Sunday, November 15, 2009

Bumuhos ng Pagmamahal sa Burol at Libing ni Madame Aquino


Max Bringula (Abante ME Edition, 07 August 2009)

Hindi ko mapigilang maluha habang pinapanood ko sa TV ang libing ng dating Pangulong Corazon C. Aquino. Hindi ko alam kung ako ba’y nagiging emosyonal o labis lamang akong na-touched sa aking namalas kung papaano ipinakita ng sambayanang Pilipino ang kanilang labis-labis na pagmamahal sa yumaong Pangulo.

Hindi nila inalintana ang manaka-nakang pag-ulan o maging ang init ng araw, masilayan lamang ang pinakamamahal na Pangulo. Ang iba’y may tangang payong upang di mabasa at ang iba’y isinama pa ang mga anak upang marahil ipakita sa kanila kung gaano ka-dakila si Tita Cory sa mata ng mga Pilipino.

Umuulan ng confetti sa bawat dinaraanan ng sasakyan, nagpapalipad ng dilaw na lobo, at ang Sandatahang Lakas ng Pilipinas ay nagbigay naman ng gun salute bilang paggalang at pagbibigay-pugay sa namayapang Pangulo.

Ang mga tao’y di magkamayaw sa pagtaas ng kamay na naka-Laban sign, at sumisigaw ng “Cory, Cory, Cory” at ang iba’y pumapalakpak, nagpupugay at gumagalang sa Pangulo, habang ang awiting tulad ng “Magkaisa” at “Bayan Ko” ay patuloy na pumapailanlang sa buong kapaligiran.

At sa bawat daraanan ay makikita mo ang mga nakasulat na “Maraming Salamat President Cory”, “We Love You, Tita Cory”, “Cory, Hindi Ka Nag-iisa”, at marami pang iba na nagpapahayag ng kanilang pagmamahal.

Mistulang naulit ang ganitong kaganapan noong libing naman ni Ninoy Aquino dalawamput-anim na taon na ang nakalipas noong 31 August 1983.

Ang pagkakaiba lamang ng libing ni Ninoy sa libing ni Cory ngayon ay ang uri ng damdaming nagbuklod sa tao upang makiisa sa buong sambayanang Pilipino. Sa libing ni Ninoy, galit sa rehimeng Marcos ang nagbunsod sa taong-bayan na lumabas at makibahagi, subalit ngayon, ang pagmamahal sa simpleng maybahay ni Ninoy na naging daan upang maibalik ang demokrasiya sa Pilipinas at ang katapatan at kalinisan ng puso nito ang dahilan ng kanilang pagtungo sa daan upang makiisa sa pagpupugay sa minamahal na Pangulo.

Ang pagmamahal kay Ginang Aquino ay nakita di lamang sa taong-bayan kungdi maging sa naging kaaway niya’t tumuligsa sa kanya noong siya’y nanunungkulan pa bilang Pangulo ng Piipinas. Dahil sa kababaang-loob ni Cory at pusong handang magpatawad, ngayon sila’y kaibigan niya na na nagmamahal at humahanga. Magagandang salita ang ngayo’y maririnig mo sa kanila.

Hindi lamang ang Pilipinas ang kumikilala sa kadakilaan ni Tita Cory, kungdi buong mundo. Pulos papuri at magagandang salita ang ibinibigay ng mga liderato ng iba’t ibang bansa. Dahil dito taas-noo nating masasabi na may ngiti sa labi ang katagang “Ako’y Pinoy, and I’m proud to be one”.

Nawa’y ang kaganapang ating nasasaksihan ay magdulot ng pagbabago sa ating bayan. Nawa’y maging daan ito upang mabuksan ang isipan at maantig ang kalooban ng liderato ng ating kasalukuyang pamahalaan, at maging instrumento nawa ito upang patuloy na magkaisa ang bawat Pilipino tungo sa pag-unlad ng ating bayan.

Minsan ko ng nabanggit sa ating “Kasabihang-Pinoy” na “kung ano ang ating itinanim ay siya nating aanihin.” Pagmamahal at katapatan ng paglilingkod sa bayan ang ipinunla ni Madame Aquino sa tao, kung kaya’t pagmamahal din ang kanyang inaani ngayon mula sa taong-bayan. Subalit kung kaapihan, pandaraya at pag-abuso sa kapangyarihan ang ibinigay mo’t ipinakita, natitiyak kong galit ang aanihin ninuman.

Isa nating mambabasa na si Pedro Chavez ang nag-text sa atin. Ganito ang sinabi nya, “...taong bayan ang lumabas para makiramay kay Mrs. Aquino… pag namatay kaya si Mrs. Arroyo, marami rin kaya ang lalabas para makiramay? Umhmm... palagay ko, wala...”

This text speaks for itself

Nais kong ibahagi rin ang maikling tulang ito na ipinadala sa atin ng isa nating mambabasa na si Mary Ann Mallari:

Ang Tita Cory Ko
Napakabuti mo, O Tita ko
Lahat ng iyong kababayan napahanga mo
Sa People’s Power, Pilipino’y pinagkaisa mo
Sa katapangan mo, bilib kami sa'yo.

Tunay nga na madasalin itong Tita ko
Sa lahat ng gawa nya, ipinapasa-Diyos nya ito
Kahit buhay niya'y ibinabalik ng buong puso
Salamat sa Panginoon sa buhay mo
Madame Cory Aquino.


Samantala, tuluyan ng inilagak ang labi ni Ginang Aquino, ang People’s President, sa tabi ng puntod ng bayaning Benigno ‘Ninoy’ Aquino sa Manila Memorial Park noong Miyerkules, 05 August 2009.

(For comments and reactions, please eMail at maxbringula@yahoo.com or send text message only on 00-966-502319535)

OFWs Nagbigay-Pugay sa Dating Pangulong Aquino

Max Bringula (Abante ME Edition, 06 Oct 2009)

Bumuhos ang pakikiramay at simpatiya sa pagpanaw ng dating Pangulong Corazon C. Aquino na mas kilala sa taguring na “Tita Cory”.

Buong bansa ay nagkaisa, mahirap, mayaman, bata’t matanda, mga magkabilang-kampo sa pulitika, mga dating magka-away na naging magkaibigan, at marami pa mula sa iba’t ibang antas at estado ng lipunan. Mamamalas at madarama mo ang mataas na respeto na ibinibigay ng mga nagmamahal sa kinikilalang dakilang Ina ng sambayanang Pilipino.

Ito’y makikita di lamang sa ating bayan kungdi maging sa buong mundo. “She is an inspiration”, ang wika ni US President Barack Obama. “A woman of deep and unwavering faith” na siya namang inihayag ni Pope Benedict XVI.

“Mrs. Aquino will be remembered as a beacon of democracy not only in the Philippines but also around the world”, ang binitawang pananalita ng UN Secretary General na si Ban Ki-moon.

Hindi maikakaila ang malaking kontribusyon ni Madame Corazon C. Aquino sa pagtataguyod ng demokrasiya sa Pilipinas na siyang naging inspirasyon din ng ibang mga bansa na nagnanais ng kalayaan sa tahimik at maka-Diyos na paraan. Ang Peoples Power na nagluklok kay Tita Cory bilang kauna-unahang babaing Pangulo ng Pilipinas ay kinilala sa buong mundo na pinakamapayapang rebolusyon na naganap sa kasaysayan. Si Ginang Aquino ang kinikila ngayong “icon of democracy”.

Ang mga OFWs sa iba’t ibang bahagi ng mundo ay nagbigay at nagpakita rin ng kanilang paggalang sa namayapang Pangulo. Nagdagsaan ang mga text messages, eMails at mga panulat sa iba’t ibang blogs sa cyberspace na nagsasaad ng kanilang pasasalamat at mga papuri bilang pagbibigay-pugay sa dating Pangulong Corazon C. Aquino.

Ang embahada at konsulada ng Pilipinas sa iba’t ibang bahagi ng mundo ay nagdaos din ng necrological services para sa pumanaw na Pangulo kung saan di lamang mga opisyales ng pamahalaan ang dumalo kungdi maging ng mga OFWs mismo.

Dito sa Eastern Province, nagpahayag din ng kanilang saloobin ang mga manggagawang Pilipino sa kinikilalang simbolo ng demokrasiya, tulad ng mga sumusunod:

“Sa aking pananaw, di maikakaila na utang natin kay dating Pangulong Cory Aquino ang tunay na demokrasya. Bukod tangi ang kanyang kakayahan bilang isang lider ng bansa. Isa siyang tunay na modelo at ulirang ina sa ating mga Pilipino.” – Leo Cefre, Current President of Philippine Professional Organization, EPKSA and an employee of Al-Majdouie Group

“Ako at ang aking grupo dito sa Kaharian ng Saudi Arabia ay buong pusong nakikisimpatya at nakikidalamhati sa pamilyang naiwan ni dating Pangulo na si Ginang Cory Aquino. Pumanaw man si Cory na kasama na ni Ninoy ngayon, ang kanyang mga nagawang kabutihan bilang Pangulo ng Pilipinas at ang mga alaala niya ay nakaukit na sa puso ng bawat isa at ng sambayanag Pilipino na hindi makakalimutan kahit saan man siya naroroon ngayon.” – George Palencia, a Bagong Bayani Awardee and an employee of Showtime Arabia, Ltd.

“Madam Cory Aquino is one of the great leaders of the Philippines. From a plain housewife who unites the opposition to make a stand against the powerful former President Ferdinand Marcos who has ruled the Philippines for two decades, Cory immortalizes herself into a kind of a woman our nation will idolize forever”. – Jaime King, a Bagong Bayani Awardee and an employee of Al Suwaidi Group, Jubail

“She will be remembered for her extraordinary courageous commitment to the freedom of the Filipino people and for her contribution to the building of just and cohesive political order in her beloved homeland.” – Mary Jane P. Tupaz, a Bagong Bayani Awardee and Nursing Directress of Mohammad Dossary Hospital

“She is the most loved leader. She is best remembered as the Woman who gave us the Freedom. A loving mother, an honest and sincere leader.” – Roi Alojado, AFCSCOM Past Overall Chairman and employee of Saudi Iron and Steel Company, Jubail

“Madame President Cory is the epitome of how a leader of a nation should be, tough when it comes to sticking to principles and the rule of law, and honest in her dealings with matters of the state and governance. I hope and pray that her legacy of honesty, dedication to duty, and compassion for others will move our people and political leaders to change their attitude leading to a better Philippines - a nation and people united in peace, and working together towards progress and prosperity.” – Andy Reyes in Abqaiq, Overall Chairman of Saudi Aramco Chess Group

“Madame President, naranasan po namin ang inyong katapangan sa panahon ng EDSA revolution. Habang nagsisilbi kayo sa ating bansa, nakita ang pagbabago ng ating kapaligiran at pagsulong ng ekonomiya. Nakatapos po kami dahil sa inyong mga tulong bilang isang iskolar ng gobyerno. Nakapagtrabaho po kami dahil sa programa ng gobyerno at kagawaran ng inyong administrasyon. Ikinararangal po namin kayo bilang ina ng bansang
Pilipinas.” – Archie Ortega, empleyado ng Arab Paper Mfg. Co. Ltd., Dammam

“Bilang pakiki-isa at pakikiramay sa pagyao ng ating mahal na si Cory Aquino at respeto na rin kahit tayo ay malayo sa Pilipinas ay nagsuot ako ng dilaw ng damit at naglagay ng barandillas na dilaw sa aking sasakyan.” – Larry Estaq, empleyado ng Mohd Bukannan Ltd.

