PBL Season 7, Magsisimula Na!

Ang PBL ExeCom sa kanilang pulong na isinagawa para sa pagsisimula ng PBL Season 7.

by Max Bringula Chavez
(published in Abante ME Edition, 03 April 2012)

Ang pinakaka-abangang liga ng basketball sa Eastern Province, Saudi Arabia, ang Pag-asa Basketball League o PBL na ngayon ay nasa Season 7 na ay muling na namang mapapanood ng mga tagasubaybay at supporters nito simula sa April 6, 2012.

Sa isang grand opening ang inihahanda ng pamunuan ng Pag-asa Community Support Group, na gaganapin sa Al Jazeera International School in Dammam simula sa ika-apat ng hapon ng Biyernes, magkakasama-sama ang mga bigating koponan ng PBL para pasinayahan ang paninimula ng PBL Season 7.

Sa temang “Encourage One Another and Build Each Other Up” ang liga sa taong ito ay opisyal na tatawaging PBL Season 7, CWWSA Cup 2012.

Tinatayang magiging isang makulay at kapana-panabik ang Season 7 tulad ng mga nakalipas na taon kung saan maraming koponan ang lumalahok at umaasa na makamit ang prestihiyosong tropeo ng PBL.

Sa taong ito, may labing-siyam na koponan ang nakapasok na hinati sa dalawang Division, ang Class A Category na may anim na koponang maglalaban-laban at ang Class B naman na may labing-tatlong koponan.

Inaasahang magiging maigting ang labanan sa Division A kung saan magkakaharap ang mga malalakas na koponan ng PBL tulad ng:

GMC Thunder – ang 3-times PBL Champion sa tatlong taon na magkakasunod mula Season 3 hanggang Season 5 / JIL Theos – 2-times PBL Champion (Season 1 and Season 6) / at ang perennial contender na JCLORIM Warriors.

Kasama ng mga nabanggit ang tatlo pang koponan na nakapasok sa Division A at kinakitaan ng kakaibang puwersa ng kanilang manlalaro. Ito’y ang DBD-Agape, CLSF-Emman at CCWIM 1. Ikalawang pagkakataon na ng DBD-Agape na mapabilang sa Division A, at ang CLSF-Emman at CCWIM 1 naman ay ngayon pa lamang mapapasali sa Division na ito.

Sa Division B naman, magsasagupa ang mga sumusunod na koponan:

Group B1: DDU 1, JTLG Corinthians, CLSF-Emman 2, CLSF-TJM4, POPCF Knights at PFC / Group B2: DDU 2, JCPP, JCILSA Kawal, CLSF-Emman 3, JUSL, JLRR at CCWIM 2.

Samantala, tulad ng mga nakaraang Seasons ng PBL, ang Opening Ceremony ay sisimulan sa makulay na Parade of Teams kasama ng mga naggagandahang Muse ng bawat koponan. Pagkatapos nito’y magkakaroon ng Oath of Sportsmanship at ang paggawad ng parangal sa mga napiling Best in Uniform, Most Organized Team at ang PBL Best Muse of Season 7.

Ang Inspirational Remarks ay dadalhin naman ng representatives ng Embahada ng Pilipinas mula sa POLO-ERO (Eastern Region Operations). Inaasaan din ang pagdalo ng ilang mga Filipino Community leaders at personalities, kasama na ang mga mamamahayag at tagapagbalita ng iba’t ibang telebisyon at pahayagan tulad ng The Filipino Channel ng ABS-CBN Middle East sa pangunguna ng ating kasamahan na si Florante Catanus, at ng mga tagapagbalita ng Abante ME Edition.

Sa ikalawang pagkakataon, muling magkakaroon ng Cheering Competition na siyang isa sa mga highlights ng PBL Opening. Sinimulan ang nasabing competition noong nakaraang Season 6 na siyang nagparagdag ng kulay at sigla sa PBL. Kaya’t napagpasiyahan ng pamunuan nito na ipagpatuloy ang competition di lamang sa taong ito kungdi sa bawat seasons na darating.

