Domino Effect

Max Bringula (published in Abante ME Edition, 28 February 2011)

Nagsimula sa Ehipto, at pagkadaka’y sinundan ng Tunisia, at naulit sa Libya, Yemen at Bahrain, at nagtuloy-tuloy na.

Ang pag-aklas ng mamamayan ng Ehipto upang pababain ang kanilang liderato ay mistulang apoy na agad lumaganap sa magkakalapit-bansa sa Gitnang Silangan. Bawat isa’y hangarin ang pagbabago, higit na partisipasyon, at pantay na karapatan.

Mistulang domino-effect ang nangyari na lumikha ng manaka-nakang kaguluhan at pangamba sa mamamayan ng mga bansang nabanggit, at naglagay sa alanganin sa naroroong mga dayuha tulad ng OFWs, at ang pansamantalang pagkitil sa kapayapaan at kaayusan.

Hindi naman nakaligtas sa mapanuring mata at malikhaing isip ng media ang kaganapan. Ito ang uri ng balitang papatok sa publiko, sa TV man o sa peryodiko. Bagamat kaakibat ang responsibilidad ng paghahayag ng katotohanan nang walang pinapanigan, ang elemento ng “sensationalism” ay di pa rin lubusang maiaalis. Pagkat ito ang bumibenta, ika nga.

Yun nga lamang, marami ang naaapektuhan lalo na’t kung ika’y wala naman sa aktuwal na lugar ng pinangyarihan, at nanonood lamang o nakikinig kaya o nagbabasa. Pag-aalala ang iyong madarama, pati na ng pamilya’t kamag-anakan at kaibigan ng OFWs.

Bagama’t totoo na ang sitwasyon sa Libya sa ngayon ay nangangailangan na ng paglikas ng mga OFWs doon, hindi naman ganito ang kalagayan sa Yemen at Bahrain.

Gayunpaman, pinag-iingat pa rin ang mga kababayan natin sa nabanggit na lugar upang di madamay sa nagaganap na kaguluhan doon. Pinaalalahan sila na huwag makikisangkot sa internal o domestic problem ng bansang kanilang kinalalagyan.

Ayon sa aking nakausap na naninirahan sa Bahrain, maliit lamang daw na porsiyento ng populasyon ang kasama sa protestang nagaganap, at majority ay pro-government o pro-king na sumusuporta pa rin sa kasalukuyang monarchy head na si King Hamad bin Issa Al-Khalifa.

Sa huling kaganapan sa sitwasyon ng Bahrain, ipinag-utos na ng hari na pakawalan ang 308 prisoners na kabilang ang 23 Shi’ites na sinasabing nanguna sa protestang naganap noong nakaraang Biyernes.

Masayang tinanggap ng oposisyon ang aksiyong ito ng hari sa kanilang kahilingan na pakawalan ang mga bihag. Nauna na rito ang pagpayag ng hari ng pagsasagawa ng peaceful protests at dialogue with the opposition upang mapag-usapan at maisagawa ang nararapat na reforms.

Ang magandang development na ito ay ikinagalak din ng Amerika at ng Saudi Arabia. Matatandaang nasa Bahrain ang US Navy’s Fifth Fleet at ang Saudi Arabia naman ay strong supporter ng Kingdom of Bahrain.

Samantala, sinimulan ng ilikas ang mga OFWs sa Libya sanhi ng lumalalang kaguluhan doon kung saan sunod-sunod at malalaking demonstrations ang nagaganap para patalsikin si Muaffar Ghaddafi na mahigit ng apat-napung taong namumuno sa Libya. Bagama’t voluntary repatriation pa rin ang isinasagawa ng Pilipinas at di compulsory tulad ng isinasagawa ng ibang bansa sa kanilang mamamayan tulad ng Amerika, United Kingdom, Turkey at Egypt.

Ito ang inihayag ng Department of Foreign Affairs ng Pilipinas. May 26,000 na Pinoy na naninirahan at nagtratrabaho ngayon sa Libya.