Ang mga staff ng ARAMCO Commissary ay nagpadala naman sa atin ng kanilang litrato na kung saan makikita ang dilaw na tela na nakalagay sa kanilang mga braso at dibdib bilang pakikipag-isa sa sambayanang Pilipino sa pagpupugay sa dating Pangulong Corazon C. Aquino.

Mula naman kay Chito Camcam (an employee of Unicoil-Jubail) ang sulat na ito:
To Madame Cory Aquino -
More than just an “icon”, I thank you so much for letting yourself become God’s instrument for peace, freedom, and democracy in our country. I salute your courage as you arose to the occasion during the historic People Power Revolution of 1986 to ousting the Marcos’ regime. I personally consider your courage as an act of faith in the Almighty – letting all Filipinos (and the whole world) know that whoever desires change should stand for what he believes according to the Word of God. He should never be quiet, but must express himself in a peaceful manner. He must not be discouraged but should persevere against all odds.

Your good deeds, selfless service, and high hopes for our country are not only worth writing for inspiration, but indeed, worth sharing so others can emulate… now and the coming generation.
Maraming, maraming salamat po, Madame President!

(For comments and reactions, please eMail at maxbringula@yahoo.com or send text message only on 00-966-502319535)

OAV Registration Malapit Nang Matapos

Max Bringula (Abante ME Edition, 05 August 2009)

Itong buwan na lamang ng Agosto ng taong kasalukuyan ang nalalabi upang makapag-rehistro ang mga OFWs sa iba’t ibang bahagi ng mundo para sa Overseas Absentee Voting upang makaboto sa darating na Halalan sa Mayo 2010.

August 31 ang ibinigay ng COMELEC na deadline o pagtatapos ng pagre-rehistro para sa OAV.

Kung kaya’t ating hinihimok ang mga kasamang OFWs na hindi pa nakakapag-rehistro na tayo’y humayo na at gamitin ang karapatang makaboto at makapili ng karapat-dapat na liderato ng ating bansa.

Sa kasalukuyan, patuloy na idinaraos ang OAV registration sa Embahada’t Konsulada ng Pilipinas sa iba’t ibang bahagi ng mundo. Dito sa Saudi Arabia, ang registration ay ginaganap araw-araw sa Riyadh at Jeddah at sa Eastern Province naman ay limang araw sa isang Linggo tuwing Lunes hanggang Biyernes.

Sa huling report ng COMELEC na may petsang 22 July 2009, nasa ika-apat na puwesto ang Saudi Arabia sa buong mundo sa talaan ng mga nagsipag-rehistro sa OAV. Nanguna sa talaan ang Estados Unidos na may total registrants na 15,307, sinundan ng China na may 16,307, kasunod ang United Arab Emirates na may 10,646, Kingdom of Saudi Arabia – 8,431, Singapore – 6,300, Taiwan – 5,822, Canada – 5,434, United Kingdom – 4,714, Japan – 4,656, at Italy – 3,740.

Inaasahang madaragdagan ang bilang ng registrants sa Saudi Arabia sa mga darating na araw habang papalapit ang August 31 kung saan tinatayang daragsa ang mga magre-rehistro lalo na sa mga huling Linggo ng Agosto. Ugali na ng mga Pinoy ang last minute na pagkilos sa bawat mga mahahalagang gawain tulad nitong OAV Registration.

Huwag ng hintayin pa ang huling araw ng Agosto para tayo magpa-rehistro. Magtungo na sa mga registration centers sa inyong lugar. Hikayatin ang bawat isa – mga kaibigan, kasama sa trabaho at buong pamilya na gamitin ang karapatang bumoto. Sikaping huwag maabutan ng pagsasara ng registration upang maiwasan ang pakikipag-gitgitan sa tinatayang pagbuhos ng tao sa mga huling araw.

************
Mga Karagdagang Sagot at Tanong sa OAV

Sa nakaraan nating artikulo sa Tinig sa Disyerto noong Hulyo 30, ang “Mga Iba’t Ibang Katanungan”, marami mga tanong tayong sinagot patungkol sa nagaganap na OAV Registration. Muli nating paglalaanan ang iba pang katanungan at pagbibigay karagdagan sa ating sagot sa nakaraan.

Ang mga sumusunod na tanong at sagot ay hango sa ipinalabas ng POLO-ERO na FAQ’s (Frequently-Asked Questions) nang nagsisimula pa lang ang registration noong February 2009.

Tanong: (nasagot na ito ng nakaraan)
"Puwede ba akong mag-register dito pero sa Pilipinas na ako makakaboto dahil uwi na po ako sa October? (OFW-Bahrain)

Karagdagang Kasagutan:
Ang OFW na ibig umuwi at hindi na madaratnan ang registration sa Pilipinas subalit nagnanais na bumoto sa May 2010, puwede kang magpa-rehistro dito sa Alkhobar (o saan mang lugar sa labas ng bansa ikaw naroroon) bago ka umuwi. Pagdating sa Pilipinas ay magsadya agad sa COMELEC. Mag-fill-up ng form OAVF No. 1B "Letter-Request for Transfer of Registration Record". Ilagay sa form kong saang post o distrito/barangay mo gustong mag-rehistro.

(Salamat kay Olan Maala sa karagdagang kasagutan na ito).

Tanong: Rehistradong botante na ako sa Pilipinas, at aktibo akong bumoboto sa mga nakaraang eleksyon, kailangan ko pa bang magparehistro dito sa Saudi para makaboto ako sa 2010 National Elections?

Sagot: Kung kayo ay rehistradong botante sa Pilipinas at aktibo kayong bumoboto nitong mga nagdaang eleksyon, sasailalim kayo sa "Certification" upang mapabilang sa talaan ng mga Overseas Absentee Voters.

Pero kung di kayo nakaboto ng dalawang magkasunod na eleksyon, kayo marahil ay naalis na sa talaan ng mga rehistradong botante sa Pilipinas at kailangan ninyong magparehistrong muli, bilang Overseas Absentee Voter.

Tanong: Ipapadala ba ulit dito sa Saudi ang Voter's I.D. ko?

Sagot: Hindi. Ang mga Voter's I.D. ay ipapadala ng COMELEC sa Philippine Address na isusulat ninyo sa Voter's I.D. Request form.

Tanong: Hindi pa ibinigay ang aking Voter's ID, hindi ba ako makakaboto sa 2010?

Sagot: Kahit wala kang Voter's ID, ikaw ay makakaboto kung ikaw ay kabilang sa talaan ng mga rehistradong Overseas Absentee Voters.

Tanong: Paano ko malalaman kung kabilang na ako sa talaan ng mga rehistradong Overseas Absentee Voters?

Sagot: Ang talaan ng mga rehistradong Overseas Absentee Voters ay matatagpuan sa website ng COMELEC (http://www.comelec.gov.ph/).

Tanong: May bayad ba ang pagpaparehistro bilang Overseas Absentee Voter.

Sagot: Wala po.

Kung may karagdagan pang katanungan na wala sa mga nabanggit, hinihilingan ang mga kababayan natin na tumawag lamang sa Mobile Number na 0546528290 at hanapin si Mr. Lex Pineda (POLO-ERO Representative for OAV Registration).

(For comments and reactions, please eMail at
maxbringula@yahoo.com or send text message only on 00-966-502319535)

Saturday, August 29, 2009

Aquino - Simbolo ng Demokrasiya

Max Bringula (Abante ME Edition, 03 August 2009)

Sumakabilang-buhay na ang tinataguriang “icon of democracy”, ang dating Pangulong Corazon Aquino.

Sa pahayag ng kanyang panganay na anak na si Sen. Benigno “Noynoy” Aquino III, ang dating Pangulo ay binawian ng buhay sa ganap na ikatlo ng umaga ng Sabado, 01 August 2009. Halos isang taon din ang pakikipaglaban ng Pangulo sa sakit na colon cancer mula nang ma-diagnose siya na may sakit na ito noong isang taon.

Sa gitna ng karamdamang iyon, nanatiling matatag at payapa ang ipinakita at ipinadama ni Tita Cory sa sambayanang Pilipino na nagmahal sa kaniya at buong pusong nakipagkaisa sa kanyang layuning mapanatili ang demokrasiya sa Pilipinas.

Si Aquino’y tunay na maituturing na simbolo ng demokrasiya tulad din ng kanyang asawang si Ninoy Aquino di lamang sa Pilipinas kungdi maging sa buong mundo. Sa pamamagitan ng isang mapayapang “people’s power” na naganap noong 1986 ang simpleng maybahay ni Ninoy ay iniluklok ng sambayanang Pilipino bilang Pangulo ng Pilipinas at siyang naging daan upang magwakas ang mapang-aping rehimen ni Ferdinand Marcos na naranasan ng maraming sa kanyang administrasyon sa loob ng dalawampung taon.

Ang pangyayaring ito’y nagbigay din ng inspirasyon sa bawat bansa sa ibang bahagi ng mundo na nagnanais na makalaya rin at makamit ang pinaka-aasam-asam na demokrasiya. Naging bukam-bibig ang pangalang Aquino at ang kakaibang “people’s power” sa Pilipinas.

Dahil dito tunay na maituturing na simbolo ng demokrasiya si Tita Cory. Sa pamamagitan niya ay nakakabanaag ang mga Pilipino ng pag-asa na muling magiging malaya sa kamay ng mapang-abusong pamahalaan. Ang kanyang malinis na puso at hangarin at pananalig sa Poong Maykapal ang nagbibigay lakas sa mga Pilipino na ipaglaban ang demokrasiyang nakamit sa mga kamay na nagnanais na ito’y muling agawin.

Mananatili sa puso’t isipan ng maraming Pilipino ang dating Pangulong Aquino. Ang kanyang mortal na katawan lamang ang pumanaw, subalit ang kanyang alaala ay mananatiling buhay magpakailanman. Siya’t mananatiling “Tita Cory” sa sambayanang Pilipino, ang simbolo ng demokrasiya sa Pilipinas.

Samantala, ang labi ni Ginang Aquino ay kasalukuyang nakalagak sa De La Salle Catholic School simula pa noong Sabado at mananatili roon hanggang Lunes upang masilayan sa huling sandali ng mga nakikiramay at ng sambayanang Pilipino bago ito tuluyang ilibing sa tabi ng puntod ni Ninoy sa Manila Memorial Park sa Miyerkules, 05 August 2009.

Nagdeklara ang Pilipinas ng sampung araw na pagluluksa at ang Armed Forces of the Philippines ay magbibigay ng “full military honors” sa araw ng kaniyang libing.

Sa iyo, Tita Cory, maraming salamat sa pagbibigay mo ng magandang halimbawa ng katatagan, kababaang-loob at pagmamahal sa bayan.

************

LabAtt Des Dicang – Maligayang Kaarawan

Nagdaos naman ng kanyang ika-apatnapung kaarawan ang butihing Labor Attache ng Eastern Province na si Honorable David Des T. Dicang noong August 1.

Isang munting programa at salu-salo ang inihanda ng mga community leaders na malapit sa kanya, mga kaibigan at mga kasamahan sa POLO-ERO na ginanap sa Conference Hall ng Mohammad Dossary Hospital noong bisperas ng kanyang kaarawan.

Dumalo sa nasabing pagdiriwang si Ambassador Antonio Villamor. Sa kanyang maikling pananalita para sa celebrant, kanyang nabanggit ang isang popular na kataga na “best things comes in small packages” na tumutungkol marahil sa physical stature ng celebrant subalit malaki naman ang nagawa at nagagawa sa mga OFWs sa Eastern Province bilang Labor Attache nito.

Lubos-lubos naman ang pasasalamat ni LabAtt Des sa mga dumalo at nagsagawa ng surprise birthday treat na iyon. “Your presence is enough for me to always cherish and treasure of” ang salitang binitawan ni Dicang sa mga naroroon ng gabing iyon. Bakas sa kanyang mukha ang kaligayahan at pasasalamat.