Sa pangunguna ng 3-times Commissioner ng PBL (Season 5, 6 and 7) na si Tim Mallari, kanyang ipinararating ang paanyaya ng PBL ExeCom sa lahat ng mga basketball aficionados na suportahan ang ligang ito na ang layunin ay di lamang upang magkaroon ng physical fitness at mental alertness ang mga miyembro nito at bawat manlalaro, kungdi ang maging kabahagi sa pag-abot sa mga kapus-palad nating kababayan sa pamamagitan ng iba’t ibang programa ng Pag-asa Community Support Group para sa mga distressed OFWs.

Ang 2012 Executive Committee ng PBL ay binubuo ng mga sumusunod:

Tim Mallari – Commissioner / Robert Yumang – Asst. Commissioner / Arthur S. Valeros – Secretary & Finance / Ruben Panzo – Technical Committee Head / Rene Villasante – Table Committee Head / Frederick Belen – Support Head / Jeremy Perez – Logistics Head / Henry Ayangco – Asst. for Technical Committee / Junald Pellazar – Asst. for Table Committee / Jessie Veloso – Asst. for Logistics / at Max Bringula – PBL Adviser and Program Committee Head.

Kasama rin ng ExeCom sa pagpapatupad ng liga ay ang Table Committee Members na sina Melchor Navarra (DBD), Jun (JCLORIM), Tony Apo (POPCF), Bong/Jonwel /Allan (JCILSA), Joel/Toto/Arniel (CLSF), at ang Members ng Support na sina Luis (JCLORIM), Albert (JCPP), at Fher (DDU).

Ang tournament date ng PBL Season 7 ay tinatayang magtatagal ng mga hanggang tatlong buwan, at ito’y gaganapin tuwing Huwebes at Biyernes mula alas-singko ng hapon hanggang alas-nuwebe ng gabi.

First Membership Meeting ng PSME sa 2012

Ang ilan sa mga opisyales at miyembro ng PSME-SA. Si Engr. Ransam Pirote, Bagong Bayani awardee at past president ng PSME-SA sa isang pagsasanay na kanilang ginanap. Si Engr. Ben Cesora at Engr. Gabby Ignacio sa isang okasyon ng PSME-SA.

by Max Bringula
(published in Abante ME Edition, 04 March 2012)

Isang “First Membership Meeting” ang idaraos ng Philippine Society of Mechanical Engineers, Saudi Chapter (PSME-SA) para sa taong 2012. Ito ang inihayag ng kasalukuyang Pangulo nito na si Engr. Mamerto O. Juanite.

Gaganapin ang nasabing pulong sa Al Gosaibi Recreation Center, Al Gosaibi Hotel, Alkhobar, Saudi Arabia, sa March 9, 2012, kung saan inaanyayahan ang lahat ng Filipino Mechanical Engineers at Mechanical Engineering Practitioners sa Saudi Arabia na dumalo.

Sa temang “Strengthening Technical Competence Through Continuing Professional Education”, tatalakayin sa okasyon ang paglilinang at pagpapahusay pa ng kakayahan at kaalaman ng mga inhenyero sa pamamagitan ng patuloy na pag-aaral.

Sa ganitong layunin, di lamang financial benefits ang makakamit sa pagtratrabaho sa abroad kungdi ang mapalago ang kani-kanilang karerang kinabibilangan at maisagawa ang hangaring makapag-ambag sa ikauunlad at ikatatagumpay ng mechanical engineering profession.

Ang PSME ay unang itinatag sa Pilipinas noong taong 1952. Binuo ito upang mapanatili ang integridad sa nasabing propesyon sa pamamagitan ng pagsisikap na mapahusay ang pagganap sa napiling larangan. Ito’y kanilang naisasakatuparan sa pagsasagawa ng iba’t ibang symposium at seminars, conventions, at patuloy na komunikasyon di lamang sa mga miyembro nito kungdi sa lahat ng certified at practicing mechanical engineers.

