudis na nagtratrabaho sa mga kumpanya’t establisimento kumpara sa mga expatriates o foreign workers.

Sa dahilang maaaring mawalan ng trabaho ang karamihan sa expatriate workers na ang profession sa Iqama ay yung para lamang sa mga Saudis, maituturing na ang pagpapapalit ng profession ay paraan upang sila’y makapagtrabaho pa rin.

Ang mga trabaho na di na puwedeng ibigay sa mga foreign workers ay ang mga sumusunod: HR Directors, Personnel Managers, Personnel Representatives, Personnel Specialists, Timekeepers, Receptionists, Cashiers, Security Guards, at nitong huli lamang ay idinagdag ang Salesmen at Sales Ladies ng mga women’s lingerie.

Upang mapalitan ang profession, kailangan lamang na magpasa o mag-submit ng authenticated documents na magpapatunay ng kanilang profession o qualification. Hindi na rin kailangang magtungo pa sa Labor Office ng personal. Magagawa na ito on-line o electronically ng kumpanya at establisimento na nagnanais na palitan ang profession ng kanilang expatriate workers.

Dagdag pa, ang opportunity na ito ay di limitado sa mga kumpanya at establisimento na nasa excellent categories o Saudization-compliant, kungdi maging yung mga nasa red, yellow or green. Subalit kapag tapos na ang palugit na ibinigay, yaong lamang nasa excellent o green categories ang puwedeng magpalit ng profession ng kanilang workers.

Gayunpaman, dapat tandaan na may mga professions na nangangailangan ng lisensiya o licensure mula sa authorized-giving bodies bago ibigay o itatak ang profession sa Iqama, tulad ng Doctors, Surgeons, Dentists, Nurses, Pharmacists at iba pang katulad nito. Ang mga nabanggit na professions ay dapat mayroong official license mula sa Saudi Medical Specializations Authority (SMSA).

Binabalaan naman ang mga kumpanya at establisimento na magma-manipulate ng dokumento mapalitan lamang ang professions ng kanilang workers. Ang parusa sa mahuhuli o malalamang nagpalsipikado ay ang di pagbibigay o pag-kansela ng kanilang lisensiya hanggang limang taon, at ang pag-blacklisted upang di makakuha ng mga foreign workers.

Ang pagpapalit ng professions ay malaking tulong din sa iba nating mga kababayan na nagnanais na madala ang kanilang pamilya upang makasama sa Saudi. May mga ilang OFWs kasi na ang professions sa Iqama ay laborer. Dahil dito, di nila maaaring madala ang pamilya dahil laborer ang professions nila o visa na naibigay nang sila’y unang dumating sa Saudi upang magtrabaho.

Kaya’t para roon sa nagnanais na mapalitan ang kanilang professions, makipag-ugnayan na kayo sa inyong government relations officers bago matapos ang palugit na binigay na 22 February 2012.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Serye ng Saudi Labor Law

Para po sa mga nagtatanong kung may karugtong pa yung ating Serye sa Saudi Labor Law, mayroon po at mahaba-haba pa iyon. Kaya, itutuloy po natin iyon sa mga susunod na publication ng Tinig sa Disyerto. Salamat ng marami sa inyong patuloy na pagsusubaybay. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Photos of the News - "Eamaar Ready Mix..."

Eamar Ready Mix, Kampeon sa 4th DBD Sportsfest

Ang koponan ng Eamaar Ready Mix na tinanghal na Kampeon sa DBD 4th Sportsfest Ang Mythical Five ng 2011 DBD-EP Sportsfest. Ang DBD-Pag-ibig Team habang tinatanggap ang tropeo sa ikawalang puwesto. Ang koponan ng Al Khifah habang tinatanggap ang tropeo sa ikatlong puwesto. Ang nagwaging koponan kasama ang Organizers at Personnel ng DBD-EP Sportsfest. by Max Bringula Chavez
(published in Abante ME Edition, 19 Jan-12)

Tulad sa mga nakalipas na taon, matagumpay na idinaos ng Day by Day – Eastern Province ang kanilang taunang Basketball Sportfest kung saan walong koponan ang kalahok na nagtagisan at nagpakitang-gilas sa larong basketball.