(For comments and reactions, please eMail at maxbringula@yahoo.com or send text message only on 00-966-502319535)

Mga Iba't Ibang Katanungan

Max Bringula (Abante ME Edition, 30 July 2009)

Pansamantalang bibigyan natin ng espasyo sa column na ito ang iba’t ibang katanungan na aking natanggap sa eMail at text messages mula sa ating mambabasa sa KSA, Bahrain at Qatar, upang sa pamamagitan nito ay maibahagi rin sa lahat ang kasagutan na maaaring makatulong din sa makakabasa.

OAV Registration

Gud PM. Binabasa ko ang column nyo ngayon about OAV pero ala pong nabanggit na date kung kelan ulit. Di pa po ko nakapagrehistro. (KSA)

Hangad ko ding makaboto sa darating na halalan. Magkakaroon pa kaya ng registration para sa OAV dito. (Mark-Eastern Province)

Kailan po ang Registration dito sa Riyadh para sa election 2010. (OFW-Riyadh)

Nagsimula na muli ang OAV registration sa Eastern Province noong 20 July at ito’y magtatapos sa 31 August 2009. Ginaganap ito sa IPSA (International Philippine School in Alkhobar) tuwing Lunes, Martes at Miyerkules mula ika-anim ng gabi hanggang alas-dose ng umaga, at tuwing Huwebes at Biyernes sa ganap na ika-sampu ng umaga hanggang alas-sais ng gabi.

Samantala sa Riyadh at Jeddah ay tuloy-tuloy pa rin ang registration na ginaganap sa loob ng Embahada at Konsulada.

Ask ko lang po. Ano po ba requirements para magpa-rehistro. Iqama lang ba? (KSA)

Dalhin ang kopya ng inyong valid passport. Hindi sapat ang Iqama lamang.

Ask lang po. Di pa kc ako nagparehistro sa OAV gawa ng schedule ko. 12 to 10 pm duty ko. Taga ARAMCO Commissary Dhahran po ako work. Sana makaboto ako. (KSA-Dhahran)

Puwedeng-puwede kang makaboto, kabayan. Sikapin mo lang na makapagrehistro ka bago mag August 31. Mayroon registration ng 6pm hanggang 12 midnight tuwing Lunes, Martes at Miyerkules sa IPSA. So pwede mong mahabol ang sked na ito pagka-labas mo sa trabaho ng 10pm.

Nais ko sana magtanong. Dito kc ako sa Eastern Province, Saudi. San ba nakaka-register para sa absentee voting? San ba pwde lumapit na opisina?

Kabayan, ang OAV registration ay kasalukuyang ginaganap sa IPSA (International Philippine School in Alkhobar). Sa ngayon, ito lamang ang official na venue na pinagdarausan ng registration dito sa Eastern Province.

Pwede po bang magpa-register dito pero sa Pinas na ako makakaboto dahil uwi na po ako sa October? (OFW-Bahrain)

Ang registration na ginaganap ngayon sa iba’t ibang bahagi ng mundo ay para sa overseas absentee voting na ang ibig sabihin ay sa labas ng Pilipinas boboto. Kung ikaw ay uuwi na sa Pilipinas at naroon ka sa Halalan sa Mayo 2010, hindi ka puwedeng dito magrehistro at sa Pilipinas boboto.


Revised Saudi Labor Law:

Hello sir. Can u please send me a copy of Revised Saudi Labor Law? (KSA)

Sir, I want a copy of revised Saudi Labor Law. How can I have it? (Jayron Sercenia – Riyadh, KSA)

Para sa mga nagnanais ng kopya ng Revised Saudi Labor Law (in Tagalog or English or both), pki-bigay o pki-text sa akin ang inyong eMail address.

On Kimverlie Molina’s Success in WCOPA

Sana po makauwi si Ms. Molina sa atin at makapag-guest sa tv show para makilala sya ng mga Pinoy. Di ko po kilala si Ms. Molina but I’m proud to say “ako’y Pinoy” gawa ni Ms. Kim. Good luck po sa column nyo at sana magtagal pa ng more years. (Arlon-Qatar)

Hayaan mo Arlon ipararating ko kay Kimverlie ang iyong tinuran at sana nga hindi lang sa Pilipinas makilala at sumikat si Kim kungdi maging sa buong mundo. Ang tagumpay ni Kim ay tagumpay din nating mga OFWs.

Miscellaneous

Gud PM po. Request lang po ako ng eMail addy ng OWWA, POEA, DOLE, Senators at PGMA (if possible po). Thanks. (Riyadh-KSA)

OWWA
opcenter@owwa.gov.ph / owwa_opcenter@yahoo.com
POEAinfo@poea.gov.ph / poeainfocenter@yahoo.com
Senators senjinggoyestrada@senate.gov.ph / sendrilon@senate.gov.ph

Pwede ko pa bang kunin ang cefon number ni Col. Jimmy Manabat, PNP Senior Superintendent kasi po may problema po ako ngayon dito sa Saudi. (KSA)

Maaaring tawagan si Col. Manabat sa kanyang mobile number na 055-1200795.

May PRC representative po ba rito sa KSA para makapag-rehistro as dental technology/hygienist as Phil. Dental Act 07? (OFW-Jeddah)

Walang nakatalagang representative ang PRC dito sa Saudi o maging sa buong Middle East, subalit madalas naman silang nakakapunta kapag may idinaraos na licensure Examination. Maaaring bumisita sa kanilang website sa
www.prc.gov.ph para sa karagdagang kasagutan sa iyong katanungan.


************

Embassy On-Wheels sa Eastern Province

Muling gaganapin ang Embassy On-Wheels (EOW) sa Eastern Province sa darating na August 6 and 7. Ito’y idaraos sa IPSA (International School in Alkhobar) sa mga sumusunod na oras at petsa:

August 6 (Thursday) – 8:00 AM – 5:00 PM
August 7 (Friday) – 7:00 AM – 11:00 AM

Sa huling EOW na ginanap noong July 2 and 3, may 700 machine-readable passport (MRP) applications ang kanilang na-process na tinatayang mai-re-release sa August 6 and 7.

Sa mga aplikante, maaaring i-verify sa website ng Embassy, ang
www.philembassy-riyadh.org kung available na ang kanilang bagong pasaporte. Para makuha ang bagong MRP, kailangang dalhin ng aplikante ang kanyang lumang passport at resibo ng pagbayad. Kung hindi makakasipot ang aplikante para kunin ang MRP, maaari siyang magbigay ng authorization letter sa kasama upang makuha ang MRP in his/her behalf.

(For comments and reactions, please eMail at
maxbringula@yahoo.com or send text message only on 00-966-502319535)

Wednesday, August 26, 2009

Computer-Literacy, Kailangan ng Bawat OFWs

Max Bringula (Abante ME Edition, 29 July 2009)

Ang mabilis na pag-usad ng teknolohiya lalo na sa larangan ng komunikasyon ay isang mahalagang dahilan kung bakit kinakailangan na ang bawat overseas Filipino workers ay maging computer-literate o may basic knowledge sa computer o paggamit nito. Pagkat kung hindi, siya’y mapag-iiwanan at maaaring mahirapang sumabay sa bilis ng pagbabagong nagaganap.

Ito’y sa dahilang lahat ng ating ginagawa ay naka-computer-based na, o ginagamitan ng computer. At dahil dito, hindi lamang ang mga nagtratrabaho sa opisina ang dapat marunong sa computer o yung mga nasa larangan ng Information and Communications, kungdi ang bawat sino man ay kailangang may alam sa basic computing. Maging ang mga prospective employer sa ngayon ay nire-require na ang pagiging computer-literate sa mga aplikante nito.

Sadya ngang napakahalaga nito lalo na sa ating kapanahunan. Noong araw ang komunikasyon sa pagitan ng OFW at ng kanyang pamilya sa Pilipinas ay sa pamamagitan ng sulat lamang na ang normal na delivery ay umaabot sa lima o pitong araw, o kaya naman sa pamamagitan ng long distance call na ang rate ng tawag bawat minuto ay may kataasan.

Subalit ngayon ay hindi na. Ang komunikasyon ay pinabilis sa pamamagitan ng electronic mails o chatting kumpara nung araw na sulat lamang ang inaasahan ng bawat OFWs para makabalita sa mga mahal sa buhay. Ngayon ay “real time” na ang komunikasyon.

Ang pag-aaral sa basic computing ay di naman mahirap matutunan. Karamihan nga ay natututo “through experience” lang o kaya’y sa tulong ng kaibigan o kasama na may kaalaman dito. Maari rin namang matuto sa pamamagitan ng pagbabasa o pagmamasid. At kung may mga organisasyon na naghahandog ng libreng pagtuturo o kahit may bayad man, dapat na wag palampasin ang ganitong pagkakataon.

************
COMSOFIL-EP Announces Registration for the 2nd Semester of its Computer Class

Samantala, inihayag ng COMSOFIL (Computer Society of Filipinos International) Eastern Province Chapter ang pagsisimula ng registration para sa second semester ng kanilang Computer Class na isinasagawa taun-taon. Ang pinakahuli’y natapos lamang noong 26 June 2009 kung saan mayroong 135 graduates. Ayon kay Ginoong Ronald Acosta, Pangulo ng COMSOFIL sa taong 2009, may 600 na nagsipagtapos ng kanilang Computer Class mula ng ito’y kanilang simulan.

Para sa second semester na magsisimula sa September 4 at magtatapos ng October 23, 2009 (na idaraos tuwing Biyernes lamang), narito ang mga pag-aaral na tatalakayin:

1) Desktop & Laptop Assembly, Maintenance and Troubleshooting
2) Microsoft Office 2007 (Microsoft Word & Excel – ADVANCE)
3) Microsoft Office 2007 (Microsoft Access & PowerPoint – BASIC)
4) Adobe Photoshop – ADVANCE
5) Autodesk AutoCAD – BASIC
6) CISCO 1 (Networking)
7) MS Windows Server 2008 (Active Directory, Configuring)

Ang enrollment ay isasagawa sa August 7, 14, 21 at 29 sa Chow Restaurant mula ika-apat ng hapon hanggang ika-walo ng gabi. Sa mga karagdagang katanungan, makipag-ugnayan lamang kay Ronald Acosta (President) – 0508741613, Jun Defeo (VP-Education) – 0507925720, at Bong Breta (VP-Engineering) – 0551674021.

************
KASAPI Congress in Jeddah will conduct “Beyond Computer Basics”

Inihayag naman ni Ginoong John Asperilla, Secretary General ng KASAPI Congress sa Jeddah ang pagdaraos ng computer class na “Beyond Computer Basics” simula sa August 7 hanggang October 2, 2009 (tuwing Biyernes lamang) mula ika-walo ng umaga hanggang alas-singko ng hapon sa La Parilla Restaurant, Madina Road, Jeddah, Saudi Arabia, kung saan tatalakayin ang mga sumusunod:

1) Windows Operating System (XP or Windows Vista)
2) Computer Networking System
3) MS Visual Basic 6 Programming
4) ORACLE
5) Website Design and Hosting
6) Computer Assembly and Troubleshooting
7) Electronic Security Solutions
8) MS Project Management
9) Adobe Photoshop and Flash

Sa mga karagdagang katanungan, makipag-ugnayan lamang kay John Asperilla (0509539410), Vicente Aguila (0509304090), Rodolfo Cornejo (0509762330) at Nazruddin Dianalan (0560046512).