At upang mapalawak pa ang matutulungan at maaabot ng grupo, kanilang binuo ang Saudi Arabia chapter noong 1990 kung saan ang pinaka-base o headquarter ay ang Alkhobar.

Sa kasalukuyan, ang PSME – Saudi Arabia Chapter ay binubuo at pinamamahalaan ng mga sumusunod na opisyales:

Mamerto O. Juanite – President / Alexis M. Serapio – VP Internal /Jeffrey F. Singson – VP External / Winifredo A. Oracion – Secretary / Arculo L. Concon – Treasurer / Rio A. Pascasio – Auditor / Ronaldo D. Liwanag – Business Manager / Alan Krishner D. Abellana – Asst. Secretary / Cesar P. Orcena – Asst. Treasurer / Henry P. Regalado – Asst. Auditor / Gregory C. Sugano – Asst. Business Manager / Virgel C. Ang – BOD / Demostenes S. Deceo – BOD / Peter B. Consebido – BOD / Arsenio M. Ortega – BOD at Rohenio L. Pangilinan – Past President

Para sa mga nagnanais na makabilang sa grupo o kung may katanungan at paglilinaw kayo na nais ninyong ipaabot sa PSME-SA, maaari kayong bumisita sa kanilang website, http://www.psme-sa.com/ o kaya’y mag-eMail sa info@psme-sa.com.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Numero ng Embahada sa Kuwait

Puwede po ba na mahingi ang telephone number ng Embahada ng Pilipinas sa Kuwait. Maraming salamat po. – from Vicky of Dammam, Saudi Arabia.

Hi Vicky, eto ang numero na puwede mong tawagan: 00(965)-25346507 / 00(965)-25346508 / 00(965)-25325162

Eto naman ang kanilang address:
Block 7, St. 103, Villa No. 44, Jabriya
P.O. Box 26288 Safat 13123, Kuwait

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Karagdagang Medical Personnel at Pagkakaloob ng Day Off sa Housemaids

by Max Bringula
(published in Abante ME Edition, 10 Feb 2012)

Inihayag kamakailan lamang ng Ambassador ng Pilipinas sa Saudi Arabia, Hon. Ezzedin Tago, ang naging resulta ng kanyang pagbisita sa Saudi Ministry of Health (MOH) nitong 18 January 2012.

Sa naganap na pulong sa pagitan ng Ambassador at ni H.E. Dr. Abdullah A. Al-Rabeeah, Saudi Minister of Health, tinalakay ang proposal na Training Program for Nurses na isang joint collaboration ng MOH at ng DOLE (Department of Labor and Employment). Ang programa ay naglalayon na mapainam pa ang kaalaman at abilidad ng mga nurses na nagtratrabaho sa Saudi Arabia, at maragdagan ang mga medical personnel, di lamang ng nurses, kungdi maging sa research at academe o sa larangan ng pagtuturo.

Ayon sa statistics ng Saudi Ministry of Health, mayroong 117,000 Filipinos na nagtratrabaho sa medical sector ng bansa, at karamihan sa kanila ay nurses.

Nakasama ni Amb. Tago sa pagbisita sina Second Secretary and Consul, Roussel Reyes, at Labor Attache Albert Valenciano.

Samantala, inihayag kamakailan ng Philippine Embassy sa Riyadh ang kasunduan ng Saudi Embassy sa Manila at ng DOLE patungkol sa ipapatupad na kontrata para sa mga household service workers (HSW) na nagtratrabaho sa Saudi Arabia.

Magkakaroon na ng standard employment contract ang mga HSW kung saan malinaw na nakasaad kung sino ang may responsibilidad na mag-repatriate sa HSW sa oras na sila’y pauuwiin at ang pagbibigay ng day-off o weekly rest days.

Batay sa bagong kontrata na ipapatupad, magkakaroon na ng day-off o isang araw na pahinga o rest day sa isang linggo ang HSW o yung mga nagtratrabaho na katulong, at walong oras na pahinga araw-araw.