Sa temang “Sama-samang Nagkakaisa sa Palakasan”, nagsimula at nagtapos ang nasabing torneo sa diwa ng pagkaka-isa.

Sa ginanap na championship game sa Al Gosaibi Hotel Sports Complex noong 30 December 2011, tinanghal na kampeon ang koponan ng Eamar Ready Mix. Sa score na 80-74, pinataob nito ang maliliksi at mabibilis na koponan ng DBD-Pag-ibig. Pagkakataon na sana ng DBD-Pag-ibig na masungkit ang kampeonado na naging mailap sa kanila sa mga nagdaang taon, subalit sila’y kinapos at di pinalad na maiuwi ang tropeo. Masaya na rin naman ang nasabing koponan sa ikalawang puwesto na nakamit. Wika ng kanilang playing coach na si Henry Lagura, “Malaking karangalan na ito. Ang mahalaga’y naipakita namin ang isang malinis at maayos na paglalaro. Sa Diyos ang kapurihan!”

Samantala, labis din ang pasasalamat ng Eamar Ready Mix sa tinamong parangal sa pangunguna ng kanilang coach at team owner na si Raul Ubaldo. Gayong ito ang una nilang paglahok sa DBD-EP Sportsfest, di sila nabigong makamit ang pinaka-aasam na kampeonado. Dahil dito, ipinasya nilang muling sasali sa torneo sa mga susunod na taon at ulitin ang kanilang winning performance.

Nasa ikatlong puwesto naman ang koponan ng Al-Ebthekar, at pang-apat ang Al-Kifah Team.

Ang MVP (Most Valuable Player) sa 4th DBD-EP Sportsfest ay ipinagkaloob naman kay Jerome Lazaro (Jersey No. 30) ng Eamar Ready Mix. Nagtala ng 15 points si Jerome sa championship game at total of 47 points sa buong torneo.

Tinanghal namang Mythical Five ang mga sumusunod na manlalaro: Ryan Mark Legaspi (Eamar Ready Mix), McLean Lontoc (Eamar Ready Mix), Ferdie Guzilan (DBD-Pag-ibig), Esmeraldo Ramos (Al-Kifah) at Peter Bundoc (Al Ebthekar).

May walong koponan ang kalahok sa katatapos na 2011 DBD-EP Sportsfest na kinabibilangan ng mga sumusunod na manlalaro:

Eamar Ready Mix (Champion) - Nonoy Dita, Rodel Celis, Jerome Lazaro, Ryan Mark Legaspi, Boy Sena, Ronald Manalastas, Dave Valderama, Arnel Marjes, Gener Nicanor, McLean Lontoc, Joven Buemia, Charlie Largo, Ronan Mandia, Ruel Ubaldo at Michael Lontoc.

DBD-Pag-ibig (2nd Placer) – Henry Lagura (Player-Coach), Mark Santana, Billy Bangaan, John Philip Jayme, Jun Jhapet, Jay Paguio, Ian Andrade, Jojo Cristobal, Vhoy Abejuela, Ferdie Guzilan, Melchor Navarra, Johnny Juguilon, Marny Ambrocio, George Agustin at Edgar Tello.

Al Ebthekar (3rd Placer) – Robert Bibonia, Peter Bundoc, Cris Lagui, Benson Gabalonia, Jerry Bundoc, Albert Pascual, Mariano Bundalian, Rolando Paras, Michael Nanchio, Jayson Natumba, Gerry Somana, John Marmol at Yousef.

Al-Kifah (4th Placer) – Esmeraldo Ramos, Maurice Buena, Freddie Toledana, Jefferson Sebiario, Cris Roman, Alfred Carpio, Martin Clave, Ruben Rodolfo Jr., Henry Bambao, Ronald Lucahin, Frederick Alferez, Aldrin Albeza, Rolando Aquino, Ronald Estrada, Jing Sangalang, Marvin Alvarez, Adrian Andaya at Melchor Fajardo.

DBD-Kanlungan Team – Randy Castro (Playing Coach), Peter Seria, Michael Soniega, Marvin Castro, Jhun Cantiaga, Erwin Luna, Bobot Gilles, Raymond Teodocio, Harold Bartolaba, Caloy Soniega, Kelvin Manantan, Bobet Suede, Bhon Coronel, Jose Calagos, Nathaniel Yambao at Kiefer Ortega.

