Tuesday, September 28, 2010

Paglilinaw sa Amnestiya

Makikita sa larawan ang siyudad ng Riyadh na siyang capital ng Saudi Arabia. Mayroong mahigit na 1.5 million OFWs na nagtratrabaho sa Saudi, at ilan sa mga ito ay overstayers at runaways.

Tinig sa Disyerto by Max Bringula (Abante ME Edition, 28 September 2010)

Isang magandang balita ang bumulaga sa mga expatriates ng Saudi Arabia mula sa Interior Ministry ng Saudi nang ihayag nito ang pagbibigay ng amnestiya o kapatawaran sa lahat ng mga overstayers at illegal foreigners, o yung ang mga visas ay paso na o expired at hindi na nai-renew, at yung mga pumasok sa Saudi sa pamamagitan ng pekeng visa at papeles.

Anim na buwan ang ibinigay na palugit para sa pagsuko ng mga nasasaklawan ng direktibang ito, mula 25 ng Setyembre 2010 hanggang 23 March 2011. Ang pagbibigay ng amnestiya ay itinaon sa pagdiriwang ng Saudi ng kanilang National Day na idinaraos tuwing 23 ng September. Taun-taon ay hinihintay ng Saudis at mga expatriates ang ganitong amnestiya na kadalasang ipinakakaloob ng Custodian of the Two Holy Mosques na sa ngayon ay si King Abdullah.

Samantala, bumuhos naman ang iba’t ibang katanungan mula sa mga illegals at overstayers pati na ang mga takas na nagnanais na ma-avail ang amnestiya at makauwi sa kanya-kanyang bansa. Ang Embahada ng Pilipinas sa Riyadh, pati na ang Konsulada sa Jeddah at ang POLO-Eastern Region Operations sa Alkhobar ay inulan ng tawag na inaalam kung papaano ba ang gagawin para makauwi at kung sinu-sino ba ang sakop ng direktibang ito.

Upang bigyan ng linaw ang mga katanungang natanggap, nagpadala na ang Embahada ng Pilipinas (as of this writing) ng opisyal na sulat sa Ministry of Interior ng Saudi at sa Department for Foreign Affairs (o Wafideen) na humihingi ng official guidelines and directives patungkol sa nasabing amnesty program. Layon ng Embahada na kunin ang malinaw na pagsasagawa ng amnestiya, kung sino at hanggang saan ang sakop nito. Kung kasama ba rito yung mga matagal ng takas at di umuuwi sa dahilang may kaso sa kani-kanilang sponsors o employers. Yung may mga petty crimes at yung mga nakakulong. Yung mga kababaihan na nasa SWA (Saudi Welfare Agency) sa Eastern Province. Kasama rin ba rito yung mga naging anak ng mga runaways. Ito at ilan pa ang mga mahahalagang katanungang nais ng Embahada na makuha nang direkta mula sa Ministry of Interior ang kasagutan.

Inaalam din kung anu-ano ang mga dokumentong kakailanganin kung saka-sakaling ipra-process na ang travel documents ng mga mag-aaplay.

Nagbigay naman ng babala si Labor Attache David Des Dicang ng POLO-Eastern Region Operations sa ating mga kababayan na nagnanais na i-avail ang amnestiya na mag-ingat sa mga magsasamantala sa kanila, indibiduwal man o grupo, na magpapanggap na mag-aayos ng kanilang papeles at hihingi ng karampatang kabayaran. Upang matiyak na di mapagsasamantalahan, makipag-ugnayan lamang sa representatives ng ating Embahada patungkol sa pagsasaayos ng kanilang dokumento at dagliang pag-uwi.

Kung may grupo mang tutulong, dapat sila’y makikiapag-ugnayan din sa mga opisyales ng Embahada. Dapat tiyakin ng kababayan natin na batid ng Embahada ang ano mang transaksiyon kanilang isinasagawa tungkol sa nasabing amnestiya sa sino mang indibiduwal at grupo.

Narito ang mga numero na maaring tawagan:

Philippine Embassy – Riyadh: 01-4821802 / 01-4823559 / 01-4880835
Philippine Consulate – Jeddah: 051-5124797 / 02-6658462 x 101
POLO-Eastern Region Operations: 03-8941846 / 03-8942890

Tiniyak naman ni LabAtt Des na sa oras na matanggap nila ang opisyal na direktiba mula sa Ministry of Interior, ito’y agad nilang ipapaalam sa mga kababayan natin.