Ang Yemen naman bagamat dumarami at lumalaki ang bilang ng nag-de-demonstrate ay wala pa namang Alert na ibinaba ang Department of Foreign Affairs para lumikas ang mga Pilipino roon.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Libangan ang Pagbabasa ng Abante ME Edition

Dito ho sa Saudi libangan na namin ang magbasa ng Abante at tulad ng mga kasamahan ko, malimit ay nadidismaya sa nilalaman ng diyaryo nyo. Sa totoo lang hindi ko na tinitingnan o binabasa ang headline nyo, diretso na agad ako sa sports, entertainment at leisures kasama na roon ang column nyo. Kaya nakakalungkot kapag may nababasa kaming tungkol sa politika na napaka-negative ng dating. Salamat dahil very informative ang karamihan sa mga sinusulat nyo tulad ng issue noong February 19 na napapanahon at nagbibigay aral sa tulad naming mga OFW. Salamat at pagpalain kayo ng Poong Maykapal. – a reader from Saudi Arabia

Mag-ingat sa mga Padala

Max Bringula (published in Abante ME Edition on 19 February 2011)

Nakakalungkot naman ang balitang pagbitay na gagawin sa tatlong Pilipino sa China, dalawang babae na may edad 32 at 38, at isang lalaki na may edad na 42, sa salang drug-trafficking.

Inihayag ng Department of Foreign Affairs (DFA) ng Pilipinas na ni-repaso muli ng Supreme People’s Court sa Beijing ang limang kaso ng mga Pilipino roon na nahatulan ng bitay sa korte ng Fujian at Guandong. Dalawa rito’y binigyan na lamang ng life imprisonment, subalit yung tatlo ay pinagtibay ang hatol na bitay sa pamamagitan ng lethal injection.

Gayunpaman, sinisikap pa rin ng gobyerno ng Pilipinas na mabago ang desisyong ito sa tatlong Pilipino. Nanawagan na rin ang ina ng isa sa bibitayin na si Sally Ordinario-Villanueva sa Pangulong Noynoy Aquino na masagip ang kanyang anak sa kamatayan.

Ayon sa ina nito na si Edith Ordinario, walang sala ang kanyang anak at biktima lamang ng drug syndicate.

Si Sally ay papunta sana sa China para mag-trabaho subalit sinamang-palad na mahulihan ng four kilograms ng heroin sa Xiamen, China noong 24 December 2008, dalawang taon na ang nakakalipas. Hindi niya inakala na ang bag na ipinakisuyo ng kanyang recruiter na dalhin at ibigay sa boss nito pagdating sa China ay may nakatago palang ipinagbabawal na gamot. Kumpiyansiya siya sa pagdala rito at walang iniisip kungdi ang makarating ng maayos sa lugar na kanyang pagtratrabauhan sana. Subalit huli na ang lahat, pagkat ang padala pala na iyon ang magpapahamak sa kaniya at magdadala sa kamatayan.

Kung matutuloy ang pagbitay kay Sally at sa dalawa pang Pinoy, kaawa-awa naman ang pamilyang kanilang maiiwan.

Upang di maranasan ang ganito, ating pinapa-alalahanan ang mga kababayan natin na mag-ingat sa mga nagpapadala lalo na kung di natin lubos na kilala. Suriin maigi kung ano ang laman at kung may mga epektos na nakasingit. Minsan sa pagnanais nating makatulong at sa ating ugaling di makatanggi, tayo’y napapahamak.

Ang mga Pilipino pa nama’y mahilig sa pagpapadala. Kapag may aalis pauwing Pilipinas, kung anu-anong ipapadala at ipakikisuyo na dalhin ng aalis. At ang pobreng OFW na di makatanggi ay siya namang nagdurusa kung papaano dadalhin ang halos sampung kilong padala lamang, samantalang siya ay di pa naihahanda ang dadalhin para sa pamilya.

Gayundin naman sa mga umaalis mula sa Pilipinas. Kaliwa’t kanan din ang pagpapadala ng pamilya ng mga OFW. At minsan kahit alam ng bawal tulad ng pork at religious items ay ipakikpag-sapalaran pa rin na dalhin sa pag-asang mailulusot ito.

Para sa ating proteksiyon at kapakanan, mas mainam na huwag ng tumanggap ng mga padala kung maaari. Maliban na lamang kung siguradong-sigurado tayo kung ano ang ating dadalhin na hindi natin ikapapahamak nang di maranasan ang sinapit ng limang Pilipinong ito na nagpunta sa China.

Sa kabilang banda, dapat talagang pag-igtingin ng pamahalaan ng Pilipinas ang pagsugpo sa sindikato ng bawal na gamot na ngayo’y malayang nakakapag-operate sa Pilipinas. Ang talamak na corruption sa parte ng militar at kapulisan, gayundin ang kawalan ng sapat na tauhan at mekanismo para bantayan ang malawak na baybayin ng karagatan ng Pilipinas ang isa sa dahilan kung bakit malayang nakakapasok ang mga sindikato sa Pilipinas galing sa ibang bansa.

Kaya nga’t tama ang naging desisyon ni Justice Secretary Laila de Lima na ipa-deport sa China ang limang Taiwanese na kanilang nahuli na walang mga dokumento at kumpirmadong miyembro ng sindikato. Ang pagpapa-deport na ito’y para mapangalagaan ang Pilipinas na di imaging pugad ng drug syndicate.