A.A. Dossary Team – Alex Loveria (Team Owner), Wency Castillo, Derric Guitierez, Jovany Mabulay, Jay Pabilonia, Norbert Sarduma, Jerson Granada, Mark Javate, Peter Dodocoyco, Marlon Ilagan, Jogene Sarduma at Richard Nagoyo.

AXAL Team – Danilo Vejano (Team Owner), Paul Gadiano, Aaron Dela Cruz, Dickson Balingbing, Benjie Cervantes, Allan Modequillo, Edwin Espiritu, Jessie Bautista, Louie A., Eduardo, Rommel, Alex and Max.

Ramada Team – Alex Ventura, Mark Prado, Sonny Montilla, John Marvic Quiamco, Lyndon Santos, Redan Mateo, George Medina, Nesmer Acopiado, Bernard Samson, Wilfred Napod, Sherwin Ledesma, Peter Bual, Jhong Nepomuceno at Louie.

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Amnesty Period, In-Extend Hanggang 09 March 2012

by Max Bringula Chavez
(published in Abante ME Edition, 16 January 2012)

Muling in-extend ang amnesty period para sa mga overstayers na ang hajj, umrah at visit visas ay palso na at hindi na-renew.

Sa Diplomatic Note No. 8/4/365161, 25 December 2011 (30/1/1433-H), na natanggap ng Embahada ng Pilipinas, isinasaad na muling i-extend ang amnesty period ng anim na buwan simula sa 14 September 2011 (16/10/1432-H) hanggang 09 March 2012 (16/4/1433-H).

Muling ipinapaalala na ang amnestiya na ito ay para lamang doon sa mga nag-hajj at nag-umrah na nag-overstayed sa bansa ng walang valid visa. Ito’y sa kadahilanang napalso na ang kanilang haj at umrah visa at hindi nai-renew. Saklaw din ng amnestiya yung mga visit visa holders na nag-overstayed din sa kaparehas na kadahilanan.

Hindi kasama sa amnestiya ang mga “TNT’s” o yaong mga tumakas sa kanilang mga amo at yaong mga walang valid residence permit o Iqama dahil expired na at hindi na-renew.

Mariing itinatagubilin ng Embahada ng Pilipinas sa lahat ng concerned OFWs o roon sa mga nasasaklaw ng Royal Amnesty na ito na i-avail ang pagkakataong maka-uwi ng maayos at hindi na mangangamba pa na makukulong dahil sa pag-overstay at magbayad ng malaking halaga bilang penalty kapag nahuli ng mga awtoridad.

Pinapaalalahanan din ang mga kababayan nating huwag magpapaniwala sa mga “fixers” na mangangakong aayusin ang kanilang papeles sa madaling paraan kapalit ng halagang ibabayad.

Kung nais na i-avail ang Royal Amnesty o Pardon, magsadya kayo mismo sa Saudi Immigration Office (o Jawazat) na malapit sa inyong lugar upang ma-process agad ang inyong repatriation bago abutin ng deadline na 09 March 2012.

Maaari rin kayong lumapit sa ating Embahada at Konsulada upang mai-assist kayo sa kakailanganin para sa inyong repatriation.

Narito ang kanilang numero:

Philippine Embassy, Riyadh: 4821802 / 4823559 / 4880835 / 4820507
Philippine Consulate General Jeddah 24/7 Hotline: 0515016318
POLO Jeddah 24/7 Hotline: 0515124797, (02) 665-8462 ext. 101
POLO-Eastern Region Office: 8941846 / 8942890 / 8651951

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Photos to Share in Abante ME Edition

Mag-inquire po sana ako kung pwedeng mag-publish ng photos sa Abante ME Edition sa Pinoy Corner nito. Kung pupuwede, papaano po kaya maipapadala. The only thing I can do is to send by mail and not through eMail or by Facebook.
I’m working as Nanny here in Dammam.