Gayundin, maaari na na ang HSW ang magtago ng kanilang passport at di na kukunin ito ng employer. Pagkakalooban din sila ng free ticket kada taon. (Source: Arabic Daily, Al-Hayat)

Napagkasunduan din na ipagbubukas ng employer ang kanyang katulong ng bank account kung saan doon itra-transfer ang suweldo ng katulong kada buwan. Naatasan din ang mga employer na tiyakin na mabigyan ng disenteng accommodation o housing at tamang pagkain o food allowance ang kanilang mga katulong.

Bukod pa rito, ang employer din ang dapat magbayad ng lahat ng visa-related fees ng kanilang katulong mula sa pagdating, pananatili at pag-alis sa Saudi. Dapat ding itrato ng mga employer ang kanilang katulong ng tama at maayos, at hindi pagtratrabauhin sa ibang bahay.

Upang matiyak na mapapatupad ang isinasaad sa bagong kontrata, kailangan na may approval ng Saudi Ministry of Foreign Affairs at ng DOLE ang bawat kontrata ng HSW. Maaaring ding i-refer ng Ministry of Foreign Affairs ang kontrata sa Ministry of Labor kung kakailanganin.

Bagama’t di nabanggit ang halaga ng suweldo ng isang HSW, ito’y tinatayang ayon pa rin sa ipinatupad ng POEA noon pang December 2006 na US Dollars 400.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Renewal ng Passport

Magre-renew po sana ako ng passport. Nandito po ask sa Jubail. Saan po ba dapat mag-renew? – from Harold Ramos in Saudi Arabia.

Dear Harold, may Consular Outreach ang Embahada kada buwan dito sa Eastern Province, o yung tinatatawag nating Embassy On-Wheels. Ito’y ginaganap sa Al Jazeera School Dammam, sa may Rakah District, Alkhobar. Dito ka pumunta kapag nais mong mag-renew ng passport. Ang susunod na schedule ay sa 23 and 24 ng February 2012. Subalit bago yan, kailangang magpa-appointment ka muna. Narito ang pwede mong pagpiliang gawin para makakuha ng appointment. - Max

Mag-email sa: eowappointment@philembassy-riyadh.org
(Ilagay sa eMail ang iyong kumpletong pangalan, contact number, at ang siyudad sa Saudi Arabia kung saan ikaw ay nagtratrabaho o naninirahan)

Mag- SMS (text): send a text message to 0540269731. Ganito ang ilalagay sa text. Example: EOW Juan Santos Dammam

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Paalala sa mga First-Time Overseas Filipino Workers

by Max Bringula Chavez
(published in Abante ME Edition, 31 Jan-12)

Sa bagong Guidelines na inilabas ng Philippine Bureau of Immigration kamakailan, may mga mahahalagang inpormasyon na dapat malaman ng mga bagong manggagawa o yaong first time na magtratrabaho sa abroad.

Ang circular ay lumabas noong 12 January 2012 at ngayo’y malawakang ipinatutupad sa lahat ng international airport at sea port ng bansa.

Narito ang mga dapat tandaan ng kapwa natin OFWs lalo na yaong mga aalis pa lamang ng Pilipinas for the first time:

1) Tiyakin na taglay ninyo ang mga sumusunod na dokumento na siyang isa-submit sa Immigration sa Pilipinas para makalabas ng bansa – valid passport, visa, airline o sea craft ticket, at overseas employment certificate (OEC).

Dapat na ang mga nabanggit na dokumento ay validated ng Labor Assistance Center (LAC). Ang LAC ay matatagpuan sa mga international airports at seaports ng Pilipinas.

2) Tiyakin na ang visa ninyong hawak o nakatatak sa inyong passport ay valid at lehitimo. Kung may discrepancy o pagkakaiba sa position/job title kumpara sa nakalagay sa OEC, dapat magbigay ang Ahensiya na nag-process ng inyong pag-alis ng Undertaking on Visa Usage (VVU), at ang manggagawa naman ay dapat mag-submit o gumawa ng Declaration of Awareness and Consent. Ang dalawang dokumento na ito ang dapat ipakita sa LAC para i-validate ang inyong papeles at mapayagan kayong umalis.