Muli, isang paalala – mag-ingat sa mga padala sa atin nang hindi tayo mapahamak.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Komento sa “Makahiya, Gamot sa mga Makakapal ang Mukha” (published on 14 February 2011)

Kuya Max, natumbok mo. Ang daming tatamaan sa birada mo. Ok ka, kaso baka makapal na nga ang kalyo sa mukha at di na kayang ipa-Vicky Belo. Ang daming 200 Fils na nauubos ko araw-araw kakabili ng Abante ME Edition. Titigil ako sa pagbili kung makita ko at mabasa sa diyaryo na si Gloria Macapagal-Arroyo ay hahatulan na ng kamatayan, este.. kulungan pala. – from Lito in Bahrain

OK na sana ang topic tungkol sa Makahiya kaso hinaluan na naman ng pulitika. Haay.. buhay! I was dismayed reading this article. – from a reader in KSA

“Filipino Flash” Donaire - Pinoy At His Best

Max Bringula (Abante ME Edition, 22 February 2011)

“Nakakabilib.. grabe ang husay ni Flash Donaire. Nangingisay pa ang kalaban nang bumagsak.”

Another Pacquiao in the making. Pinoy at his best.

Ilan lang ito sa maririnig mo mula sa mga nakapanood ng laban ng “Filipino Flash” Nonito Donaire sa defending WBC (World Boxing Council) at WBO (World Boxing Organization) Bantamweight Champion, ang Mexicano na si Fernando Montiel na ginanap noong Linggo, 20 February 2011, sa Mandalay Beach Resort, Las Vegas, Nevada, USA.

Umabot lamang ng 2 rounds ang laban taliwas sa inaakala ng marami na aabot ito sa anim o kaya’y sa ika-sampung round.

Sa natitirang 58 seconds sa ikalawang round ay tuluyang pinabagsak ni Donaire si Montiel sa pamamagitan ng isang malakas na suntok na kanyang pinakawalan mula sa kaliwang kamao at sinundan pa ng kanan nang ito’y bumagsak na.

Sinikap na bumangon ni Montiel ngunit muling bumagsak dahil sa pagkakahilo sa suntok na natamo. Sa hangaring makabawi, pilit na tumayo si Montiel at matapos tanungin ng referee kung kaya pa, ay itinuloy ang laban, subalit hindi na talaga nakayanan ni Montiel ang dalawang suntok na muling dumapo sa kaniya kung kaya’t itinigil na ng referee ang laban, hudyat ng pagwawagi ng Pinoy boxer bilang bagong WBC at WBO Bantamweight Champion.

Labis ang tuwa’t pasasalamat ni Donaire sa tagumpay na natamo. “Ibinigay ko ang lahat ng aking lakas sa labang ito, matiyak lamang ang panalong aking inaasam”, ang wika ni Donaire nang siya’y tanungin matapos ang laban.

Ayon kay Donaire, ang suntok na dumapo kay Montiel na nagpabagsak dito ay siya ng pinakamalakas na suntok na kanyang naibigay sa buong career niya sa boxing. Matatandaan na pinahanga rin niya ang mundo ng boxing nang pabagsakin niya si Wladimir Sidorenko noong Disyembre ng nakaraang taon sa ika-apat na round.

Samantala, nagbunyi ang mga Pilipino sa buong mundo sa tagumpay ni Donaire.
Ang kanyang panalo ay muling nagpatunay ng galing ng Pinoy sa larangan ng boxing at nakapagdagdag ng paghanga ng mundo sa husay ng Pinoy. May isa na namang titingalain na Pilipino tulad ng paghangang tinatamo ni Manny Pacquiao, ang tinaguriang “the world’s greatest boxer”at ng world sensation and international star na si Charice Pempengco.

Sandaling nalimot ng Pinoy ang problemang nararanasan at mga kontrobersiyang kinasusuungan ng Pilipinas tulad ng corruption, carnapping, drug trafficking, at marami pa.

Ang mga ganitong balita ay patunay na mayroon pa rin namang magagandang nagaganap sa Pilipinas. Nawa’y ang tagumpay ni Donaire at ng bawat Pilipino sa iba’t ibang larangan ay magbigay insipirasyon sa ating bayan at sa darating pang henerasyon.

Salamat sa’yo Nonito Donaire. Ipagbunyi ang husay mo.

Mabuhay ang Pilipino!