*********

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Approval ng Kontrata Para Mag-Hire

Gud AM, Sir Max. Pwede ba ako humingi ng POLO number sa Riyadh? Kasi may document contract ng asawa ko na noon pang August 25 ipinasa ng employer pero hanggang ngayon wala pang ibinabalik ang POLO-Riyadh sa employer. Thanks. – from a reader in Riyadh

Kabayan, narito ang mga numero na pwedeng tawagan sa ating Embahada sa Riyadh para ma-follow-up mo yung kontrata ng iyong husband: 01-4821802 / 01-4823559 / 01-4880835 / 01-4820507 / 01-4823615

Good day, Mr. Max. I make this message kasi I have a friend na yung friend niya ay 10 months na na di pinasusuweldo ng amo because the employer is like scavenger only, and his kids ay di nag-aaral. Meaning poor employer. How come na nakakakuha ng maid sa Pinas ang ganito? Next time sana di lang pagkakakitaan kami ng government natin kungdi maging concerned din sila sa mga OFW. Mapalad ako dahil I have an Al-Dossary na employer. I thank Allah. – Rosalie Amira Bartolome of Alkhobar

Hi Rosalie, salamat sa iyong patuloy na pagtangkilik. Mayroong procedures na sinusunod ang Embahada pati na ang POLO-ERO sa pag-approve ng mga contract to hire na isinusumite ng mga employers na nais mag-hire ng Filipino workers. Ang kontrata’y kanilang sinusuring maigi bago aprubahan at tinitiyak na kumpleto ang mga dokumento na kailangan. Kung may nakakalusot man ng tulad ng iyong binabanggit, ito’y sa dahilang may mga Agency sa Pilipinas na di sumusunod sa patakaran at gumagawa ng mga discrepancies para lamang mapaalis nila ang trabahador at sila’y kumita. Isa ito sa dapat pagtuunan ng pansin ng ating gobyerno at bigyan ng kaukulang aksiyon. - Max

Monday, September 27, 2010

Pagsasanay sa mga EOW Volunteers, Isasagawa

Tinig sa Disyerto by Max Bringula (Abante ME Edition, 25 September 2010)

Sa hangaring higit na mapabuti ang pagsasagawa ng consular outreach services ng Embahada sa Eastern Province, o kilala sa tawag na Embassy On-Wheels (EOW), isang pagsasanay ang isasagawa para sa mga volunteers nito sa darating na Huwebes, September 30, 2010 mula ika-anim ng gabi.

Ito’y isang joint-project ng Embahada at ng AFCSCOM (All Filipino Community & Sports Commission) kung saan magkakaroon ng Seminar at Workshop na mahahati sa tatlong bahagi.

Sa unang bahagi ay tatalakayin ang Basics of the Philippine Passport Law, e-Passporting (procedures, comparative cost, features) at iba’t ibang Notarials services. Ito’y pangungunahan ni Consul Romulo Victor Israel, Jr., Second Secretary and Consul ng Philippine Embassy, Riyadh.

Sa ikalawa at ikatlong bahagi naman ay pag-uusapan ang roles, functions and responsibilities ng EOW volunteers na pangungunahan ni Engr. Ransam Pirote, past overall Chairman ng AFCSCOM, at mga piling consular staff ng Embahada.

Ang nasabing okasyon ay dadaluhan mismo ni Ambassador Antonio P. Villamor na siyang Panauhing Pandangal at Tagapagsalita, at ni Labor Attache David Des T. Dicang ng POLO-Eastern Region Operations.

Naatasan din sa iba’t ibang bahagi ng programa ang mga sumusunod na opisyales – Mary Jane Tupas, OFW 5th Congress President (Invocation), Jaypee Vega, AFCSCOM Incoming Deputy Chairman of Cultural Affairs and OFW 5th Congress Director General (National Anthem), Reggie Montana, AFCSCOM Overall Chairman (Welcome Remarks), at Max Bringula, AFCSCOM Deputy Chairman of Community Affairs (Closing Remarks).

Mayroong mahigit na limampung EOW volunteers na tumutulong tuwing nagkakaroon ng Embassy On-Wheels sa Alkhobar tulad ng gatekeepers, line and crowd controllers (o marshals), Form checkers o verifiers, encoding helpers, passport releasing assistants at volunteers coordinators. Sila ang mga sasanayin at bibigyan ng higit na empowerment para matiyak ang kaayusan ng mga darating na EOW o Embassy On-Wheels.