3) Ang mga Household Service Workers (HSW) ay di sakop ng Undertaking on Visa Usage (VVU). Kung kaya’t dapat ang visa na hawak ay yung para sa Household Service Workers lamang. Hindi puwedeng gumamit ng ibang visa. Ang HSW ay di paaalisin ng bansa kapag magkaiba ang visa niya sa kanyang aktuwal na trabaho.

4) Tiyakin na ang inyong papeles ay hindi “reprocess” o yaong ang dokumento na inyong tangan ay para sa iba pero ipinagamit sa inyo. Malalamang “reprocess” ang inyong dokumento kung ang job description/position sa visa ay iba sa nakasaad sa OEC, PDOS Certificate, at iba pang mahahalagang papeles tulad ng kontrata. O kaya naman, ang pangalan ng employer o ng kumpanyang pagtratrabauhan ay magkaiba sa nakasaad sa work visa at sa OEC.

Pag nagkagayon, di papaalisin ng Immigration ang manggagawa at kukumpiskahin ang mga dokumentong hawak at dadalhin sa POEA upang doon ay magkaroon ng imbestigasyon.

Para naman sa mga Balik-Manggagawa (o returning workers) at nagbabakasyon lamang, kailangan ding tiyakin na tangan ang mahahalagang dokumento kapag babalik na sa bansang pinagtratrabauhan tulad ng passport, valid visa, airline o sea craft ticket, at OEC na in-issue ng POEA kung sa atin kumuha o ng POLO kung sa bansang pinagtratrabauhan kumuha.

TSD Readers’ Corner:
(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Pagkuha ng OEC (Overseas Employment Certificate)

Ako po si Marilou na nagtratrabaho sa Dhahran, Saudi Arabia. Saan po ako puwedeng makakuha ng OEC? Magbabakasyon ako ngayong March 20, 2012. Gusto ko sanang dito na kumuha. Ano po ba ang kailangang dalhin at saka anong araw at oras po bukas ang opisina at saang lugar po? – from Marilou in Saudi Arabia.

Marilou, may schedule na inilaan ang POLO-Eastern Region Operations sa mga gustong kumuha ng OEC. Ito ay isinasagawa tuwing Miyerkules at Huwebes mula ala-una hanggang alas-kuwatro ng hapon. (1:00-4:00) sa Al Bustan Hotel, Alkhobar. Ang mga kailangan mong dalhin ay valid passport at kopya ng e-Ticket (o airline ticket). - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Matinding Paglamig, Naranasan sa Buong Saudi

by Max Bringula Chavez
(published in Abante ME Edition, 29 January 2012)

Ang nararanasang labis ng paglamig ng panahon sa buong Saudi Arabia mula pa noong Biyernes, 20 January 2012, ay tinatayang siya ng pinakamalamig sa nakalipas na dalawampung taon.

Halos zero degrees na ang temperatura sa ibang lugar lalung-lalo na sa bulubunduking bahagi ng Central at Northern region ng Saudi Arabia tulad ng Al Jouf, Tabuk, Hail, Arar, Turaif, Hafr Al Batin at Al Qaisumah. Gayundin sa bahagi ng Makkah at Madinah.

Bagamat ang tag-lamig na ito’y di lamang sa Saudi Arabia kungdi sa buong Arabian Peninsula na kinabibilangan din ng mga bansang Bahrain, Kuwait, Qatar, Oman, UAE, kasama ang Yemen.

Ayon sa Presidency of Meteorology and Environment (PME), ang paglamig na nararanasan ay tatagal pa hanggang sa unang linggo ng Pebrero ng taong kasalukuyan.