(For comments and reactions, please eMail at
maxbringula@yahoo.com or send text message only on 00-966-502319535)

Tuesday, August 25, 2009

Special Licensure Exam, Muling Isasagawa ng PRC

Max Bringula (Abante ME Edition, 27 July 2009)

Ito ang inihayag ng kasalukuyang Chairman ng Philippine Regulatory Commission (PRC) na si Ginoong Nicolas P. Lapena, Jr. sa kanyang sulat sa mga liderato ng professional groups sa Riyadh, Jeddah, Alkhobar, Saudi Arabia, at maging sa UAE at Qatar.

Ang Special Licensure Examinations sa accountancy, architecture, civil engineering, electrical engineering, electronics engineering at mechanical engineering ay bukas sa lahat ng kuwalipikadong mga Overseas Filipino Workers. Ang examinations ay idaraos ng sabay-sabay sa Alkhobar at Jeddah sa 26, 27 at 28 November 2009, at December 2, 3 & 4, 2009 sa Doha, Qatar at Abu Dhabi, UAE.

Ang pagsasagawa ng licensure examinations ay kaalinsabay ng pagpapatupad ng pamahalahan ng Pilipinas na bigyan pa ng higit na pribileheyo ang mga Filipino overseas workers tulad ng pagkakaloob ng pagkakataong maging lisensiyado sa kanilang napiling professions habang kasalukuyang nagtratrabaho sa abroad.

Sa mga nagnanais na kumuha ng Special Licensure Exam, narito ang mga dapat na ihanda at i-submit:

1) Original & photocopy of Transcript of Records (TOR) with scanned picture and remarks “For Board Examination Purpose Only”
2) Original and photocopy of Certificate of Live Birth issued by the National Statistics Office (NSO) in security paper
3) Four (4) pieces of passport-size pictures with complete nametag
4) Photocopy of Philippine Passport
5) Examination Fee of USD 40.00
6) Application Form (can be downloaded at
www.prc.gov.ph)

Sa iba pang karagdagang requirements na dapat i-submit ng iba’t ibang disciplines (architects, CPA’s, civil engineers, electrical engineers, electronics engineers and mechanical engineers), makipag-ugnayan lamang sa mga opisyales ng mga professional organizations sa inyong lugar tulad ng UAP/MBAP/IOFA, PICPA, PICE, IIEE, IECEP at PSME sa Alkhobar, Jeddah, Riyadh, Doha, Abu Dhabi at Dubai.

Ang mga applications ay dapat mai-submit sa mga professional organizations or groups on or before 30 September 2009, at mai-transmit naman sa PRC on or before 09 October 2009.

Para sa mga aplikante kung saan ang kanilang mga dokumento ay nasa Pilipinas, maaari nilang i-submit ito directly sa PRC sa Application & Qualification Evaluation Division on or before 15 September 2009.


(For comments and reactions, please eMail at maxbringula@yahoo.com or send text message only on 00-966-502319535)

Pagtulong sa Kapwa OFW ang Tanging Hangad Ko

Max Bringula (Abante ME Edition, 25 July 2009)

Upang mailahad ang panig ni Albert Guanzon patungkol sa opisyal na pahayag ng Bantay OCW na nailathala sa column na ito noong Huwebes, 16 July 2009, at sa Advisory to the Public na inilabas kamakailan ng POLO-Eastern Region Operations sa mga Pilipino sa Saudi Arabia, particularly sa Eastern Province, ating sinikap na makausap si Albert upang hingin ang kanyang pahayag.

Wika ni Albert na siya’y labis na nalungkot sa mga pangyayari pagkat wala naman daw siyang tanging hangarin kungdi ang makatulong sa kapwa niya OFWs na lumalapit sa kanya at tumatawag upang humingi ng tulong. Na sa pagnanais niya na sila’y tulungan siya’y nalalagay sa alanganin at kapahamakan.

Ang kanya raw pagtulong ay tapat at hindi siya naghihintay ng ano mang kapalit. Kanyang inamin na tumanggap nga siya ng halaga na isang libong Riyals mula kay Vilma, isang runaway worker upang gamitin sa pagkuha ng work permit. Subalit nang di ito naisakatuparan ay kanyang itinabi na lamang para may pera si Vilma kapag uuwi na. Sa kadahilanang naka-uwi na si Vilma at di na sila nagkita, ini-remit nya na lamang ang halaga noong 12 May at 31 May 2009 nang ang huli’y sumulat sa POLO-ERO tungkol sa halagang ibinigay niya kay Albert.

Ang paggamit niya ng pangalang POLO-ERO o ang pagpapakilalang siya’y taga-POLO-ERO ay walang katotohanan, ayon kay Albert. Ang tangi niya lamang sinasabi sa mga tinutulungan niya ay sila’y kabahagi ng POLO-ERO bilang mga volunteer workers o ACP’s (accredited community partner). Maaaring ganoon ang tingin o pagkaka-akala ng mga distressed OFW sa kaniya na siya’y taga-POLO-ERO subalit hindi ito ang pagpapakilala niya sa sarili, ang idinugtong pa ni Albert.

Tungkol naman sa pahayag ng Bantay OCW, ipinaalam ni Albert na totong dati siyang nagprisinta kay Susan K na maging taga-ulat sa programa nito sa DZRB Radyo ng Bayan at maging sa NBN Channel 4, subalit ngayon ay di na siya konektado rito at maging ang grupo niya na itinatag ay pinalitan niya na ng pangalan pati na ang paggamit sa logo nito. Ito’ tatawagin na lamang niya na Bantay OFW.

Gayunpaman, sisikapin pa rin daw niya na makapagbigay-ulat sa programa ni Susan sa pribadong paraan. Idinagdag din niya na siya’y lubos na nagpapasalamat kay Susan K sa oportunidad na ibinigay nito sa kanya nang siya’y nag-uulat pa rito.

(For comments and reactions, please eMail at
maxbringula@yahoo.com or send text message only on 00-966-502319535)

"Akyat-Bahay" Umatake Na Naman

Max Bringula (Abante ME Edition, 23 July 2009)

Hindi na bago ang ganitong balita at marami na rin tayong narinig na mga kababayan natin na nabibiktima ng tinatawag na “akyat-bahay”.

Ito ang tawag natin sa mga pumapasok o sumasalisi sa ating tinitirhan o accommodation para magnakaw habang ang residente nito ay wala o maaaring natutulog. Ang ganitong pangyayari ay di lamang sa Pilipinas nagaganap kungdi maging dito rin sa atin.

Kamakailan lamang ay muling umatake ang ganitong kaganapan nang ibalita sa atin ni Ronald M. Macatong, Engineering Supervisor ng Al-Rushaid Construction Co. Ltd. (ARCC) dito sa Alkhobar na sila’y nilooban sa kanilang accommodation noong Lunes ng madaling araw (20 July) sa may 27th Street cor. Prince Fawaz, Alkhobar.

Ang building na kanilang tinitirhan ay tinatawag na staff house ng mga empleyado ng ARCC, at ito’y may dalawang palapag. Sa ikalawang palapag nito tumutuloy ang management staff ng kumpanya at sa unang palapag at ground foor nito ay ang mga rank-and-file staff. Mataas ang pader nito na nakalibot sa building at may karagdagang pintuan ito bago makapasok sa mismong accommodation o flat ng mga nakatira roon.

Subalit sa di malamang kadahilanan ay napagnakawan ang mga occupants nito sa may first floor at ground foor kung saan may dalawamput-lima (25) occupants, habang sila’y natutulog.

Ayon kay Ronald nang siya’y aking makausap, anim na kuwarto ang napasok at bawat residente nito ay nawalan ng pera. Tatlong pitaka ang kinuha kasama na ang kay Ronald at yung iba nama’y iniwan ang pitaka at pera lang ang kinuha. Bukod pa rito, may mga nawalan ng cellphones at laptop.

Masamang-masama ang loob ni Ronald pagkat nawalan siya ng tatlong-libong riyals at 200 dollars. Buti na lamang daw at di nakuha yung kanyang laptop at mga alahas.

Tinatayang mga banding alas-tres ng madaling araw nang umatake ang magnanakaw at hinihinala nilang maaaring gumamit ito ng spray na pampatulog pagkat wala sino man sa kanila ang nagising o nakaramdam na may pagnanakaw na nagaganap.

Nalaman na lamang nila ito nang ang isa nilang kasamahan ay nagising ng bandang alas-tres y medya dahil naalimpungatang nakabukas ang kanilang ilaw kung kaya’t ito’y tumayo upang patayin sana ito nang makita niya ang isang katutubo na maitim daw at kulot na papasok sa kuwarto nila. Nang siya’y makita, ito’y umatras at tumakbong papalabas. Doon na lamang nila nalaman ang pagnanakaw nang gisingin na silang lahat at sabihing sila’y nilooban. Nagpapasalamat naman ang iba dahil walang nasaktan o sinaktan sa kanila.

Gayunpaman, ibayong pag-iingat talaga ang dapat gawin natin. Tulad ng aking nababanggit sa mga nauna kong panulat, huwag basta-basta magpapasok pag di kilala at huwag basta magbubukas ng pinto kapag may kumakatok. Alamin muna kung sino ito.

Tiyaking nakasara lagi ang pintuan ng ating bahay. Lagyan ng double lock ang ating mga pintuan.

Maging mapagmasid sa ating kapaligiran sa mga kakaibang kilos o galaw ng iba.

Kaiba na ang ating kapanahunan kung kaya’t dapat maging maingat lagi.

(For comments and reactions, please eMail at
maxbringula@yahoo.com or send text message only on 00-966-502319535)

Kimverlie, the Pride of Eastern Province KSA

Max Bringula (Abante ME Edition, 22 July 2009)

Sadyang totoo ang kasabihang “pagkatapos ng unos, sinag ng araw ay muling sisikat”.

At ito ang aking nasaksihan na kaganapan sa lugar na ito ng Gitnang Silangan. Kamakailan lamang ay sunud-sunod na malulungkot at kalunos-lunos na pangyayari ang narinig at naranasan ng mga OFWs dito sa Eastern Province – ang pagpatay ng isang Pilipina sa sinasabing kaibigan niyang Pilipina, ang pagpapakamatay ng isang domestic helper sa may Dammam at ng isang Filipino technician sa Alkhobar, ang patuloy na pagdami ng mga run-aways, rape cases, phone-snatching, at marami pang ibang nakakabahalang kaganapan. Dagdag pa rito ang mga problemang kinasasangkutan mismo ng mga community leaders at ang manaka-nakang di pagkakaunawaan. Ang lahat ng ito’y sadyang nagdudulot ng paninimdim sa puso at sa iba’y panghihinawa.

Subalit tulad ng ating napapanood sa teleseryeng “May Bukas Pa” sa Primetime Bida, ang buhay ay di pulos lungkot at pighati, bagkus may ngiti at sigla rin namang dumarating at nararanasan. Tulad ng magandang balita na ating natanggap at nabasa sa pagkakapanalo ni Ms. Kimverlie Molina, the pride of Eastern Province, KSA, bilang “2009 Grand Champion Senior Vocalist of the World” sa katatapos na 13th Annual World Championships of Performing Arts (WCOPA) na ginanap sa Los Angeles, California, USA noong July 11-19.

Ang buong Filipino community dito sa Eastern Province, Saudi Arabia ay nagdiriwang at nakikigalak sa tagumpay na ito ni Ms. Molina na kamakailan lamang ay nagdaos ng kanyang debut dito sa Alkhobar. Sadyang nakakataba ng puso ang ganitong balita. Balitang lalong nagpapatanyag ng ating pagiging isang Pinoy at taas-noong pagsasabing “Ako’y Pinoy!”.