Kabayan, maaari ninyong ipadala ang inyong mga photos sa address na ito:

Abante Middle East Edition
Flat 13, Bldg. 180, Road 408, Area 704
Salmabad, Kingdom of Bahraiin

Komento sa “Di Na Natuto” (published on 11 January 2010)

Nabasa ko po ang magandang mensahe ni Maricon tungkol sa Bagong Taon Na! Anong Bago? Friend niya po ako at dito rin nagwo-work sa Dammam. Katulad ni Maricon, marami rin akong pinagdaraanan pero di pa rin natututo. Sana ngayong 2012, mabago na ang buhay namin. Hindi ka rin naman matututo kung walang problema at pagsubok sa buhay. Yan ang magiging daan para tumagal pa kami at maging matatag. Marami pa akong mga friends dito at puwede kong pabasa sa kanila ito para mahikayat ko rin sila na magbigay ng kanilang saloobin. Good luck and more power. – Ms. Rosaly Maturan of Dammam

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

“Lawas Kan Pinabli” – 1st Film on OFW by an OFW

by Max Bringula Chavez
(published in Abante ME Edition, 12 Jan-12)

Sa kauna-unahang pagkakataon, isang makabuluhan at makatotohanang pelikula patungkol sa buhay ng mga OFW (Overseas Filipino Workers) na nagtratrabaho sa Middle East, particularly sa Saudi Arabia ang ginawa’t natapos at ipinalabas kamakailan lamang sa Cinemanila International Film Festival.

Ang nasabing pelikula na isang feature-length experimental/documentary movie ay may pamagat na “Lawas Kan Pinabli” o sa Ingles ay “Forever Loved”, na hango sa isang popular folk love song sa lalawigan ng Pangasinan na may ganito ring titulo.

Ang pelikula ay idinirehe ng premyadong direktor na si Chris Gozum, na isang ring OFW na nagtratrabaho bilang Videographer and Editor sa isang kilalang medical institution sa Riyadh, Saudi Arabia.

Ang “Lawas Kan Pinabli” ay isang indie film na tumatalakay sa karanasan ng isang neophyte migrant Filipino worker mula sa lalawigan ng Pangasinan, na nagtungo sa Middle East di lamang upang magtrabaho kungdi hanapin ang kanyang nawawalang asawa na noo’y umalis patungong Gitnang Silangan upang magtrabaho tatlong taon na ang nakalipas.

Sa kanyang paghahanap, nakatagpo niya’t nakausap ang ilang mga OFWs na tulad niya na may kanya-kanyang karanasang mailalahad sa pagtratrabaho sa ibayong lugar. Mga karanasang sumasalamin ng uri ng buhay mayroon ang isang OFW sa malayong lupain tulad ng Gitnang Silangan. Tulad ng mga OFW na pinagmamalupitan ng among pinagtratrabauhan, napagbibintangan at nakukulong, mga OFWs na nalulong sa masasamang bisyo at nasadlak sa mga maling relasyon, at marami pang ibang tulad nito. Walang takot na ipinakita sa pelikula ang totoong buhay na nararanasan at pinagdaraanan ng ilan sa ating mga OFWs.

Marami-rami na ring pelikula ang nagawa sa buhay ng mga OFWs tulad ng “Anak” ni Gov. Vilma Santos, “Dubai” ni Aga Muhlach at John Lloyd Cruz, “Milan” ni Piolo Pascual at Claudine Barretto, and lately ang “A Mother’s Story” ni Pokwang. Subalit ang mga ito’y ginawa para sa mainstream cinema o yung pang-komersiyalismo at idinirehe ng mga kilala’t batikang mga direktor, subalit ang “Lawas Kan Pinabli” ay maituturing na kauna-unahang pelikula tungkol sa totoong kuwento at kaso ng mga totoong OFWs na gawa’t idinirehe ng isang OFW rin. Kung kaya’t makatotohanan ang paglalahad, patas at may hustisya ang laman ng pelikula.

Ang bidang karakter ay epektibong ginampanan ni Mark Louie Rojas, isang OFW sa Riyadh, kasama ang ilan pang mga OFWs tulad nina Jo Paredes, Dindo Salinas, Sharon Manibpel, Joselito Alejo, Joseph Peruda, Inday Pongan Malik, Rovimar Vinzon, Rannie Tomalon, Vonnel Mirandilla, Rolando Blanco, Christopher Carvajal, at Joseph Espiritu.