Kung kaya’t pinag-iingat ang lahat upang di mabiktima ng labis ng “excessive cold snaps” na maaaring maging sanhi ng pagkakasakit tulad ng ubo, sipon at pananakit ng katawan. Magsuot ng makakapal na damit lalo na kung lalabas o nasa open area.

Nagbigay rin ng babala ang Directorate General of Civil Defense ng Saudi sa lahat ng mamamayan nito at mga expatriates na mag-ingat sa paggamit ng heaters na kadalasa’y nagiging dahilan ng sunog kapag di nabantayan at napabayaang nakabukas o nakasindi ng mahabang oras. Dapat huwag patatagalin na umaandar ang heater o hahayaang nakabukas ito lalung lalo na kung matutulog na.

Kung gagamitin naman ang heater ng air-conditioning unit (AC), dapat ay dagdag ingat din. Kumpunihin muna ng maigi ito kung safe ba na gamitin lalo na kung luma na ang A/C at matagal nang di nagagamit ang heater.

Magkakaroon din ng sandstorms at heavy fog sa ibang bahagi ng Saudi Arabia na magdudulot ng zero visibility. Kaya’t pinag-iingat ang mga motorists sa oras na magkaroon ng ganitong kaganapan. Mas makakabuting tumigil na lamang kaysa ituloy ang biyahe at maging delikado sa daan.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Mahahalagang Inpormasyon Kaysa sa mga Larawan Lamang

Bakit po mas marami ang mga pictures ng kung anu-anong paligsahan kaysa sa mga matitino at mahalagang bagay ang nailalathala sa Focus in the Middle East? Suhestiyon ko po sana na ang mabasa po namin sa napakalaking espasyo na yan ay yung kapaki-pakinabang na artikulo na kapupulutan ng inpormasyon at aral sa mambabasa ng Abante Middle East Edition. Maraming salamat po. – from a reader in Saudi Arabia.

Kabayan, maraming salamat sa iyong puna at suhestiyon. Hayaan mo’t ipararating natin sa Editor In-Chief ng pahayagang ito ang iyong valid concern. Gayunpaman, sinisikap ng manunulat, columnist at contributors ng pahayagang ito na maging balanse sa aming paglalahad, na mapagbigyan ang mga kapwa natin OFWs na mailathala ang kanilang iba’t ibang community activities, at makapagbigay ng mahahalagang inpormasyon at panulat na magdudulot ng aral at inspirasyon sa masusugid nating tagasubaybay at mambabasa ng Abante ME Edition, di lamang ng Tinig sa Disyerto. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

The Ambassador Visited the Emirs

Ang Emir ng Qassim Region kasama si Ambassador Tago. Ang Deputy Emir ng Riyadh Region habang nakikipag-usap sa Ambassador. Ang Emir ng Eastern Region sa opisina nito sa Dhahran kasama ang Ambassador.

by Max Bringula Chavez
(published in Abante ME Edition, 27 Jan 2012)

The Ambassador starts the year right.

Sa layuning lalo pang mapagtibay at mapalawig ang relasyon ng Pilipinas at Saudi Arabia kung saan mayroong halos isang milyong OFWs na nagtratrabaho’t naninirahan, minabuti ng Ambassador ng Pilipinas sa Saudi Arabia, Hon. Ezzedin H. Tago, na bumisita sa pamunuan ng bawat rehiyon nito. Tatlong magkaka-ibang lugar ang kanyang binisita – ang Riyadh, Qassim at Eastern Region.

Buraidah, Qassim Region

Sa unang araw pa lamang ng taong 2012, itinakda agad ni Ambassador Tago ang pagbisita sa bahaging Kanluran, ang Qassim Region kung saan malugod na tinanggap ng Emir ng Qassim Region, His Royal Highness Prince Faisal bin Bandar bin Abdulaziz Al Saud, ang Ambassador sa opisina nito sa Buraidah. Nagkaroon ng pag-uusap ang magkabilang-panig at tinalakay ang mga mahahalagang “issues of mutual interest to both countries”, pati na ang pagtutulungan sa pangkabuhayan or investment. Pinuri rin ng Emir ang malaking kontribusyon ng manggagawang Pilipino sa kaunlarang tinatamo ng Saudi Arabia, at ang pagiging masipag, tapat at husay nito sa pagtratrabaho.