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Komento sa “Mag-ingat sa mga Padala” (published on 19 February 2011)

Nabasa ko po ang inyong column tungkol sa mga padala. Ang sa akin lang, dapat sa airport pa lang sa Pilipinas ay made-detect na sana yon (ang drugs). Ang tanong, bakit nakalusot pa sa atin? – from Nap of Riyadh, KSA

Sir Max, nabasa ko column mo tungkol sa pakikipadala. Tama ka, kung di tanga ang nagdala di siya mapapahamak, at di ako maniwala na di niya alam ang kanilang dala. Yun ay alibi na lang. Kasi nangyari po ito sa akin nang ako po ay nasa airport ng Kuwait naghihintay ng connecting flight to Bahrain. Meron pong dalawang taong lumapit sa akin, isang dayuhan at isang kababayan nating babae. Nakangiti siyang lumapit sa akin at sabi, “hello, kabayan. Saan ang punta mo?” Sabi ko, “sa Bahrain”. “Pwede ko bang ipadala sa’yo itong maliit na kahon?” Sabi ko, “Bakit, kilala ba kita?” Sabi niya, “hindi, pero pag dinala mo ito, bibigyan kita ng 100 Dinar. Tumanggi ako at di niya ako napilit. Kung dinala ko yun, malamang na di ko matatapos ang aking kontrata. Sa ngayon, anim na buwan na lang at makakasama ko na ang aking pamilya.” – from Divine Grace Callejas of Bahrain

Azkals, May Paglalagyan

Max Bringula (published in Abante ME Edition on 19 February 2011)

Azkals may paglalagyan. Hindi sa malaking kawan o sa sikmura ng mga tomador at tanggero dahil hindi ang asong kalye o “askal” na siyang paboritong gawing pulutan ng mga manginginom ang aking tinutukoy, kungdi ang magaling at sikat ngayong Football Team ng Pilipinas.

Bagamat hango naman talaga sa salitang “askal” ang kanilang pangalan na tumutukoy sa mga asong-kalye o street dogs na pagala-gala sa kalsada. Marahil dahil sa “mass appeal” ng salitang “askal” na Pinoy na Pinoy ang dating kung kaya’t naibigan na rin ng grupo na sila’y tawaging Azkals. Iniba nga lamang ang i-spelling kung saan ang ikalawang letra na “s” ay ginawang “z” para may originality pa rin. Maganda rin naman dahil mas lalong naging astig ang dating.

At tumingkad pa lalo ang pangalang Azkals at naging bukam-bibig sa Twitter at maging sa Facebook nang talunin ng grupo ang Vietnam na siyang defending Champion ng 2010 AFF Suzuki Cup. Isang malaking dagok sa manlalarong Vietcong ang pagkakatalo nila sa maliliksi at mahuhusay na manlalaro ng Pilipinas. At sa unang pagkakataon ay nakaabot ang Philippine Football Team sa knockout stage bagama’t di pinalad na makarating sa Finals dahil sa pagkakatalo sa Indonesia sa score na 2-0.

Gayunpaman, hindi dahilan ito upang panghinaan ng loob ang tinaguriag “RP Booters”, bagkus naging isang malaking inspirasyon sa kanila ang pagkakapanalo laban sa Vietcong at ang pagkakasama sa knockout stage. Naging hamon naman ang pagkakagapi sa kanila ng mga Indonesians upang paghusayin pa lalo ang mga susunod na laro.

At ito’y kanilang pinatunayan sa Qualifying Playoffs ng 2012 AFC Challenge Cup kung saan tinalo nila ang Mongolians sa score na 2-0 noong February 9, 2011 na ginanap sa Panaad Stadium ng Bacolod City. Salamat sa unang goal na galing kay Chieffy Calindog at sa ikalawang goal na mula naman kay Phil Younghusband.

Impressive ang pinakitang galing ng Azkals laban sa Mongolia at inaasahang uulitin nila ang performance na ito at hihigitan pa sa kanilang ikalawang sagupaan na gaganapin naman sa Mongolia sa susunod na buwan. Ngayon pa lamang ay puspusan na ang paghahandang kanilang ginagawa. Tutungo ang grupo sa Baguio (at marahil ay naroroon na sila sa oras na binabasa ninyo ito) upang doon mag-ensayo. Pinili nila ang Baguio dahil sa malamig na klima nito at nang sa gayo’y madali silang makaka-adopt sa malamig na temperatura ng Mongolia sakaling naroroon na sila sa kanilang ikalawang laro.

Sa ipinakikitang galing ng Azkals di malayong makapasok ito sa four-nation group stage level ng AFC. Ngayon ay may tatlo ng nakapasok, ang Myanmar, Palestine at Bangladesh. Sisikapin ng Pilipinas na maging ika-apat na bansa.