Ang direksiyon nama’y buong husay na pinamahalaan ni Direk Chris Gozum. Si Gozum ay isang Master of Arts student sa University of the Philippines, at alumni ng 2006 Asian Film Academy Fellowship Program sa Pusan, South Korea. Siya’y recipient ng dalawang Palanca Awards for Literature noong taong 2001 at 2002, sa kaniyang full-length drama plays na may pamagat na “War Booty” (2001) at ang “The Pasyon of Pedro Calosa and the Tayug Colorum Uprising of 1931” (2002).

Ilan sa award-winning films na ginawa ni Gozum ay ang mga sumusunod:
“The Independence Mission” - 2004 Gawad CCP para sa Alternatibong Pelikula at Video, “Lakaran” - featured in the 2006 Cinemalaya Independent Film Festival, at ang “The Calling” - produced by the Asian Film Academy in 2006 and premiered at the 13th Pusan International Film Festival. Ang “The Calling” ay nanalo rin na Best Short Film sa 9th Cinemanila International Film Festival noong 2007. Ang “Surreal Random MMS Texts para ed Ina, Agui tan Kaamong ya Makakailiw ed Sika: Gurgurlis ed Banua” (Surreal Random MMS Texts for a Mother, a Sister, and a Wife who longs for You: Landscape with Figures). Ang pelikulang ito ay nagkamit ng Ishmael Bernal Award for Most Outstanding Young Filipino Filmmaker sa 2008 Cinemanila International Film Festival, at ang “Anacbanua” (The Child of the Sun) na nagkamit ng Digital Lokal Lino Brocka Grand Prize at Best Director Award sa 2009 Cinemanila International Film Festival.

Ang “Lawas Kan Pinabli” ay prinodyus ng Sine Caboloan Co. Ltd. sa pamamagitan ng cinema grant mula sa National Commission for Culture and Arts, isang government agency under the Office of the President of the Philippines.

Isa rin sa layunin ng pelikulang ito ay ang i-promote ang lenguwahe ng Pangasinan na siyang ginamit sa karamihang bahagi ng pelikula at nilagyan na lamang ng sub-titles sa Ingles. Ang direktor na si Chris Gozum ay mula mismo sa Bayambang, Pangasinan. Ayon kay Gozum, siya’y naalarma nang malamang halos lahat ng kabataan sa Pangasinan ay Tagalog ang salita at nalimot na ang sariling lenguwahe kahit mismo sa loob ng kanya-kanyang tahanan, at lalo na sa ibayong lupain kung saan tuluyan ng nakalimutan ang lenguwaheng ito ng mga Pangasinenses. Dahil dito, sinikap ni Gozum na muling buhayin ang pagggamit ng Pangasinan language at ang kamalayan dito sa pamamagitan ng mga pelikulang kanyang ginagawa.

Ang production at crew ng “Lawas Kan Pinabli” ay kinabibilangan nina: Direction & Editing: CHRISTOPHER GOZUM, Executive Producer: JANUS VICTORIA, Story & Scenario: CHRISTOPHER GOZUM, Cinematography: NOEL ALIPOYO, Sound Design: TENGAL, Music: JOHN SOBREPENA, RAN KIRLIAN, Poetry: KWANAMI KIYOTSUGU, ZEAMI MOTOKIYO, ZENCHIKU UJINOBU, EXODUS, SONGS OF SOLOMON, MELCHOR ORPILLA, Pangasinan Narration: MARIA TERESA BAUTISTA, CHRISTOPHER GOZUM, Bahasa Melayu Narration: SAZWATI SAAD, Pangasinan Translation: MELCHOR ORPILLA, ERWIN FERNANDEZ, SANTIAGO VILLAFANIA, Make-up: BRUNO SERAPION, Photos & Poster Design: TIMOTHY IGNACIO.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Samahan ng Ki Aikido

May Ki Aikido po ba rito sa Dammam o sa Alkhobar? Kung meron po, puwede po ba malaman ang address at contact number. Very informative po ang inyong column. Keep up the good work. – mula sa isang kabayan sa Saudi Arabia

Kabayan, narito ang ilan sa mga Filipino organizations ng martial arts na Aikido:


Phil. Martial Arts Combat Aikido (PHIMACA) – Albert S. Lagbas, 8950965
Amada-Ryu Bujutsu Dojo Aikido – Eric B. Amada, 0507244478

Para sa ating mambabasa, bukod sa Aikido, may mga ilan ding grupo ng iba’t ibang martial arts tulad ng Desert Tiger Taekwondo, Eagle Claw Consolidated Martial Arts, Lakas Katorse, Okinawa Shorin Ryu Karate-Do Assoc.-SA (OSKA-SA), Phil. Combat Karate Judo (PHICKAJU), Intl. Shotokan Sensei Martial Arts Federation, Ras Tanura Karate Federation (RTKF), Black Scorpion Martial Arts, Combat Kungfu Society, Oriental Kempo Martial Arts Club (OKMAC), at Tian Chuan Fa Martial Arts.

Kung nais ninyong makabilang sa mga nabanggit na grupo, ipagbigay-alam ninyo po lamang.

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Di Na Natuto

by Max Bringula Chavez
(published in Abante Middle East Edition on 11 Jan-12)

New Year Revelry Victims

Maituturing na “deadliest” o pinaka-madugo ang pagsalubong ng mga Pilipino sa taong 2012 kumpara sa mga nakalipas na taon kung saan naitala na apat (4) ang namatay at mahigit isang libo ang mga nasugatan dahilan ng paputok.

Hinigitan nito ang statistics ng nakaraang taon (2011). Ito’y sa kabila ng malawakang programa ng Department of Health (DOH) na nagbabawal ng paggamit o ang pag-iwas sa paggamit ng mga paputok. Hindi inaakala ng DOH na may maire-report na mamamatay sa paputok di dahil sa tetano ng akibat nito kungdi sa lakas ng paputok na gamit. Kadalasan ang pagkakaputol lamang ng mga daliri o braso ang naitatala o kaya’y pagkasunog ng balat, ngayo’y may mga namatay na.

Sa loob ng dalawampung taon, ngayon lamang nangyari ito. Ibig sabihin sa halip na matuto ang mga Pilipino sa taun-taong report ng nasusugatan o napuputulan, lalo pang lumala. Di na natuto.

Landslide at Compostela Valley

At nitong nakaraang Huwebes lamang, 05 January 2011, naganap naman ang isang landslide sa Pantukan, Compostela Valley sa Davao City kung saan 25 ang namatay, 16 ang nasugatan at mahigit isandaan ang mga nawawala.

Matatandaan na nagkaroon na rin ng landslide sa nasabing lugar din sa Bgy. Kingking, Compostela Valley noong 22 April 2011 kung saan labing-apat ang namatay, labing-apat ang nasugtan at walo ang mga nawawala.

Ang landslide ay naganap sanhi ng pagkaka-ubos ng mga puno sa bundok na siyang pumipigil sa pagdalusdos ng lupa sa pamamagitan ng ugat nito. Subalit dahil sa nakakalbo na ang bundok sanhi ng walang-humpay na pagla-logging, naganap ang inaasahan, ang pagguho ng lupa na kumitil ng maraming buhay.

Ito’y sa kabila ng kautusan ng pamahalaan na pagbabawal sa pagla-logging o ang pagkakaroon ng total logging-ban, na hindi naman lubusang naipapatupad dahil na rin sa tahasang pag-suway ng mga kinakaukulan.

Ipinag-uutos din na huwag manirahan sa mga landslide-prone area ay doon pa rin nagsusumiksik ang ilan dahil di maiwanan ang pagkakakitaan doon lalo’t kung ito’y lugar ng minahan o kaya’y logging area.

Kaya’t kahit ilang landslide pa ang maganap ay di alintana. O sadyang matigas na ang ulo ng ilang mga kababayan natin. Di na natuto.

Flash Floods at Cagayan de Oro City

Hindi rin malilimutan ang naganap noong Disyembre lamang ng nakaraang taon sa Cagayan de Oro City at sa katabi nitong Iligan City nang bumuhos at umagos ang malakas na tubig mula sa kabundukan na lumikha ng mataas na pagbaha at nagwasak ng mga ari-arian at kumitil ng maraming buhay. Ang tubig na dala ng bagyong Sendong ay tuloy-tuloy na umagos sa kabayanan dahil walang mga puno na dapat sana ay pipigil dito.