Ipinaaabot naman ng butihing Ambassador ang pasasalamat sa Saudi Arabia sa pagkalinga nito sa libu-libong OFWs sampu ng kanilang pamilya.

Nauna rito, nakipagpulong din ang Ambassador sa miyembro ng Qassim Chamber of Commerce and Industry kung saan natalakay ang pagtutulungan sa infrastructure development, agriculture, at business process outsourcing (BPO) tulad ng call centers at medical services.

Riyadh Region

Sumunod na araw, January 2, nakipagkita naman ang Ambassador sa Deputy Emir ng Riyadh Region, His Royal Highness Prince Mohammad bin Saad bin Abdulaziz Al Saud, na siyang pansamantalang tumatayong Emir ng Riyadh Region. Sa kanilang pag-uusap, natalakay ang pagpapalawig pa ng bilateral relations ng dalawang bansa lalo na sa trade and investment. Parehong sumang-ayon ang magkabilang-panig na ipagpatuloy ang ganitong ugnayan at pagbisita upang lalo pang tumibay ang partnership ng Pilipinas at Saudi Arabia sa iba’t ibang larangang makakabuti sa bawat isa.

Eastern Region

Ang ikatlong rehiyon sa itinerary ng Ambassador ay ang Eastern Region na naganap noong January 7 sa Dhahran nang bisitahin ng butihing Ambassador ang Emir ng Eastern Region, His Royal Highness Prince Mohammad bin Fahd bin Abdulaziz.

Kasama ni Ambassador Tago sa pagbisitang ito ang First Secretary and Consul Roussel Reyes at Labor Attaché ng Eastern Region, Adam Musa.

Sa pag-uusap na naganap, muling ipinaabot ni Ambassador Tago ang pasasalamat sa Saudi Arabia sa pagtanggap sa libu-libong OFWs na naging second home na ng maraming Pilipino.

Inanyayahan naman ng Emir ng Eastern Region ang mga Filipino businessmen na mag-invest sa Saudi Arabia. Wika niya, “there are many investment opportunities in the Kingdom that are open to foreign investors.”

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Housing Loan sa SSS

Mayroon po akong housing loan sa SSS na di nahulugan at malapit ng ma-remata. Pag-ibig member po ako. Pwede ko pa ba na ipa-assume ito sa Pag-ibig at sa kanila na lang ako maghuhulog kaysa kukuha ako ng bagong housing loan? Thank you, Sir Max and more power to you at sa Tinig sa Disyerto. – from a reader in Saudi Arabia

Kabayan, ang pagkakaalam ko ay walang housing loan ang SSS at usually ay salary loan lamang ang kanilang binibigay sa mga miyembro nito. Gayunpaman, kung mayroon ka mang housing loan sa SSS, sa palagay ko’y hindi maaaring i-assume ito ng Pag-ibig sa dahilang magka-ibang ahensiya ang dalawa. Upang mabigyan ka ng tama’t eksaktong kasagutan ay aking ini-refer ang iyong katanungan sa Pag-ibig Corner ng pahayagang ito. Hintayin mo lamang ang kanilang magiging katugunan sa iyong tanong. Ugaliin mo ring magbasa ng Pag-ibig Corner ng Abante ME Edition kung saan ang iba’t ibang katanungan tungkol sa Pag-ibig Fund ay tinatalakay. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)

Pagpapalit ng Profession sa Iqama, Puwede Pang Humabol

by Max Bringula Chavez
(published in Abante ME Edition, 24 January 2012)

Puwede pang humabol ang sinumang nagnanais na mapalitan ang profession sa kanilang residence permit o Iqama. Ito ang inihayag ng Ministry of Labor ng Saudi Arabia kaalinsabay ng kanilang pagsisikap na maisaayos ang Saudi labor market.