At upang maganap ito, ngayon higit na nararapat na suportahan ng gobyerno ang Philippine Football Team, di lamang ng moral support kungdi higit sa lahat sa pagkakaloob ng sapat na budget upang lalong mapahusay ang kanilang pagsasanay at maibigay ang sapat na pangangailangan sa oras ng kanilang laro sa loob at labas ng bansa.

Dito higit dapat inilalaan ang salapi ng bayan at hindi sa mga bulsa ng mga corrupt na politicians at militar.

Mas higit dapat na pag-ukulan ng pansin ang ganitong uri ng sports pagkat dito mas makaka-angat ang Pilipinas, maliban sa boxing, dahil di ito nangangailangan ng taas o tangkad di tulad ng basketball. Ang kailangan lamang ay liksi, galing at abiilidad.

Nawa’y di maglaho ang Football Fever na nagaganap ngayon sa Pilipinas sa pagkakawagi ng Azkals sa Vietnam at Mongolia. Nawa’y di ito maging ningas-kugon lamang kungdi ating suportahan all the way hanggang ang Pilipinas ay tanghaling kasing-husay ng mga bansang Japan, China, Brazil, Argentina, England, France, atbp. sa sports na football.

Hindi tayo nangangarap pagkat sadyang may paglalagyan ang Azkals.

Sa ngayon ay may 23 players ang Azkals na kinabibilangan nina Neil Etheridge, Rob Gier, Jerry Barbaso, Anton del Rosario, Roel Gener, James Younghusband, Simon Greatwich, Yanti Barsales, Phil Younghusband, Alexander Borromeo, Emelio Caligdong, Mark Ferrer, Rey Palmes, Jason de Jong, Nestorio Margarse, Christopher Camcam, Peter Jaugan, Eduard Sacapano, Ian Araneta, Joebel Bermejo, Jason Sabio, Ray Anthony Johnson, at Kristopher Relucio

Makahiya, Gamot sa Makakapal ang Mukha

by Max Bringula (published in Abante ME Edition on 14 February 2011)

May nabasa akong comment sa aking Facebook account na kung gagawing herbal medicine daw ang halamang Makahiya, maraming mapag-gagamitan nito. Hindi lang ng mga sakit sa pangangatawan, kungdi higit sa lahat gamot daw ito sa mga makakapal ang mukha.

Ako’y napangiti at napag-isip. Sa loob-loob ko, totoo nga. Malaki ang magagawa ng halamang Makahiya upang mahiya naman ang mga taong makakapal ang mukha. Lalo na sa atin.

Ang Makahiya ay isang uri ng halaman na makikita mo sa mga bukirin at parang na kapag iyong nasagi ang dahon ay agad itong titiklop na animo’y hiyang-hiya at di makatingin. Pilit ikukubli ang sarili. Sa Ingles, ito’y tinatawag na “touch me not” na siyang pinaghanguan ni Jose Rizal ng titulo ng kanyang nobela na Noli Me Tangere.

Kabaligtaran ito kung ihahalintulad sa mga taong makakapal ang mukha o yaong walang hiya, o “walanghiya” sabi nga ng iba. Mga taong walang-pakundangan sa kapakanan ng iba makamit lamang ang ibig at masunod ang gusto.

Ganito ang nagaganap sa atin. Marahil hindi lingid sa ating kaalaman ang mga sanga-sangang corruption sa ating bayan. Mula sa pinaka-mataas na nanunungkulan sa Pilipinas, sa gobyerno man o sa pribadong kumpanya, hanggang sa pinaka-mababang empleyado o tauhan nito.

Nakaka-dismaya ang nababalitaan natin ngayon at naglalabasan tungkol sa corruption na nangyari at nangyayari sa loob ng militar o sa sangay ng Armed Forces of the Philippines (AFP) na humantong pa sa pagpapatiwakal ng dating AFP Chief Angelo Reyes.

Nakakalula ang halagang binabanggit na kinurakot ng mga taong dapat sana ay nangangalaga sa bayan. Subalit mga lobo pala na handa kang sakmalin ng buhay.

Kunsabagay, ang imbestigasyong nagaganap sa Senado ay patungkol sa anomaliyang naganap sa pamunuan ng dating Pangulong Gloria Macapagal-Arroyo na ngayo’y House Representative sa kanyang distrito sa Pampanga. Sinasabi ng iba na imposibleng walang nalalaman ang dating Commander In-Chief sa kanyang tauhan lalo na nga’t ang involve ay ang mga Heneral nito. Bagama’t di pa naman tapos ang imbestigasyon at hindi pa nakakasuhan ang sinasabing mga salarin.