Matatandaan na sa kumpetisyon ding ito nagwagi si Jed Madela nang siya’y hirangin “Grand Champion Vocalist of the World” noong 2005. Katangi-tangi nga ang talento ng Pinoy sa pag-awit na kung saan kinikilala hindi lang sa Pilipinas kungdi maging sa buong mundo, tulad ng mga singing sensations na sina Banig, Lea Salonga, Charice Pempengco, at Billy Crawford. Hindi malayong mararating din ni Kimverlie ang katanyagang nakamit ng mga nabanggit. Ang kailangan lamang ay ang pananatiling mapagkumbaba at ang papapahusay pa sa piniling propesyon. At ito’y akin namang nakikita kapag nakakasama at napapanood ko ang panganay na anak na ito ni Dr. Ronnie Molina, ang founder ng FILPOP (Fiipino Pop Music Clu) at Myrna Soriano.

Malayo na nga ang narating ng “TFC Popstar Middle East Grand Champion” mula ng makamit niya ang titulong ito noong 2006 sa Dubai. Ngayo’y abot kamay niya na ang mas higit pang tagumpay.

Lalo pang dumagsa ang mga offers na natatanggap ni Kimverlie matapos na siya’y tanghaling “2009 Grand Champion Senior Vocalist of the World”. Ang pinakahuli’y mga offers sa iba’t ibang recording companies at talent managers sa Hollywood.

Sa iyo, Ms. Kimverlie Molina, mabuhay ka! Isa kang karangalan sa bawat OFW’s.

(For comments and reactions, please eMail at
maxbringula@yahoo.com or send text message only on 00-966-502319535)

Monday, August 24, 2009

Filipino Professionals, Sama-samang Nag-Oath-Taking

Max Bringula (Abante ME Edition, 20 July 2009)

Nagkasama-sama ang iba’t ibang Filipino professionals sa Architecture, Certified Public Accountancy, Civil Engineering, Mechanical Engineering, at Electronics Communication Engineering sa isang oath-taking ceremony na ginanap sa Dhahran Palace Hotel noong nakaraang July 10, 2009, para sa mga mapalad na pumasa sa 2009 Licensure Examination na ginagawa taun-taon sa Saudi Arabia ng Philippine Regulatory Commission (PRC).

Ang oath-taking ceremony ay pinangunahan mismo ng PRC Chairman na si Ginoong Nicolas P. Lapena, Jr., na dinaluhan din ni Labor Attache David Des T. Dicang at Welfare Officer Edgar Lim ng POLO-Eastern Region Operations.

Layunin ng PRC na bigyan ng pagkakataon ang mga professionals na kasalukuyang nagtratrabaho sa abroad tulad sa Saudi Arabia na maging lisensiyado sa kani-kanilang propesyon sa pamamagitan ng pagsasagawa ng licensure examination. Ngayon taong 2009, may apatnaput-apat (44) na successful examinees sa Architectural Board Exam, tatlumput-lima (35) naman sa Civil Engineering, dalamput-anim (26) sa Mechanical Engineering, lima (5) sa Electronics Communication Engineering, at apat (4) sa Certified Public Accountancy.

Ang natatanging okasyon ay dinaluhan din ng mga officers and members ng bawat organisasyong kumakatawan sa nabanggit na disciplines (o professions) tulad ng United Architect of the Philippines (UAP), Philippine Institute of Certified Public Accountants (PICPA), Philippine Institute of Civil Engineers (PICE), Philippine Society of Mechanical Engineers (PSME-SA), at Institute of Electronics Communication Engineers of the Philippines (IECEP). Ang mga nabanggit na organisasyon ay siya namang bumubuo ng bagong tatag na Philippine Professional Organization (PPO) – Saudi Arabia, kasama ang Institute of Integrated Electrical Engineers of the Philippines, Inc. (IIEE-ERCSA).

Masayang ibinalita ni Arch. Leo Cefre, ang bagong Pangulo ng PPO-SA at siya ring Presidente ng Master Builders Association of the Philippines (MBAP-ECSA), na magkakaroon muli ng Licensure Examination sa darating na Nobyembre ng taong kasalukuyan. Ito’y gaganapin sa Alkhobar sa November 26, 27 at 28, at sa first week ng December, sa Jeddah, Qatar at Abu Dhabi.

Sa isang diyalogo na isinagawa ng araw ding iyon kasama ang PRC Chairman napag-alamang maaaring magkakaroon din ng licensure examination para sa mga nurses at mga guro. “Kailangan lamang ang masusing paghahanda upang ito’y maisakatuparan” banggit ni Ginoong Lapena.

Samantala, maaari nang magpalista at sumama ang mga nagnanais na kumuha ng licensure examination sa mga nagaganap na reviews tuwing Biyernes, mula umaga hanggang hapon. Makipagbigay-alam lamang kay Arch. Cefre (CP No. 050-5849065) para sa ibang detalye nito.

Nagbigay ng karagdagang sigla sa okasyon ang mga natatanging bilang na inihandog ng FILPOP (Filipino Pop Music Club) artists na sina Bong Buella, Eia Melissa Cefre, Krizia Monik Gutierrez at Chariz Bejesa. Naging panauhin din ang pambato ng Riyadh sa pag-awit na si Ms. Radzna Arabain.

(For comments and reactions, please eMail at
maxbringula@yahoo.com or send text message only on 00-966-502319535)

Opisyal na Pahayag ng Programang Bantay OCW ni Susan K

Max Bringula (Abante ME Edition, 19 July 2009)

Kami’y nakatanggap kamakailan lamang ng sipi ng opisyal na pahayag ng programang Bantay OCW ni Susan M. Andes na mas lalong kilala sa taguring na Susan K. patungkol sa isa nating kasamahan sa Filipino community group dito sa Eastern Province na si Albert Guanzon.

Nakasaad sa isang pahinang pahayag ang pagtanggi ng Bantay OCW Foundation, Inc. kay Mr. Guanzon bilang opisyal na miyembro ng programang Pilipinas On-Line Bantay OCW. Na ito’y nagboluntaryo lamang sa kanila sa pamamagitan ng text messages na ipinadala nito na nais niyang makatulong sa kapwa-OFW sa Saudi sa pamamagitan ng pag-uulat sa kanilang programa sa DZRB-Radyo ng Bayan, na di naman nila ipinagkait.

Ang pahayag ay inilabas pagkatapos na makatanggap ang Bantay OCW Foundation ng reklamo mula sa Embahada ng Pilipinas sa Saudi Arabia laban kay Albert.

Idinagdag pa nila na walang kinalaman ang programang Bantay OCW sa anumang kinasasangkutan ni Albert sa Saudi Arabia at wala itong pahintulot na gamitin ng grupo ni Albert ang pangalang Bantay OCW bilang KSA Chapter nito.

Labis na ikinabahala ni Susan ang sunod-sunod na sumbong at reklamo na kanilang natatanggap laban kay Albert kung kaya’t agad nilang ipinahinto ang pag-uulat ni Guanzon sa kanilang programa.

Si Susan ay Managing Director ng Bantay OCW Foundation, Inc. na ang punong-tanggapan ay matatagpuan sa 4/F PIA Building, Visayas Avenue, Quezon City. Siya ang producer/host ng malaganap na programang Pilipinas Online-Bantay OCW na napapakinggan sa Pilipinas araw-araw sa DZRB-Radyo ng Bayan at napapanood naman sa NBN Channel 4. Sila’y maaaring tawagan sa numerong 00-632-7191674 o sa kanilang Helpline (0919) 2140699, o kaya nama’y sulatan sa eMail address na susankbantayocw@yahoo.com.

Batay naman sa report na nanggaling sa POLO-ERO, may mga reklamo silang natatanggap mula sa mga OFWs na pinangakuan ni Guanzon ng tulong na minsa’y may karampatang halaga sa pag-aakalang siya’y taga-Embahada o taga POLO-ERO na siya niyang pakilala sa kanila, na sa halip na mabigyan sila ng tulong na kakailanganin ay lalo pang nalalagay sa kapahamakan ang naturang distressed OFW.

Si Albert ay madalas na napagkikita kung saan mayroong OFW activities tulad ng buwanang Embassy On-Wheels at kumukuha ng mga video footages at nagpapakilalang miyembro ng media. Ilang beses na rin siyang in-assist ng POLO-ERO mula sa kapulisan dahil sa kasong kinasangkutan nito. Si Albert ay dating pangulo ng Kasangga ng OFW na ayon sa pangulo nito ngayon na si Engr. Ismael Sulit ay kanila nang binubuwag upang di na masangkot pa ang nasabing organisasyon sa mga kontrobersiya sanhi ni Guanzon.

Maraming nagtatanong kung si Mr. Guanzon ba ay empleyado o representative ng POLO-ERO. Upang maliwanagan ang lahat at para sa kaalaman ng publiko at ng mga OFWs in particular, binanggit ni Labor Attache David Des Dicang na sila’y maglalabas ng advisory ng listahan ng mga opisyal na nanunungkulan sa POLO-Eastern Region Operations pati na ang mga kaukulang numero ng maaari nilang tawagan para sa tulong o oras ng pangangailangan.

(For comments and reactions, please eMail at
maxbringula@yahoo.com or send text message only on 00-966-502319535)

Muling Pagdaraos ng OAV Registration sa EP, Aprubado Na

Max Bringula (Abante ME Edition, 19 July 2009)

Ina-prubahan na ng COMELEC ang request ng Alkhobar post na pagdaraos ng 5-days a week na OAV Registration sa Eastern Province mula sa Linggong ito hanggang 31 August 2009. Ito’y bilang pagsisimulang muli matapos ang apat na weekends registration na naunang ibinigay ng COMELEC.

Ang bagong approval ay batay sa isinumiteng request ng POLO-ERO sa Philippine Embassy, Riyadh noong 06 July 2009 kung saan hinihingi ng POLO-Eastern Region Operations na pahintulutan sila ng COMELEC na makapagdaos muli ng OAV Registration sa natitirang araw bago dumating ang huling araw ng OAV registration na itinakda ng COMELEC na 31 August 2009.

Ang registration ay gaganapin sa IPSA (International Philippine School in Alkhobar) sa mga sumusunod na oras:

Weekdays (Monday-Tuesday-Wednesday) – mula alas-kuwatro ng hapon (4 PM) hanggang alas-dose ng gabi (12:00 MN)

Weekends (Thursday-Friday) – mula alas-diyes ng umaga (10 AM) hanggang alas-sais ng gabi (6:00 PM)

Sa nakaraang emergency meeting na ipinatawag ni Labor Attache David Des Dicang noong 05 July 2009, nagkaisa ang mga representatives ng iba’t ibang Filipino community groups sa Eastern Province na mag-assist sa registration bilang mga volunteers o operators ng Data Capturing Machine (DCM). Sa ngayon ay may nakatalaga ng DCM Operators sa mga nasabing araw tulad ng: COMSOFIL – sa Thursday slot, PHILTECH sa Friday slot, ACES CYBERCOOP sa Tuesday slot at Pag-asa Community Support Group sa Wednesday slot. Tanging ang Monday slot na lang ang pupunuan.

May tatlong data-capturing machines na magagamit ngayon sa paninimula muli ng registration.

Samantala, inihayag kamakailan ng COMELEC na naglalayon sila na makapagtala ng isang milyong bagong OAV registrants para sa May 2010 election. Kanilang pinamanhikan sa bawat Filipino community groups at religious organizations tulad ng JIL (Jesus is Lord) at ang INC (Iglesia ni Kristo) na hikayatin ang kanilang mga miyembro na magpa-rehistro para sila’y makaboto sa darating na Halalan sa 2010.

Kung kaya’t inaanyayahan ang lahat nating mga kababayan na hindi pa nakapagre-rehistro, na tayo ng tumungo na sa registration centers sa inyong mga lugar. Huwag nating sayangin ang ating karapatang makaboto.