Ang pagkakaroon ng pagsasanay ng EOW volunteers ay pagkilala ng kanilang mahalagang bahagi sa lalo pang ikatatagumpay ng consular outreach services ng Embahada sa Silangang bahagi ng Saudi Arabia. Ang pagpapatupad ng e-Passporting na siyang kapalit sa MRP (machine-readable passport) at ng dating manual o green passport kung saan tinitiyak na daragsang muli ang mga kapwa OFWs sa EOW ay lalo pang nagpa-igting sa hangarin ng mga volunteers na harapin ang hamon na pag-ibayuhin ang pagtulong sa mga kapwa kababayan sa pamamagitan ng buwanang Embassy On-Wheels.

*********

EOW sa September Muling Ipinagpaliban

Samantala, isang Advisory ang ipinadala ng Philippine Embassy, Riyadh dated 04 September 2010 na nagsasaad ng muling pagpapaliban ng EOW sa Alkhobar sa buwan ng Setyembre. Ito’y direktibang nanggaling mismo sa Department of Foreign Affairs (DFA) sa Manila para sa lahat ng Embahada at Konsulada ng Pilipinas sa ibayong dagat. Ang dahilan ay ang paglilipat ng Personalization Center ng Machine-Readable Passport sa bagong opisina ng Consular Affairs ng DFA sa Aseana Business Park, Macapagal Boulevard cor. Bradco Avenue, Paranaque City.

Sisikapin ng Embahada na makapagbigay agad ng pahayag ng susunod na EOW sa October sa madaling panahon.

Maaari namang puntahan sa Riyadh ang mga passport na ready for release. Dalhin lamang ang resibo ng pagbayad. Kung hindi personal na makakapunta, maaaring ipakuha ito sa inyong kasama o kakilala. Kailangan lamang ng Authorization Letter na manggagaling sa inyo. Gayunpaman, mas mainam na i-check muna kung available na ang inyong passport sa website ng embassy sa www.philembassy-riyadh.org. O kaya naman, maaari kayong tumawag sa kanilang hotline na 01-4823559. Kung nangangailangan naman ng extension ng passport sanhi ng emergency cases, maaari kayong magtungo sa Embahada mismo para mabigyan ng pansamantalang passport o travel document.

Sa iba pang mga katanungan tungkol sa Passporting, pwede kayong mag-eMail sa filembry@sbm.net.sa.

Seminar sa Tamang Pakikitungo sa Kapwa-Manggagawa

Makikita sa larawan ang ilang mga nurses na dumalo kasama ang mga opisyales ng OFW 5th Congress. Si Engr. Ransam Pirote habang tinatanggap ang Plaque of Appreciation mula kay Mary Jane Tupas, OFW 5th Congress President.

TINIG SA DISYERTO by Max Bringula (Abante ME Edition, 23 September 2010)

Isang mahalagang seminar/workshop ang isinagawa kamakailan lamang ng Overseas Filipino Workers 5th Congress at ng pamunuan ng Mohammad Dossary Hospital nitong September 2, 2010 na may titulong “Managing Human Behavior at Work”.

Ito’y dinaluhan ng pitumput-anim (76) na nurses ng nasabing ospital at pinangunahan ng mga opisyales nito na sina Mr. Abdul Fettah Ennayal (Director General), Mr. Sulaiman Babiker Dafalla (Human Resources Consultant) at Ms. Mary Jane P. Tupas (Director of Nursing), na siya ring pangulo ng OFW 5th Congress. Nagbahagi rin ng kanyang sariling karanasan ang tagapagsalita ng okasyong iyon na si Engr. Ransam Pirote tungkol sa tamang pakikitungo at pakikihalubilo sa iba’t ibang uri ng tao. Si Mr. Pirote na isang Bagong Bayani awardee rin, ay Training Coordinator ng ARAMCO.

Masasabing isang malaking tagumpay ang isinagawang seminar/workshop sa dahilang ang ganitong mga talakayin ang mas higit na kailangan ngayon di lamang ng mga overseas Filipino workers (OFWs), kungdi maging ng ibang mga foreign workers sa bansa. Ito’y isang mahalagang sangkap upang lalo pang magtagumpay ang sino man sa kanyang trabaho at larangang kinabibilangan. Kung kaya’t ganoon na lamang ang papuri’t pasasalamat ng mga nagsidalo sa organizer ng katatapos na seminar/workshop.