Subalit “kung ano raw ang puno, siyang bunga”. Kasabihang di mapapasubalian na siyang nagaganap kadalasan. Mga taong dahil nasa katungkulan ay walang hiya na gumawa ng mga katiwalian mapayaman lamang ang sarili at matiyak ang ganansiya. Mga ganid at hayok sa salapi at kapangyarihan.

Nagpapasasa habang ang pobreng Juan Dela Cruz ay isang kahig, isang tuka ang kalagayan sa buhay.

Nagliliwaliw habang libo-libong mga mamamayan natin ang lumalabas ng bansa araw-araw upang makipag-sapalaran sa ibang lupain at mapabilang sa dumaraming OFW. Sumusuong sa lugar na di alam ang kahihinatnan dahil lamang sa hangaring guminhawa ang buhay. Nagtitiis, nagtitiyaga samantalang ang iba’y nagtatamasa ng limpak-limpak na salapi mula sa kaban ng bayan.

Mahiya nga kayo! Dapat nga kayong umimon ng Makahiya nang kayo’y mahimasmasan at umimpis ang pagmumukha na ang iba’y may kalyo na yata at makapal pa sa adobe. Hindi na tinatablan ng hiya o kung may natitira pa nga bang kahit katiting na hiya.

Batu-bato sa langit, ang tamaa’y mabukulan sana nang tumino at makapag-isip-isip.

Nawa’y ang pagkamatay ng dating AFP Chief Angelo Reyes ay makapag-bukas ng diwa sa marami nating mga kababayan lalo na yaong mga nasa katungkulan na ang gawang masama ay kailanma’y di magtatagumpay. Pilit man itong ikubli at ipakatagu-tago ay mangangamoy pa rin at mabubuyangyang.

Ito’y tulad ng isang self-guided missile na kapag iyong pinakawalan ay tiyak tutugisin nito ang target gaano man ito kalayo o magpakatagu-tago.

Ilang Reyes pa ba ang magbubuwis ng buhay para lamang tayo matauhan? Ilang Makahiya pa ba ang dapat inumin ng mga makakapal ang mukha?

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Huwag Nagpapaniwala sa mga Text na Natatanggap

Sir Max, lagi po akong nakakatanggap ng text message na nanalo raw po ang SIM card number ko. At ngayon nga’y may natanggap akong text na nanalo raw ako ng 860,000 Pesos from Central Bank of the Philippines at may DTI Permit No. na 8912 of 2011. Ang pangalan ng nag-send ay Sec. Joey C. Gonzales mula sa celfon number na 00-63-9488228745, at ang sabi tumawag raw ako para i-claim ang aking panalo. Ano po ang dapat kong gawin? - from Vangie in Bahrain

Hi Vangie, walang kaduda-duda na ito’y isang hoax o panloloko lamang. Kaya huwag magpapaniwala sa mga ganyang modus operandi. Kung tunay ka ngang nanalo ay bakit ikaw pa ang kailangang tumawag? Pagkat sa oras na tawagan mo sila, tiyak na mabibitag ka na at sisimulan ng hingan ng pera o kaya’y magpapasa ng load. Kung kaya’t i-delete mo na agad ang ganyang mga text message at huwag nang pag-aksiyahan pa ng oras. - Max

Violet Team – 2nd Industrial, Wagi sa 3rd DBD-EP Basketball Tournament

Ang Violet Team – 2nd Industrial na siyang tinanghal na Kampeon sa nasabing liga. Ang Green Team – Kanlungan kasama ang kanilang Coach na si Randy Castro. Ang Mythical Five kasama ang MVP na si Ronan Mandia ng Violet Team Ang MVP na si Ronan Mandia ng Violet Team Ang Red Team – Ramada na 4th Placer sa naganap na Liga.
Ang White-Yellow Team – The Flexibol Ang Violet Team – 2nd Industrial Ang Committee ng 3rd DBD-EP Basketball Tournament

Max Bringula (published in Abante ME Edition on 31 January 2011)

Matagumpay na natapos ang ikatlong taon ng Day by Day – Eastern Province Basketball Tournament noong Biyernes, 21 January 2011, na ginanap sa Al Gosaibi Hotel Sports Complex, Alkhobar kung saan tinanghal na kampeon ang Violet Team – 2nd Industrial.

Sa score na 70-68 laban sa White-Yellow Team, tuluyang tinuldukan ng Violet Team ang pagnanais ng katunggali na maangkin ang prestihiyosong tropeo sa nasabing liga. Ipinakita ng nagwaging koponan ang kanilang angking galing na sa simula pa lamang ay hinangaan na ng marami. Taglay ang liksi at kakaibang istratehiya, sadyang kagila-gilalas ang ipinamalas na laro ng Violet Team upang magapi ang kalaban at maangkin ang kampeonado sa 3rd DBD-EP Basketball Tournament.