Magpa-rehistro na.

Anu-ano ba ang mga requirements para makapag-rehistro?

1) Personal Appearance – para sa biometrics capture ng inyong photo, thumb print at signature.

2) Valid Philippine Passport o kopya nito

3) Accomplished OAV Registration / Certification Form.

Maaaring ma-download ang OAV application forms sa sumusunod na link:
http://www.comelec.gov.ph/oav/downloadables/forms/registration.html

Sino-sino ang maaaring makapag-rehistro:

1) Lahat ng Filipino citizens abroad, na hindi diskuwalipado ng batas.
2) At least 18 years of age sa araw ng halalan.
3) Yung mga nakapag-rehistro na dati subailit di nakaboto sa nakalipas na dalawang election noong 2004 at 2007.

Subalit kung nakaboto naman kayo either sa 2004 o 2007, di na kailangang magpa-rehistro muli.

Sa mga taga-Eastern Province na may katanungan tungkol sa OAV, tumawag lamang sa POLO-ERO sa numerong (03) 865-1951, 894-1846, 894-2890, 899-5714 o sa kanilang Hotline 050-169742, o kaya’y mag-eMail sa
polo_ero2005@yahoo.com

Ang iba’y maaari ring bumisita sa website ng COMELEC sa
www.comelec.gov.ph kung may nais na maliwanagan tungkol sa Overseas Absentee Voting.

(For comments and reactions, please eMail at
maxbringula@yahoo.com or send text message only on 00-966-502319535)

FilCom sa Eastern Province, Magtutulong-tulong sa OAV Registration

Max Bringula (Abante ME Edition, 14 July 2009)

Nagkaisa ang iba’t-ibang Filipino community groups sa Eastern Province na ituloy ang registration ng Overseas Absentee Voting sa nalalabing dalawang buwan bago dumating ang huling araw ng Registration na itinakda ng COMELEC na 31 August 2009.

Sa isang emergency meeting na ipinatawag ni Labor Attache David Des Dicang at ginanap noong nakaraang Linggo, 05 July 2009, sa Al Suwaidi Camp, Jubail, dumalo ang mga representatives ng AFCSCOM (All Filipino Community and Sports Commission), OFW Congress, Philippine Professional Organization (PPO), at FILCOM-Jubail na kumakatawan sa iba’t ibang mga samahan na kabilang sa regional, sports, cultural, civic and professional groups upang talakayin ang pagpapatuloy ng OAV Registration at iba pang mahahalagang issues. Kasama ni LabAtt Des na dumalo sa pulong si Welfare Officer, Edgar Lim.

Sa nasabing meeting, inihayag ni LabAtt Des ang pagsisikap ng POLO-ERO na ma-aprubhan ang request nito na extension ng OAV Registration sa Eastern Province na matagal ng isinumite sa COMELEC at Department of Foreign Affairs (DFA).

Matatandaan na apat na weekends lang ang in-approve ng COMELEC na may karampatang budget upang idaos ang OAV Registration sa Eastern Province. Ito’y ginanap noong 14-15 May hanggang 04-05 June 2009 sa IPSA (International Philippine School in Alkhobar).

Sa apat na weekends na iyon nakapagtala ang POLO-ERO ng 812 registrants gamit ang isang Data Capturing Machine (DCM) lamang.

Ayon naman sa huling report, nakapagtala na ng 1089 registrants ang POLO-ERO as of 28 June 2009. Kabilang dito ang mga nai-register sa OAV Registration na ginanap kasabay ng Embassy On-Wheels noong 02-03 April 2009 at 30 April-01 May 2009, at yung mga nag-register sa Philippine Embassy-Riyadh.

Gayunpaman, ang apat na weekends na ibinigay ng COMELEC ay di naging sapat upang ma-accommodate ang maraming mga registrants na nais na makaboto sa darating na halalan sa 2010. Dagdag pa na iisa lamang ang Data Capturing Machine na ginagamit pagkat di naihabol ang karagdagang makina na manggagaling pa sa Hongkong. Kung kaya’t magdagsaan man ang mga OFWs para magpa-register ay di rin sila na-accommodate.

Dahil dito, napagkasunduan sa pulong ang pagkakaroon ng “Bayanihan” o ang pagtutulung-tulungan ng iba’t ibang Filipino organizations at ng POLO-ERO upang matiyak na maituloy ang OAV Registration sa mga nalalabing araw at linggo ng buwang kasalukuyan at darating. Sisikaping magkaroon ng registration ng weekends at weekdays.

Ilan sa mga gagawin ay ang sumusunod:

1) Ang pagtatalaga ng Volunteers bilang DCM Operators na walang ano mang remuneration o compensation. Sila’y sasanayin at isu-supervise ng POLO. Sa ngayon ay may tatlo ng DCM’s na magagamit.

2) Ang pagngangalap ng pambayad sa Renta ng venue na nagkakahalaga ng SR 155 kada araw. Ang OAV Registration ay kailangang gawin lamang sa premises ng IPSA ayon sa COMELEC o ng DFA/OAVS.

3) Ang paghimok sa mga Filipino restaurants na magkaloob ng libreng pagkain para sa mga volunteers. Ang registration ay i-iskedyul ng 4:00 pm hanggang 12:00 AM during weekdays, at 10:00 AM hanggang 6:00 PM during weekends.

4) Ang pagkokopya ng mga Forms na kakailanganin para sa registration.

Hindi na kakailanganin pa ng POLO-ERO ang budget mula sa COMELEC para isagawa ang OAV Registration pagkat ang gagastusin ay pagtutulung-tulungan na lamang ng POLO-ERO at ng mga Filipino community groups upang matiyak lamang na maisagawa ang OAV Registration.

Sa ngayon, hinihintay na lamang ang “go signal” mula sa COMELEC o sa DFA-OAVS at sa Saudi Ministry of Foreign Affairs para masimulan ito sa madaliang panahon.

(For comments and reactions, please eMail at maxbringula@yahoo.com or send text message only on 00-966-502319535)

Mga Paalala at Pag-iingat - Isang Panayam kay PNP S/Supt. Col. Manabat

Max Bringula (Abante ME Edition, 12 July 2009)

Sa katatapos na Embassy On-Wheels na ginanap sa IPSA (International Philippine School in Alkhobar) noong Friday, 03 July 2009, pinalad ang inyong lingkod na makapanayam ang ating Police Attache sa Saudi Arabia na si Col. Jimmy Manabat, PNP Senior Superintendent, na noo’y bumisita sa Eastern Province kasama nina Ambassador Antonio Villamor, Consul Victor Israel at iba pang mga Embassy representatives mula sa Riyadh para sa buwanang Embassy On-Wheels (EOW).

Si Col. Manabat ay itinalaga ni Pangulong Arroyo bilang Police Attache sa Saudi Arabia. Ang kanyang malawak na karanasan bilang isang tapat na nanunungkulan sa Philippine National Police (PNP) ng mahigit tatlumpung taon ang siyang naging daan upang siya’y mapili na maging kinatawan ng PNP at ng Department of Interior and Local Government (DILG) sa pagpapatupad at pangangalaga ng seguridad ng mga OFWs.

Dumating si Col. Manabat sa Saudi Arabia noong 24 February 2009 at kasalukuyang nakahimpil ngayon sa Philippine Embassy sa Riyadh.

Aking sinamantala ang pagbisitang iyon upang hingin ang kanyang saloobin sa mga kaganapang nangyayari sa kasalukuyan dito sa Eastern Province at maging sa buong Kaharian tulad ng pagpaslang sa isang Pilipina sa Alkhobar, ang pananamantala sa dalawampung Pilipina sa isang recruitment agency sa Dammam, ang pagkahuli sa 67 Pilipino sa isang party sa Riyadh, at ang marami pang rape cases at runaways na halos araw-araw ay may bagong inire-report sa tanggapan ng POLO Eastern Region Operations.

Narito ang buod ng panayam.

Lalong Pagdami pa ng OFWs

Ayon kay Col. Manabat ang pananatili ng mga OFWs dito sa Gitnang Silangan at maging sa buong mundo ay tatagal pa ng mahabang panahon dahil sa kasalukuyang kalagayan ng ating bansa kung saan ang kawalan ng mapapasukang trabaho (unemployment), kahirapan at patuloy na corruption, ang nagbubulid sa maraming mga Pilipino na mangibang-bayan at magtrabaho bilang OFW. Ang pagdami ng OFWs ay di lang nangangahulugan ng pagtaas ng remittances na pinadadala sa Pilipinas kung saan noong nakaraang taon ay nakapagtala ng 15.8 billion dollars, mas mataas ng 1.4 billion kumpara noong 2007 (sa taong 2009, inaasahang tataas pa ito), kungdi kaakibat ng pagdagsa ng OFWs sa iba’t ibang bansa ay ang tungkuling sila’y mapangalagaan at matiyak ang kanilang seguridad.

Ito ang isa sa mga dahilan ng pagkakatalaga ni Col. Manabat bilang Police Attache di lang bilang pagtupad sa Security Agreement na inilatag at pinagkasunduan ng Piipinas at ng Saudi Arabia.

Ang pagtatalaga kay Col. Manabat ay karagdagan sa mga kasalukuyang nanunungkulan sa Embahada, Konsulada at Regional Operations ng Pilipinas sa Saudi Arabia upang tumugon sa pangangailangan ng mahigit kumulang na 1.8 milyong Pilipino na nagtratrabaho at naninirahan sa bansang ito.

Pagpapatupad ng Batas

Ignorance of the law excuses no one

Sinabi ni Col. Manabat na patuloy ang pagpapatupad ng Embahada, Konsulada at ng POLO-ERO sa mga programa nito na ituro at ipa-alala sa mga Pilipino ang mga Batas na umiiral sa bansang ito upang maiwasan ang paglabag. Mainam na batid ng mga Pilipino ang mga ito at sikaping huwag lalabag upang di masuong sa kapamahakan.

Dapat na magkaroon ng malawakang “Awareness Campaign” among Filipinos sa mga bagay at mga gawaing bawal upang mapangalagaan ang sarili at di masangkot sa gulo o iba’t ibang mga kaso.

(Ang isina-tagalog na “Revised Saudi Labor Law” ay maaaring mahingi ninumang nagnanais na makakuha ng sipi nito. Ipagbigay-alam lang agad sa inyong lingkod.)

Maging Mapang-masid at Alerto

Ayon kay Col. Manabat, kailangang maging alerto at mapag-masid sa paigid upang maiwasan na maging biktima ng mga karahasan. Iwasan din na makatawag-pansin sa mga snatcher, holdaper o sa mga taong may masamang balakin tulad ng paglalakad ng mag-isa, paglalakad sa madilim at di mataong-lugar, paglabas ng mga mamahaling gamit sa daan, at pagkilos ng di nararapat.

Huwag Mangiming Mag-Report

Inihayag din ni Col. Manabat na hindi dapat matakot o mangimi na i-report sa kapulisan ng Saudi Arabia ang mga insidenteng nararanasan o nasasaksihan tulad ng phone-snatching, pangho-holdap, pagpapanggap na pulis, mga panloloko, at iba’t iba pang modus-operandis na nagaganap ngayon. Napakahalaga na mai-report ito upang masawata at mahuli ang perpetrators o ang gumagawa nito.

Kailangang makipag-tulungan ang bawat isa sa bagay na ito at wag matakot dahil higit na makakatulong ang pulisya sa mga ganitong pangyayari. Gamitin ang “999” dahil ito’y mabisa at agad na rumo-responde ang kapulisan kapag tumawag dito. Sa pagre-report dapat ibigay kung saang lugar naroroon at kung ano ang malapit na police station. Kung kaya’t ang mga bagay na ito ay dapat nating inaalam para magamit kapag kinailangan. “The Saudi system on this matter is in place and working kung kaya’t dapat nating gamitin”, dagdag pa ni Manabat.