Bibigyan ng palugit ang mga expatriates hanggang 22 February 2012 (30/03/1433-H) para mapalitan ang kanilang profession. Ayon sa tagapagsalita ng Ministry of Labor, mahigit kumulang na 35,000 foreign workers na ang nakinabang sa programang ito mula ng ilunsad noong 29 November 2011.

Ito’y bahagi rin ng pagsisikap ng Saudi government na mapaigting ang programang Nitaqat o yaong pagkakaroon ng mas malaking porsiyento ng Saudis na nagtratrabaho sa mga kumpanya’t establisimento kumpara sa mga expatriates o foreign workers.

Sa dahilang maaaring mawalan ng trabaho ang karamihan sa expatriate workers na ang profession sa Iqama ay yung para lamang sa mga Saudis, maituturing na ang pagpapapalit ng profession ay paraan upang sila’y makapagtrabaho pa rin.

Ang mga trabaho na di na puwedeng ibigay sa mga foreign workers ay ang mga sumusunod: HR Directors, Personnel Managers, Personnel Representatives, Personnel Specialists, Timekeepers, Receptionists, Cashiers, Security Guards, at nitong huli lamang ay idinagdag ang Salesmen at Sales Ladies ng mga women’s lingerie.

Upang mapalitan ang profession, kailangan lamang na magpasa o mag-submit ng authenticated documents na magpapatunay ng kanilang profession o qualification. Hindi na rin kailangang magtungo pa sa Labor Office ng personal. Magagawa na ito on-line o electronically ng kumpanya at establisimento na nagnanais na palitan ang profession ng kanilang expatriate workers.

Dagdag pa, ang opportunity na ito ay di limitado sa mga kumpanya at establisimento na nasa excellent categories o Saudization-compliant, kungdi maging yung mga nasa red, yellow or green. Subalit kapag tapos na ang palugit na ibinigay, yaong lamang nasa excellent o green categories ang puwedeng magpalit ng profession ng kanilang workers.

Gayunpaman, dapat tandaan na may mga professions na nangangailangan ng lisensiya o licensure mula sa authorized-giving bodies bago ibigay o itatak ang profession sa Iqama, tulad ng Doctors, Surgeons, Dentists, Nurses, Pharmacists at iba pang katulad nito. Ang mga nabanggit na professions ay dapat mayroong official license mula sa Saudi Medical Specializations Authority (SMSA).

Binabalaan naman ang mga kumpanya at establisimento na magma-manipulate ng dokumento mapalitan lamang ang professions ng kanilang workers. Ang parusa sa mahuhuli o malalamang nagpalsipikado ay ang di pagbibigay o pag-kansela ng kanilang lisensiya hanggang limang taon, at ang pag-blacklisted upang di makakuha ng mga foreign workers.

Ang pagpapalit ng professions ay malaking tulong din sa iba nating mga kababayan na nagnanais na madala ang kanilang pamilya upang makasama sa Saudi. May mga ilang OFWs kasi na ang professions sa Iqama ay laborer. Dahil dito, di nila maaaring madala ang pamilya dahil laborer ang professions nila o visa na naibigay nang sila’y unang dumating sa Saudi upang magtrabaho.

Kaya’t para roon sa nagnanais na mapalitan ang kanilang professions, makipag-ugnayan na kayo sa inyong government relations officers bago matapos ang palugit na binigay na 22 February 2012.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Serye ng Saudi Labor Law

Para po sa mga nagtatanong kung may karugtong pa yung ating Serye sa Saudi Labor Law, mayroon po at mahaba-haba pa iyon. Kaya, itutuloy po natin iyon sa mga susunod na publication ng Tinig sa Disyerto. Salamat ng marami sa inyong patuloy na pagsusubaybay. - Max

(For comments and reactions, please eMail at maxbringula@yahoo.com or send text message only on 00-966-502319535. Pakilagay ang inyong pangalan at lokasyon.)