Higit ding nakatulong na ang karamihan sa manlalaro nito ay pulos matatangkad na kinabibilangan nina - Ronald Manalastas, Ronan Mandia, Arnel Merjes, Oca Simanca, Erwin Quetua, Bernard Migano, Eddie Manday, Cleto Palomar, Richard Cebuc, Richard Ables, Michael Nacino, Jacinto Abucejo, Joven Buemia, Nonie Ensenas, Jorey Laurente, Joel Umali, Lance Mindasao, Mac Lontoc, Edgar Lunca at Bijusu Venias (Playing Coach).

Bago ang championship round ay nagkaroon muna ng knock-out games sa pagitan ng Ramada (Red Team) versus White-Yellow Team kung saan nanalo ang huli upang siyang maging contender sa championship, at ang Prime Source (Gray-White Team) versus Violet Team – 2nd Industrial na pinanalunan naman ng huli. Naging kapana-panabik ang nabanggit na mga laro kung saan ay ramdam na ramdam ang pressure at excitement di lamang sa mga manlalaro kungdi maging sa mga manonood.

Lalong umigting ang excitement nang magtapat na ang dalawang contender. Ang matinding lamig ng panahon ay di dahilan upang mamaluktot sa lamig ang manlalaro at manonood bagkus lalong pang uminit ang paligid sa umaatikabong pukpukan ng dalawang koponan. Naunang naka-puntos ang White-Yellow Team (The Flexibol) sa pamamagitan ng pagka-buslo ng bola ni Marnie Ambrocio (Jersey No. 16) at lumamang hanggang matapos ang 1st Half. Naalarma ang koponan ng Violet Team na siyang dahilan upang mag-iba sila ng istratehiya hanggang nakahabol at tumabla sa unang pagkakataon sa score na 30-30. Ngunit sa huli, di sapat ang ipinakitang gilas ng White-Yellow Team sa naglalakihang manlalaro ng kalaban upang magapi nito ang katunggali at maiuwi ang tropeo ng kampeonado.

Sa Awarding Ceremony na ginanap pagkatapos ng laro ay naging masaya ang lahat sa mga nagwagi at pinarangalan. Itinanghal na Pinakamahusay na Manlalaro o MVP si Ronan Mandia ng Violet Team. Napili namang Mythical Five sina Rhey Deinla (White-Yellow Team), Lyndon Santos (Red Team–Ramada), Jerome Lazaro (White-Gray Team), Arnel Merjes at Ronald Manalastas na pawang mula sa kampeong Violet Team.

Hinirang naman na Most Disciplined Player si Johnny Juguilon ng White-Yellow Team Flexibol, ang koponang nanalo rin bilang Best in Uniform.

Narito ang ranking ng mga nanalong koponan:

1st Placer – Violet Team – 2nd Industrial
2nd Placer – White-Yellow Team - The Flexibol
3rd Placer – Grey-White Team – Prime Source
4th Placer – Red Team – Ramada

Pitong koponan ang lumahok kasama na ang Violet Team. Ang iba pang mga manlalaro ay ang mga sumusunod:

White-Yellow Team: Renren Vitug, Marnie Ambrocio, Jojit Dela Cruz, Dodong Dumale, Johnny Juguilon, Rhey Deinla, Jayvee Picsay, Zaldy Santilisis, Erwin Congreso at Jeremy Buctil (Coach).

Grey-White Team: Jerome Lazaro, Dave Valderama, Anastacio Sena, Gener Nicanor, Ermelito Dita, Jon Lazaro, Emil Aguasin, Jessie Santos, Ruel Ubaldo at Raul Ubaldo (Coach).

Red Team–Ramada: Jon Jon Male, Lyndon Santos, Mark Prado, Ben Hipolito, Sonny Montilla, Nesmer Acopiado, Dondon Floralde, Noel Galzoto, Alvin De Jesus, Jay-R Alambra, Irvin Orte at Alex Ventura (Playing Coach).

Green Team–Kanlungan: Mike Soniega, Caloy Soniega, Harold Bartolaba, Lito Arevalo, Romel Cristobal, Charlie Collado, Michael Santos, Raymond Teodocio,Peter Seria, Jojo Araw Araw, Jerico Garcia, Bobot Gilles at Randy Castro (Coach).