Samantala, kapag ang kaso ay paglabag sa napagkasunduang kontrata, pagmamaltrato, pananakit at iba pang pang-aabuso, ito’y dapat i-report o itawag sa Embahada sa Riyadh, o sa Konsulada sa Jeddah at POLO-ERO sa Alkhobar-Dammam at karatig-pook nito. Makakatulong din na iparating sa ANS (Assistance to National Section) na naka-base sa Riyadh at Jeddah ang mga police at criminal cases.

Narito ang mga telepono na maaari ninyong tawagan:

4823559 o 4801918 (Philippine Embassy in Riyadh)
6658462 o 051-5124793 (Philippine Consulate in Jeddah)
8651951 o 050-1269742 (POLO-ERO)
055-5219613 (ANS-Jeddah)
050-5220534 (ANS-Riyadh)
055-1200795 (Col. Manabat, Police Attache)

Sa nakaraang Embassy On-Wheels, buong tiwalang ibinigay naman ni Ambassador Villamor ang kanyang mobile number sa mga Pilipinong naroroon upang siya’y tawagan kung kailangan. Ang butihing Ambassador ay maaring tawagan sa kanyang mobile number 050-3684145.

Ayon kay Col. Manabat, nakararating sa kanilang kaalaman ang mga iba’t ibang pangyayaring nagaganap sa kasalukuyan na sangkot ang mga Pilipino, at ito’y sinisikap nilang matugunan sa madali at agarang panahon. Sinisikap din ng Embahada na mabigyan ng patas at tamang solusyon ang mga problemang kinasasangkutan ng mga Pilipino.

Kanyang ipinamamanhikan sa lahat ng mga Pilipino na makipag-tulungan sa mga opisyales at representatives ng embahada sa pagbabantay at pagsawata sa kasamaan. Ang maging katuwang sa halip na maging sanhi ng problema.

Mga Reaksiyon

Sa artikulong “Ibayong Pag-iingat, Dapat Gawin” (inilathala noong 01 July 09)

Thanks sa news mo kc nalalaman naming ang mga nangyayari dito sa Saudi. Kaya tama lang ang ibayong pag-iingat ang dapat gawin. Sapagkat tau ang inaasahan ng pamilya natin sa Pilipinas. Subalit bilang mga Filipino overseas worker, sana andiyan lagi ang embahada natin na handang tumulong sa atin sa oras ng pangangailangan ng mga kababayan natin sapagkat pinakikinabangan din naman tayo ng pamahalaan natin pagdating sa remittances. Sa balita mo marami pa ang mga DH worker ang nangangailangan ng tulong na dapat sana ay bigyan ng pansin ng ating gobyerno. Salamat sa mensahe mo, kabayan. – Edgardo Nabara ng Jubail

(For comments and reactions, please eMail at
maxbringula@yahoo.com or send text message only on 00-966-502319535)

Proteksiyon at Paalala sa mga OFWs Higit Ngayon Kinakailangan

Max Bringula (Abante ME Edition, 12 July 2009)

Nakakabahala ang iba’t ibang kaganapan na ating nababalitaan ngayon na pagpatay, pagnanakaw, panloloko at pananamantala kung saan mga kapwa natin Pilipino ang kadalasang sangkot bilang biktima o kaya nama’y salarin.

Ang nakakalungkot na balita sa Pilipinang pinatay ng kapwa Pilipina noong Lingoo, 28 June 2009, ay isang halimbawa nito. Ang iba’y di makapaniwala na magagawa ito ng isang Pilipino sa kapwa niya Pilipino lalo na sa lugar na ito kung saan napakahigpit ng batas na umiiral.

Subalit di makakapag-sinungaling ang ebidensiyang nakalap ng kapulisan tulad ng fingerpints at ang mismong statement na ibinigay ng salarin na siya nga ang pumatay. Marami kasi ang maaaring mangyari kapag ang isang tao’y nagpupuyos sa galit. Napag-alaman na may history ng pagka-bayolente ang salarin at ang alitan ng dalawa ay malalim ang pinagka-ugatan. Dito’y parehong Piipino ang biktima at ang may gawa ng krimen.

Mula naman sa mapagkakatiwalaang source, ating napag-alaman na may isa tayong kababayan na nanamantala sa mga distressed workers o yung mga tumakas sa kanilang employer dahil sila’y sinasaktan at minamaltrato o kaya’y hinahalay at tinatangkang patayin. Ang pobreng OFW ay lalapit sa kababayan natin na ito na nagpapanggap na siya’y taga-POLO o taga-Embahada. Tutulungan naman niya ang nasabing OFW, patitirahin sa kanyang bahay at papangakuang ipapasok ng trabaho o kaya’y pauuwiin na may katumbas na halaga. Ang tulong pala na iyon ay may karampatang kapalit o kaya’y isang transaction na pagkakakitaan. Dito’y malinaw na ang ang biktima at nambibiktima ay kapwa Pilipino natin.

Marami pang tulad nito ang nagaganap at nababalitaan sa ating kapaligiran. Mga taong may maiitim na budhi at balakin sa kapwa. At ito’y nangyayari at ginagawa di lamang ng ibang lahi kungdi maging ng kapwa natin kababayan. Ito’y nagaganap di lamang sa ating bayan, kungdi maging sa lupaing itong ating kinatatayuan. Sabi nga ng kasabihang madalas nating naririnig “walang maloloko kung walang magpapaloko”.

Sa ganitong mga pagkakataon, higit ngayong kinakailangan na ma-proteksiyonan at mapa-alalahanan ang kapwa natin OFWs upang di nila sapitin ang mga di kanais-nais na kaganapang nabanggit.

Anu-ano ba ang mga dapat gawin upang mapangalagaan ang ating mga kababayan sa kuko ng mga ganid at mapagsamantalang nilalang?
Sa puntong ito, hindi maiiwasan na ang ganitong tanong ay salubungin ng isang katanungan din na tumutungkol sa kapasidad ng pamahalaan o ng representative nito na ma-proteksiyunan ang mga OFWs at maipaglaban ang kanilang karapatan. Mga tanong na magpapasiyasat at hahamon sa bawat isang OFW ng kanilang bahagi kung may kalapastanganan mang nagaganap o pagsuway sa ating karapatang-pantao.

Mga tanong na tulad ng:

Nakararating ba sa kanilang kaalaman ang iba’t ibang kaganapang kinasasangkutan ng mga OFWs tulad ng pagmamaltrato at panghahalay sa mga domestic helpers, pananakit, pagpaslang, pagnakaw at iba’t iba pang kaapihan kanilang nararanasan?

Naipararating din ba sa kaalaman ng mga OFWs ang mga ganitong pangyayari upang sila’y mabigyan ng babala at makapag-ingat?

Kung nakarating man, may karampatang aksiyon bang naibibigay at may mga nalutas na ba sa mga kasong ito o nakalimutan na lamang?

May mga programang bang nakalaan ang pamahalaan lalo na ang OWWA (Overseas Workers Welfare Administration) para mapangalagaan ng OFW ang sarili tulad ng awareness campaign?

May negosasyong bang nagaganap o pakikipagtulungan ang Embahada ng Pilipinas sa kapulisan ng bansang ito upang maingatan ang mga Pilipinong nagtratrabaho rito?

Ilan lang ang mga ito sa katanungang mahalagang malapatan ng akmang kasagutan at aksiyon mula sa kinauukulan.

Pagkat kaakibat ng pagdami ng OFWs at pagtaas ng remittances taun-taon at bilang pagpapahalaga sa mga tinaguriang “Bagong Bayani” ay ang tungkuling sila’y mapangalagaan at maproteksiyunan laban sa karahasan, pagmamaltrato at pagyurak sa dangal at karapatan. Ngayon higit kaylan pa man na nangangailangan sila ng proteksiyon.

Aking kinapanayam kamakailan si Col. Jimmy Manabat, PNP Senior Superintendent, na itinalaga ng Pilipinas upang maging Police Attache sa Saudi Arabia. Sa aking pagtatanong, aking inalam kung ano ba ang mga programa ng Embahada upang maproteksiyunan ang libo-libong OFWs na naririto sa Saudi Arabia. Aking sinikap na kamtin ang kasagutan sa mga katanungan sa itaas. Ang buod ng panayam na ito ay aking ilalathala sa susunod na edition ng Tinig sa Disyerto. Abangan po ninyo.

(For comments and reactions, please eMail at
maxbringula@yahoo.com or send text message only on 00-966-502319535)

Simpatiya kay Laila / Suspect Umamin Na


Max Bringula (Abante ME Edition, 06 July 2009)

Bumuhos ng simpatiya mula sa Pilipino ang pagkakapaslang kay Laila Castano na naganap mismo sa loob ng kanilang tahanan sa may First Street, Alkhobar noong Linggo, 28 June 2009. Bangkay na nang maratnan ni Ric Castano ang asawa nang siya’y umuwi galing sa trabaho sa Aramco-Abqaiq.

Marami ang di makapaniwala at marami ang nalungkot at labis na nag-alala at natakot sa dumaraming krimen na nagaganap kung saan ang mga kababayan natin ang kadalasa’y biktima.

Naging usap-usapan ang pangyayaring ito sa bawat lugar na kung saan may mga Pilipinong nakatira o nagtratrabaho. Maging ang ibang lahi ay namahagi ng sipi ng ating inilathalang “Ibayong Pag-iingat, Dapat Gawin” (Abante Middle East Edition, July 01) sa mga kakilala nilang Pilipino bilang pagmamalasakit na mag-ingat.

Sadya ngang nakalulungkot kung iisipin ang sinapit ng Castano Family. Ang mag-asawang Ric at Laila Castano ay naka-iskedyul na sanang uuwi ng Pilipinas ng July 4, bagamat may naunang booking sila ng June 15, subalit di ito natuloy at na-reschedule ng July 4 dahil kailangan munang ma-renew ang Iqama ni Ric. Sabik na sabik na sanang umuwi si Laila, na taga Atimonan, Quezon, pagkat ilang araw na lamang ay ipapanganak na ang una niyang apo sa panganay na anak, subalit di na nga dumating ang takdang araw na iyon.

Mahigit dalawampung taon na sina Ric at Laila sa Saudi at dito na lumaki at nag-aral hanggang mag-haiskul ang kanilang dalawang anak na si Maricel at Mark Cesar. Ang panganay na si Maricel ay isa ng ganap na doktora ngayon habang si Mark naman ay nasa 3rd year na sa Engineering na parehong sa Dela Salle nag-aral ng kolehiyo.

Dahil sa tagal ng mag-asawa dito sa Saudi, naging kampante na ang kanilang kalooban na manatili rito kumpara sa atin at marahil dala na rin na mas kumbinyente ang pamumuhay rito kaysa sa Pilipinas at sa dahilang may magandang pinagkikitaan pa naman. Yun nga lamang, ang maganda sanang buhay at pangarap ay kagyat na naputol gawa ng di inaasahang pangyayari.

***********

Samantala, sa huling development sa kasong ito, umamin na at nakilala ang suspect na pumatay kay Laila, na isang kaibigang babae (name withheld) at matagal ng kakilala ng biktima sa halos dalawampung-taon na. Ang salarin ay sinasabing madalas na pumapasyal sa bahay ng pinaslang at ng araw na iyon ay nagkaroon ng alitan ang dalawang ginang na humantong sa pagpatay ng huli kay Laila.