Ang mga nurses na dumalo ay sina: Sreekumari P.N., Marykutty James, Lorlyn Camacho, Pushpa Mammen, Bala Nagamal, Kavitha Pilakadan, Tamil Arasi, Susan George, Rosamma George, Shany Baby, Shiji Joseph, Teresita Unlayao, Mary Jane Recassa, Leela Balan, Susamma Punnose, Sisily Nalor, Minimol Chandy, Angelina Rigor, Sreekala, Moly Thomas, Rechil Gardose, Irene Dela Cruz, Maya K.G., Tessymol Varghese, Sheeja Mathai, Noriet Alvia Barcia, Soly Abraham, Shani Rose, Rianne Apolonio, Junielyn Marte, Amy Bautista, Pramada C.K. Nair, Simmy Jacob, Suzanne Jane Castillo, Cherry Anne Barrientos, Susan Thankachan, Marizen Cabral, Riya Shiju, Soumya Mathew, Abdullah Salem Al-Mashgari, Jephonie Padre, Gulshan Begum, Binu Thomas, Asima Begum, Lijo John, Reena Joseph, Retheesha R., Soledad Tambua, Cindy Manguiat , Reniel Simbillo, Jerome Duterte, Florie Yuson, Mary Mammen, Arlene Navarro, Kashmir Dayang, Joerelyn Macahilas, Shobanna K., Rona Palmamento, Gigi George, Grace Illyn Villaverde, Rutchel Laurencio, Elaine Joyce San Jose, Lilibeth Fabro, Beena Saji, Rowena Sarte, Annie Kurakose, Daisy Burca, Estelita Nieves, Smitha Baiju, Shiny Anthony, Bindhu N.M., Mariamma P.M., Deepthi Zakariya, Annaliza Neyra, Joanna Marie Gardiola, Jacquelyn Garimbao.

*********

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Katulong na Pinagbabantaan

Sir Max gud PM. Isa po akong DH dito sa Jeddah. Yung amo ko ay lagi akong sinasabihan ng “I could kill you”. Ano po ba ang dapat kong gawin? Ang magtiis dito o umuwi na lamang? Apat po ang anak ko. Sana mapayuhan ninyo ako. from a reader in Jeddah

Kabayan, mas mainam na isangguni mo sa ating Konsulada riyan sa Jeddah ang iyong katayuan sa iyong amo, nang sa gayon ay ma-alarma siya kapag nalaman niyang nakikipag-ugnayan ka sa ating embahada. Dahil dito ay maaari siyang tumigil sa kanyang pagbabanta. Kung hindi pa rin at mas lalo pang lumala, mainam na humingi ka na ng tulong sa ating Konsulada upang ika’y kanilang kunin at pansamantalang kupkupin. Ang kanilang numero ay ang mga sumusunod:

051-5016318 (mobile) - Philippine Consulate, Jeddah
051-5124797 (mobile) - POLO-Jeddah
02-6658462 ext. 101 (landline)

Humihingi ng Sipi ng Saudi Labor Law

Hi there. I’m Ghay Cadiz from the Philippines. I got your email address from Tinig sa Disyerto. Ang dami kong natutunan just by reading your articles. I'm not an OFW, but I’m doing some research so I could help my friend who is in Jeddah. I just need a copy of the Revised Saudi Labor Law. If you could send it to me, it would be greatly appreciated. I want to know the law, because I believe sa nasabi mo sa isang article na "ignorance of the law excuses no one”. Thanks in advance. – Ghay Cadiz from Philippines

Hi Ghay, napadala ko na sa iyong eMail ang ni-request mong Revised Saudi Labor Law (in English and Tagalog). With regards sa friend mo, I suggest na kung babalik siya sa amo niya ay may kasama siyang taga-Konsulada natin sa Jeddah. Hindi kasi natin tiyak ang isipan ng mga Saudis.

Tuesday, September 21, 2010

Matapos ang Holidays, Balik-Trabaho Ulet

Ang pagligo sa karagatan ng Eastern Province at Jeddah ang siyang dinarayo ng mga taga-Riyadh. Ang pagbisita sa Bahrain ang isa sa mga ginagawa ng mga nasa Saudi kapag holidays. Kuha sa Red Sand ng Riyadh Kuha sa siyudad ng Riyadh. Sa background ay makikita ang Faisaliyah Tower.