Isinisisi sa pagla-logging ang dahilan ng biglaang pagbaha at sa pagkabara ng dapat sana’y lagusan ng tubig sanhi ng sala-salabat na bahay na nagsulputang parang kabute sa mga tabing-dagat.

Taun-taon na tayo’y nakakaranas ng ganitong mga kaganapan ng pagbaha. Subalit sa kabila ng malagim at nakalulungkot na balita ng mga kababayan nating nasasalanta, tuloy pa rin ang pagwasak natin sa kalikasan at pag-aabuso rito. Di na natuto.

Sa totoo lang, hindi na natin kailanang tumanaw pa sa malayo para mabatid ang bagay na ito. Sa ating sarili lamang, kung susuriin natin ang ating mga gawi, madalas na ang pagakakamali nati’y paulit-ulit lamang. Hindi matuto-tuto. Iyon at iyon pa rin ang ginagawa bagama’t alam na natin ang kahihinatnan nito.

Di na natuto. Kaylan pa kaya tayo matututo? Sa pagputi ng uwak, o sa pag-itim ng tagak?

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Anong Bago sa Bagong Taon

(Pahayag mula kay Ms. Maricon ng Dammam, Saudi Arabia, sa artikulong “Bagong Taon Na! Anong Bago?”, published on January 4, 2012)

Hapi New Year po. Napakaganda ng mga words nyo. Sana maraming makabasa lalo na tungkol sa pag-iimpok bilang OFW. First time ko po mag-work dito sa Dammam bilang DH. Actually, marami ng nagbago hindi sa buhay ko kungdi sa family ko. Although wala pa me ipon ngunit naibibigay ko sa kanila ang alam kong wish nila especially sa parents ko.

Ang bago at pinagbago ng life ko now as DH, tumaas ang sahod ko at nag-offer si Madam na pag-aaralin niya ang sister ko as Cutter at ipapasok sa kanyang shop. At ang pinakabago ngayon ay kayo po dahil alam kong marami kayong nabubuksang puso’t isipan. Good luck and God bless po.

Bagong Taon Na! Anong Bago?

by Max Bringula Chavez
(published in Tinig sa Disyerto, Abante ME Edition, 04 January 2012)

2012 na! Parang kaylan lang ang 2011, ngayon ay bagong taon na naman. Isang taon ang muling nalagas sa dahon ng panahon upang bigyan-daan ang paninimula ng bago.

Subalit ano nga ba ang bago sa bagong taon?

May pagbabago ba na dapat tayong abangan? Pagbabago na dapat isagawa sa personal na buhay, sa trabaho o sa ano mang larangan na ating kinabibilangan?

Dahil bago ang taon, nararapat lamang na may bago at hindi yung dati pa rin na ating nakagisnan na’t nakagawian na kadalasan sa halip na ang dulot ay tagumpay, ay lungkot at kabiguan ang ating nakakamtan.

Mga pananaw, ugali at gawain na minsan o kadalasan ay siyang sanhi ng ating lalo pang pagkalugmok sa halip na umangat sa buhay. Mga taon na nasayang at kalakasang naubos at katawang pinanghina na, ngunit wala pa ring pagbabago na nakita o naaninag man lamang sa takbo ng ating buhay.

Likas naman sa tao ang hangarin na magbago o magnais ng pagbabago. Kahiman ang pusakal na kriminal ay naghahangad din ng pagbabago. Bato man kung minsan ituring ang puso, lumalambot din at napapaamo at nagnanais na magbago.

Kaya nga’t kapag sumasapit ang Bagong Taon, may gumagawa ng New Year’s Resolution na bagama’t hindi isandaang porsiyentong natutupad, nakakatulong din pagkat nakapag-iisip tayo na magbago o gumawa ng sa tingin natin ay makabubuti.

May paniniwala pa tayo at mga ginagawa kapag magpapalit na ang Taon tulad ng pagsusuot ng damit na may mga hugis bilog o disenyong polka dots, ang paglalagay ng pera sa bulsa o pitaka, at pagkakaroon ng iba’t ibang bilog na prutas sa hapag-kainan, sa pag-aakalang ito’y magiging daan o magbibigay ng magandang kapalaran sa bagong taong papasok.