(For comments and reactions, please eMail at
maxbringula@yahoo.com or send text message only on 00-966-502319535)

Alaala ni MJ - Ang Pagsasara ng Telon

Max Bringula (Abante ME Edition, 04 July 2009)

Isa na namang sikat na mang-aawit ang nadagdag sa bilang ng mga iniidolo ng tao na kahiman pumanaw na ay mananatiling buhay sa puso’t isipan ng mga tagahanga nito.

Binawian ng buhay noong Huwebes ng hapon, 25 June 2009, ang tinaguriang “King of Pop” na si Michael Jackson. Marami ang nalungkot at lumuha nang mabalitaan ang pagpanaw ng kanilang idolo. Ang iba’y di makapaniwala na patay na ang hinahangaang mang-aawit na napagpasikat ng moonwalk dance at mga awit na pumatok sa Billboard Chart. Ilan sa mga ito ay ang “Thriller”, “Billie Jean”, “Beat It”, “The Girl is Mine” at “Wanna Be Startin’ Somethin”.
Maging ang mga pinuno ng ibang bansa ay nagbigay ng kanilang pagpapahayag ng kalungkutan gaya ni Venezuelan President, Hugo Chavez at South Korean President Kim Dae-jung. Buong mundo ay nakipagluksa.

At tulad ni Elvis Presley na pumanaw noong August 16, 1977 at ni John Lennon na nasawi noong December 08, 1980, si Jackson ay maituturing na music icon kung saan ang alaala nito ay tiyak na laging sasariwain taun-taon lalo na ng mga panatikong tagahanga. Ngayon pa lamang, natitiyak kong darami ang magtatangkang magpatayo ng monumento ni MJ bilang pag-alala sa kaniya, at ang pagsulat at pagtatanghal ng tribute sa King of Pop.

Una kong narinig si MJ sa awit na “Ben” na siyang theme song ng pelikulang “Willard” na pumatok sa takilya noong araw. Ito’y isinapelikulang muli nitong 2003.

Dapat sana ay magkakaroon ng “comeback concert” si MJ kung saan makakasama niya ang Filipino sensation na si Charice Pempengco sa concert na inihahandang ganapin sa 13 July 2009 na may pamagat na “The Final Curtain”.

Marahil ang concert na ito ay pagpapahiwatig na ni MJ ng kanyang nalalapit na pag-alis na kung kaylan ay di rin niya lubos na batid subalit marahil ito’y kanya ng nararamdaman kung kaya’t sinikap na maghandog ng kanyang comeback concert na “The Final Curtain”.

Sa mga tagahanga ni MJ, siya’y isang alaala na lamang. Alaalang babalikan at tatanaw-tanawin sa mga darating na araw, buwan at taon. Isang maliwang na katotohanan na ang buhay ay hiram lamang at di natin hawak. Darating ang araw ng paglisan at pagbabalik sa alabok. Kung kaya’t mainam na pahalagahan ang bawat araw at sikaping nakalulugod sa Kaniya ang ating buhay.

Tapos na ang awit. Isinara na ang telon. Patay na ang kanina’y nagkikislapang mga ilaw. Itinigil na rin ang pag-inog ng kamera. Wala na ang nakakabibinging palakpakan kungdi ang nakalulunos na pagtangis ang iyo ng maririnig.

****************

Embassy On-Wheels sa Eastern Province Muling Gaganapin sa 2-3 July 2009

Inihayag ng Philippine Embassy sa Riyadh na muling dadalhin ang consular services sa Eastern Province sa darating na Huwebes at Biyernes, 02 and 03 ng July 2009. Ito’y isasagawa sa IPSA (International Philippine School in Alkhobar) sa mga sumusunod na petsa at oras:

8:00 AM – 5:00 PM (Thursday, 02 July 2009)
8:00 AM – 12:00 pm (Friday, 03 July 2009)

Tulad ng dati, ang pagkakaroon ng machine-readable passport (MRP) ang pinaka-main activity ng buwanang Embassy On-Wheels (EOW).

Noong nakaraang EOW na ginanap noong 28 at 29 May 2009, may 617 new applications ang na-process at tinatayang maire-release ito sa darating na Huwebes at Biyernes. Gayunpaman, mas mainam na i-verify kung ito’y available na o dumating na mula sa DFA sa Maynila. Maaaring alamin ito sa website ng Embassy na
www.philembassy-riyadh.org.

Samantala, marami ang nagtatanong kung Kaylan muli magkakaroon ng Overseas Absentee Voting Registration sa Eastern Province pagkatapos ng apat na linggong sunod-sunod na isinagawa noong 14 May hanggang June 05 ng taong kasalukuyan. Pagkat dalawang buwan na lang halos ang natitira sa schedule na ibinigay ng COMELEC para sa OAV Registration na magtatapos ng 31 August 2009, subalit hanggang ngayo’y wala pang registration na naulit bagama’t nagbigay na ng request ang Philippine Embassy sa Riyadh at ang POLO-Eastern Region Operations sa COMELEC at DFA ng extension ng registration, ayon kay Labor Attache David Des T. Dicang.

Sana’y di pa huli ang lahat para mabigyan ng pagkakataon ang libo-libong mga OFW’s sa Eastern Province na nais makaboto sa darating na national election sa May 2010.

(For comments and reactions, please eMail
maxbringula@yahoo.com)

Ibayong Pag-iingat, Dapat Gawin

Max Bringula (Abante ME Edition, 01 July 2009)

Pinay, Pinatay Pagkatapos Nakawan

Isang kalunus-lunos na balita ang inihatid sa atin nitong Lunes ng umaga tungkol sa isa nating kababayan na pinatay sa loob ng kanilang bahay sa Alkhobar sa may First Street na malapit sa Al Fakhry Hospital noong Linggo matapos na ito’y pagnakawan.

Ang biktima ay kinilalang si Laila Castano, na ang mister ay nagtratrabaho sa Aramco-Abqaiq. Kasalukuyan ngayong iniimbistigahan ng kapulisan ng Saudi Arabia ang kaso, sa pakikipagtulungan ng Embahada ng Pilipinas at POLO- Eastern Region Operations, upang alamin kung papaano ito naganap at sino ang may kagagawan ng krimen

Ayon sa report, maaaring nasalisihan si Laila ng magnanakaw at nakapasok ito sa bahay. Si Laila ay araw-araw na naiiwan sa bahay kapag pumapasok na ng trabaho ang kanyang mister, at siya’y nag-iisa lamang dito kapag wala ang asawa.

Nalaman ng asawa ang malagim na naganap sa kanyang maybahay pag-uwi nito at maratnan ang duguan at wala ng buhay na si Laila.

Sadyang napaka-delikado na ng kapanahunan natin ngayon kumpara noong araw. Marami ng masasamang elemento ang aaligid-aligid sa atin. Kung kaya’t ibayong pag-iingat ang dapat gawin. Marami na ang ganitong pangyayari ng pagnanakaw at karahasan na humahantong minsan sa kasawian ang ating nababalitaan, di lamang sa mga Pilipino kungdi maging sa ibang lahi rin. May kumpirmadong naganap at ang iba’y bali-balita lamang. Gayunpaman, dapat na mag-ingat pa rin.

Dapat na magbigay babala at paalala sa ating mga kababayan ang mga ganitong pangyayari. Marami ng mga modus operandi ang ginagawa ngayon ng mga may maiitim na budhi na ang tanging pakay ay magsamantala sa kahinaan ng iba at gumawa ng masama.

Hindi iilan ang nahablot ang kanilang celfon o ng back pack habang naglalakad. May tinututukan ng baril o matulis na bagay habang nagwi-withdraw sa ATM. May nadurukutan habang nakapila para magpadala ng remittance. May nabibiktima ng “hulog pera”, o ng fake na celfon na binibenta sa murang halaga.

Maging ang inyong lingkod ay naging biktima ng karahasan nang minsan ako’y maholdap ng tatlong kabataang Saudi sa may kalye ng Alkhobar at makuha ang aking PDA dalawang taon na ang nakalipas Nais kong manglaban noon sa pilit na kumukuha ng aking PDA pagkat may kamahalan ang bili ko niyon, subalit sinisimulan na nila akong saktan at pagtulungan kung kaya’t ibinigay ko na lang iyon kaysa buhay ko naman ang maging kapalit.

Upang matiyak ang kaligtasan, anu-ano ba ang pag-iingat na dapat nating gawin?

1) Maging listo sa lahat ng oras. Kapag naglalakad, igala ang paningin sa kaliwa’t kanan, sa harapan at likuran upang bantayan kung may kakaibang kilos ang nakakasabay lalo na ang ibang lahi.

2) Huwag agad magbubukas ng pinto. Lahat naman ng pintuan sa ating tinitirhan at inuupahan ay may maliit na butas kung saan masisilip mo kung sino ang kumakatok at nais pumasok. Kung hindi kilala at wala ka namang hinihintay na darating ay huwag nang papasukin hanggang di siya nagpapakilala o magsasama ng kakilala mo.

Kahit na naka-suot uniform ng pulis o isang mutawa ang nais pumasok, wag agad pagbubuksan hanggang di nagpapakita ng papel o authorization, permit o warrant upang sila’y pumasok ng iyong bahay. Kung makapasok man sila ay wag agad mag-panic, kungdi maging mahinahon.

3) Huwag magpapaniwala agad. Kung may makikilala o kakausap sa inyo na di kilala lalo na ng ibang lahi kahiman marunong siya o matatas mag-Tagalog, huwag agad magpapadala sa kanilang sinasabi o panghihikayat. Gamitin ang common sense o wisdom at pakiramdam kung tama ba o totoo ang sinasabi ng iyong kausap. Huwag masisilaw sa salapi o sa mga bagay na kumikinang.

4) Huwag maglalakad ng mag-isa o sa madilim na lugar. Hangga’t maaari, sikaping may kasama lagi kapag maglalakad patungong pamilihan o kung magpapadala ng pera, o kung may pupuntahan. At huwag daraan sa madilim na lugar na wala halos ibang taong naglalakad.

5) Huwag magdadala ng mamahaling bagay. Kung hindi naman kailangang dalhin ay huwag ng magdala ng mamahaling bagay at wag maglalabas ng gamit na makatatawag-pansin kung hindi naman kailangang ilabas ito tulad ng celfon o laptop.

5) Laging i-lock ang pinto ng sasakyan. Pagkapasok na pagkapasok pa lang sa sasakyan ay i-lock kaagad ito at habang nasa loob ng sasakyan panatilihing naka-lock ang pinto pagkat baka may biglang sumalisi at pumasok.

6) Manalangin lagi kapag lalakad o aalis. Mabisa pa rin ang panalangin lalo ang tamang panalangin. Laging lalakipan ng panalangin ang mga pag-iingat na ating ginagawa, pagkat Siya ang higit na makapag-iingat sa atin.

****************

Pinay Na-Rescue

Sa sama-samang puwersa ng POLO-Eastern Region Operations sa pangunguna ni Labor Attache David Des T. Dicang kasama si Welfare Officer Edgar Lim, na-rescue ang isang domestic helper na salit-salit na pinagsamantalahan ng kanilang Arabian recruiter na nagngangalang Abu Khalid. Nasa pangangalaga na siya ngayon ng POLO-ERO.

Ayon sa Filipina domestic helper (name withheld), dalawampu raw sila roon na dinala sa recruiting office sa Dammam at doo’y pinagsasamantalahan ng may-ari at mga kaibigan nito’t mga anak.

Sinisikap ngayon ng Embahada ng Pilipinas sa tulong ng Saudi Police na mailigtas pa ang mga natitirang mga Pilipina na naroroon.

(For comments and reactions, please eMail
maxbringula@yahoo.com)