Tinig sa Disyerto by Max Bringula (Abante ME Edition, 20 September 2010)

Tapos na ang maliligayang araw” ika nga ng iba. Matapos ang mahaba-habang Eid Holidays, balik trabaho na ulet. Bagama’t sa iba nating mga kababayan lalo na yung mga na sa fastfood, hotels at restaurants, mas higit silang naging abala sa mga ganitong araw sa dahilang mas maraming costumer kapag holidays kumpara sa ordinaryong araw lamang.

Gayunpaman upang ma-compensate ito, may mga establisamento at kumpanya na binibigyan ng extra days off ang kanilang mga trabahador. Ang iba nama’y nagbibigay ng dagdag na bayad o overtime.

Sa mga biniyayaan ng dalawa, tatlo o higit pang araw na holidays, tulad ng inyong lingkod, tiyak na isang kakaibang karanasan ang katatapos na bakasyon. Ito’y pagkakataon upang makapamasyal sa lugar na di pa napuntahan.

Dito sa Saudi Arabia, karaniwan na ang mga taga-Riyadh o Central Region ay bumababa sa Eastern Province para maligo sa tabing-dagat at ang iba’y para mangisda, o kaya’y mamasyal sa tinatawag nilang Judas Cave. Bahagi rin ng escapades sa Eastern Region ang pagpunta sa Saudi-Bahrain Causeway at ang pag-akyat sa Saudi Tower upang masilayan ang kabuuan ng silangang bahagi ng Saudi at ang katabing bansa nito, ang Bahrain. Ganito rin naman ang gawi ng mga nasa kabilang border ng Bahrain.

Isa pang lugar na pinupuntahan ng mga kababayan natin ay ang Jeddah na nasa Western Region na marami ring mga magagandang tanawin tulad ng Jeddah Corniche at ang mga naglalakihang malls nito. Bagamat may kalayuan ang Jeddah na anim na oras ang biyahe mula sa Riyadh at labin-dalawang oras naman mula Eastern Region.

Samantala, ang mga taga-Eastern Region at Jeddah ay siya namang aakyat patungong Riyadh kung saan maraming mga magagandang lugar na mapupuntahan tulad ng Kingdom Tower, Al Faisaliyah Tower, Hidden Valley at Red Sand na siyang karaniwang pasyalan ng mga kababayan natin dito kung saan ang buhangin ay nanlilisik na pula. Doon ay masisiyahan kang mag-akyat panaog o magtampisaw sa buhangin habang walang tigil naman ang “kodakan” o pagkuha ng litrato.

May mga kababayan naman tayo na ginugol ang holidays sa pamamagitan ng pagkakaroon ng kakaibang bonding sa mga kaibigan, kapatiran, pamilya at kasama sa trabaho sa kani-kanilang accommodation. Mayroong nagre-renta pa ng Istiraha upang doon idaos ang kakaibang-bonding tulad ng camping, seminar, fellowshipping, atbp.

May mga sports activities din na ginanap tulad ng Ramadan Friendship Games 2010, isang Open Invitational Basketball Tournament na itinaguyod ng Alkhobar Islamic Center, sa pakikipagtulungan ng United Filipino Sports Association (UFSA) na ginanap sa buong buwan ng Ramadan, at ang pagbubukas ng 10th United Filipino Basketball Federation (UFBF) 2010 Open Invitational Basketball Tournament noong 10 September 2010.

May mga kababayan naman tayo na sinasamantala ang Eid Holidays upang maka-uwi o makapag-bakasyon sa Pilipinas. Isinasama nila ang holidays sa iskedyul nilang bakasyon. Habang ang iba na di naman uuwi ay sinasamantala ang mga araw na ito para mag-ayos sa bahay, maglinis at magkumpuni ng mga sirang gamit. At sa iba naman, ito’y panahon upang bumawi ng tulog at pahinga, bagama’t karamihan pa rin ay halos wala ring tulog at di lubos na nakapagpahinga sa dami ng mga ginawa’t pinuntahan.

Anu’t ano pa man ang pamamaraan, iba’t ibang kaganapan, sari-saring lugar na pinuntahan, at kanya-kanyang bagay na ginawa, ang Eid Holidays na lumipas ay masasabing isang oportunidad at kagalakan sa mga kababayan natin na naghahangad ng kapahingahan at kasiyahan upang mapawi ang lungkot o homesick ng pananatili sa ibang bayan, maibsan ang pagod na nararanasan sa trabaho, at makadama ng kapahingahan di lamang ng pisikal na pangangatawan kungdi maging ng espirituwal na siyang higit na mahalaga.
Tapos na ang holidays, balik trabaho na ulet. Simula na naman ng pagpupunyagi para sa magandang kinabukasan. Muli nating harapin ang mga araw na darating na may ngiti at kakaibang kalakasan at ibayong pag-asa.