Ito raw ang maghahatid sa kanila ng swerti.

May mga tumatalon naman pagtunog ng alas-dose na hudyat ng bagong taon, sa paniniwalang sila’y tatangkad pa kapag ito’y kanilang ginawa, dahil kung ano raw ang ginagawa natin sa pagpasok ng bagong taon ay yun ang gagawin natin at mangyayari sa buong taong lilipas. Kaya’t kung ika’y tulog, buong taon ka ring magtutu-tulog. Eh papaano naman kaya yung gising, isang taon din kayang gising at di matutulog? Nakakatuwang, nakaka-praning na paniwala, subalit siya nating ginagawa dahil nga ang nais ay pagbabago.
Maging ang mga musmos na bata, gusto’y bagong sapatos, bagong damit, bagong laruan kapag Bagong Taon. Maging ang mga di na bata, bagama’t nag-eesep-bata, gusto’y may bago rin. Bagong iPhone, o iPad, bagong sasakyan, at bagong kaulayaw o kaibigan.

At syempre, ang pagsindi ng iba’t ibang paputok at ang paglikha ng ingay ay di lamang isang uri ng masigabong pagsalubong sa Bagong Taon kungdi ito’y isang pamamaraan daw ng pagtaboy ng masasamang espiritu at kamalasan sa buhay.

Anu’t ano pa man ang kadahilanan at pamamaraan, mainam na ang hangaring ito’y gamitin ng positibo upang tunay na makamtan ang hangaring guminhawa ang buhay, at maituwid ang liku-liko nating daan.

Gawing maalwan ang buhay sa pamamagitan ng pagpawi ng ano mang nakakabibigat sa ating puso’t damdamin. Matutong magpatawad at humingi ng tawad sa mga tao at mahal natin sa buhay na ating nakasamaang-loob. Malaki ang magagawa nito upang maging magaan ang ating pakiramdam at makakilos tayo ng walang ano mang inaalala at kinatatakutan.

Turuan din natin ang sarili na maging mapala-ngiti at di laging nakisimangot at nakakunot ang noo’t di maipinta ang mukha. Nakapagpapabata pa ito at marami pa tayong magiging kabati at kaibigan.

Baguhin din natin ang pananaw at pamamaraan natin sa trabaho o maging sa personal na buhay. Kung dati-rati’y ang madalas nating sambit ay “bahala na si Batman”, ngayo’y maging responsable na tayo sa bawat gagawin natin. Hindi na tayo nanatiling bata. Nagkaka-gitla na ating noo, nauubos na ang buhok at humihina na ang tuhod, kaylan pa kaya tayo makapag-iisip na di habang panahon na tayo’y nasa abroad at may trabaho?

Kung kaya’t ito ang hamon ko sa bawat OFW na tulad ko, nawa’y pagsumikapan nating makapag-impok upang pagdating ng araw na tayo’y babalik na sa Lupang Sinilangan, mayroon tayong naipundar at magagamit upang makapagsimula ng panibagong yugto ng ating buhay. Tayong lahat nama’y babalik rin sa ating bayan kung kaya’t ngayon pa lamang ay paghandaan na natin ang panahong iyon. Iwasan na ang labis na paggastos sa walang kapararakang bagay. Itigil ang bisyo and have a clean life. Kaya natin yan, kabayan.

At higit sa lahat, ang pagbabago ng puso ang higit nating kailangan. Magbago man ang estado natin sa buhay, umangat man tayo kumpara sa ating mga kasamahan, makamit man natin ang kapangyarihan, at magkamal man tayo ng limpak-limpak na salapi kung wala namang pagbabago ng puso at pagbabalik-loob sa Diyos, wala ring saysay ang mga ito. Hindi rin natin lubos na mararanasan ang sinasabing “Bagong Taon, bagong buhay”.

Ano ang bago sa Bagong Taon?

Bagong buhay, bagong pusong may pananalig sa Poong Maykapal na nagbibigay ng lahat ng ating pangangailangan di lamang ng ating kaligtasan.

Yan ang bago na dapat maganap at makamtan natin.