Blue Team–Pag-Ibig: Edgar Tello, John Philip Jayme, Billy Bangaan, Iane Andrade, Dennis Mariano, Jayson Delemnios, Mikee Riboroso, Nelson Torreno,
Mario Reyes, Tata Garbajosa, Allen De Dios at Mark Santana (Playing Coach).

White-Violet Team – Qatif: Prisco, Eddie, Abby, Joel, Atong at Derek Grajera (Playing Coach).

Ang Committee sa taong ito ay binubuo nina Ricky Dioso, Rogel Noble, Mario Reyes, Alex Ventura, Andy Kymko at Ador Racelis, at sa pangkalahatang pamamahala ni Melchor Navarra. Ipinapaabot ng pamunuan ng DBD-EP Basketball Tournament ang pasasalamat sa mga sumusunod na indibiduwal - Bobot Cortez ng DBD-Pag-ibig, Erwin Luna ng DBD-Kanlungan at Danny Ruedas ng DBD-EP.

Passport Applicants with Appointments Sisimulan sa Darating na EOW

Max Bringula (published in Abante ME Edition on 27 January 2011)

Kaalinsabay ng pagpapatupad ng Appointment System sa passport renewal, sisimulan na ang unang batch nito sa darating na Embassy On-Wheels (EOW) sa Huwebes at Biyernes, 27 at 28 January 2011 sa Alkhobar, Saudi Arabia.

Ang unang apat-na-raang (400) aplikante na may appointment ang siyang uunahin sa Huwebes, at ang ika-401 hanggang 600 naman sa Biyernes. Hinihilingan ng Philippine Embassy ang bawat aplikante na tiyaking tingnan muna ang listahan ng naka-iskedyul sa Appointment sa website ng Embassy ang http://www.philembassy-riyadh.org/ bago tumungo sa IPSA (International Philippine School in Alkhobar) pagkat yun lamang nasa listahan ang ia-accommodate para sa passport renewal.

Tiyakin din na magdala ng SR 240 na siyang fee para sa e-Passport. Samantala, hindi na kailangang magdala pa ng litrato tulad ng dati pagkat direkta nang kukunan ang aplikante kasabay ng pag-encode ng kanyang inpormasyon sa passport.

Para naman doon sa nagpalista sa Appointment sa pamamagitan ng eMail at SMS subalit di nakasama sa listahan ay automatic na kasama sa susunod na EOW sa February 2011. Kung nagmamadali naman, maaaring magtungo ang aplikante sa Philippine Embassy sa Riyadh upang i-process ang kanilang e-Passport doon. Maaari ring mag-apply ng extension ng validity ng passport sa halip na renewal kung kakailanganin agad ang passport sanhi ng agarang pag-alis o pagbabakasyon.

Ipinapaalam din na may mga bagong passports na ire-release para sa mga aplikante sa Eastern Province sa darating na EOW. Tiyakin lamang na dalhin ang original receipt ng binayaran at ang dati o lumang passport na ni-renew para mai-release ang bagong passport. Maaaring ipakuha sa iba ang passport kung di personal na makakapunta, subalit dapat bigyan ng Authorization Letter ang representative na kukuha.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Passport Renewal

Hi po, Sir Max. Tanong ko lang po kung wala bang problema kung sa March ko pa ipapa-renew ang aking passport dahil sa June 15 pa naman ang expiration nito. – from a reader in Bahrain

Kabayan, wala namang problema kahit lagpas pa ng June 15 mo ipa-renew ang iyong passport. Yung nga lamang dapat ay laging valid ang passport natin para sa oras na kakailanganin natin ito ay valid siya at magagamit agad. Advise ko lang na huwag mo ng patatagalin pa bago i-renew ang iyong passport. Puwedeng lumagpas ng isang buwan o mahigit bago mo i-renew o kaya’y pwede rin namang bago pa ito mag-expire ay ma-renew mo na. - Max

Traffic Violations

Sir Max, pasok po bas a amnesty ang mga huli sa trapiko (o traffic violations). Tapos na po ang contract ko pero ayaw bayaran ng sponsor ko yung renewal ng Iqama ko. Pinabayaan po niya ako. – Eric Quinte ng Riyadh, KSA

Hi Eric, hindi kasama sa binibigyan ng amnesty yung mga violation sa trapiko. Gayunpaman, maaari mong i-report sa Embahada ang pag-abandon sa’yo ng iyong employer nang sa gayon ay matulungan ka nila na maka-uwi. Susubukan nila na kontakin ang iyong employer upang pananagutin sa mga benepisyo mo. At kung hindi na talaga nila makontak ay matulungan ka ng Embahada sa kaso mo. Maaari mo silang tawagan sa numerong 4821802 / 4823559 / 4880835 / 4820507.