Monday, September 20, 2010

Traffic Cameras sa Eastern Region, Ipinatupad Na

Tinig sa Disyerto by Max Bringula (Abante ME Edition, 19 September 2010)

Sa layuning mabawasan kung hindi man tuluyang mapawi ang halos araw-araw na vehicular accidents na nagaganap sa Saudi Arabia, kung saan malaking pinsala ang idinudulot at maraming buhay ang nasasawi, inilunsad ng Traffic Department ng Saudi ang paglalagay ng Saheer o automated traffic cameras sa mga daan, lalo na sa mga prominenteng lugar na marami ang dumaraang sasakyan.

Ito’y una ng ipinatupad sa Riyadh at Jeddah, at ngayon sa Eastern Region naman upang ma-monitor ang mga lumalabag sa traffic rules tulad ng over speeding at crossing the red lights. Kadalasan, dahil sa kawalan ng disiplina ng mga motorists at ng kanilang di pagsunod sa driving etiquette, lokal man o mga dayuhan, nagkakaroon ng mga aksidente. Ang Saudi Arabia ang isa sa mga bansa na may pinakamataas na bilang ng mga nasasawi sa vehicular accidents sa buong mundo na umaabot sa anim na libo kada taon, dagdag pa ang pinsalang dulot nito sa mga properties at iba pang nadaramay.

Para sa kaalaman ng mga motorists sa Eastern Region, narito ang mga lugar na may automated cameras:

1) Dhahran Street intersection signal at Prince Hammoud (kung saan naroroon ang McDonald at Kentucky sa may Dhahran)

2) Dhahran Street signal at the intersection of King Abdulaziz (Dhahran)

3) Dhahran Road intersection signal at Alkhobar Corniche (kung saan naroroon ang AlKhobar Police Station)

4) Alkhobar Corniche signal (sa may Meridian Hotel sa Alkhobar)

5) King Abdul Aziz Street 10 cross 16 signal (Alkhobar)

6) King Abdul Aziz Street with Pepsi sign (Alkhobar)

7) Mecca Street Signal (sa Auto Agencies area, Alkhobar)

8) Bridge signal (kung saan naroroon ang Alkhobar housing, at sa kanan ang Al-Ghanem Market, at sa kaliwa ay ang Al-Fawzia Market)

9) Al-Khobar Street Signal (sa may Al-Subaie Auto Exhibition)

Gayundin may mga automated cameras na nagmo-monitor ng lalabag sa maximum speed limit in kilometers per hour sa mga sumusunod na lugar:

1) Dammam – Khobar Highway (Dammam Housing), ang maximum speed ay 100.

2) Dammam – Khobar Highway (Doha, Dana Technical College and Gulf Palace), ang maximum speed ay 110.

3) All Highways (sa Rashed Al-Qaeda Road at sa university at director ng Dammam area papuntang Jubail, Al-Hasa at Riyadh roads) ang maximum speed ay 100.

4) Jubail Highway, ang maximum speed ay 100.

5) Aziziyah Highway (Alkhobar), ang maximum speed ay 100.

Upang maiwasan ang aksidente at hindi mapatawan ng traffic fines, kapag nag-Yellow ang traffic signal, dapat ng mag-menor habang malayo pa at huwag habulin ang red signal. Kapag nag-menor ka, mababalaan ang nasa likuran mo at siya’y magdarahan na rin, lalo na’t kapag binukas mo pa ang iyong flasher bilang babala sa mga parating na sasakyan.

Ipinapaala rin na kapag liliko sa kanan (sa may intersection) at naka-red signal, lumingon muna (sa kaliwa) kung may paparating na sasakyan o kung may tumatawid bago lumiko.

Gayundin, ugaliin na kapag titigil sa may traffic signal, ang sasakyan ay di tatapak sa crosswalk ng pedestrian o ng mga tumatawid.

Ang sinumang mahuhuli o malilitratuhan na lalabag sa mga nasabing traffic rules ay mapapatawan ng traffic fines.

Pinapaalalahan natin ang ating mga kababayan na sumunod sa mga patakarang ito ng Saudi Traffic Department upang maiwasan ang aksidente at di maperwisyo sanhi ng ating paglabag.

Saturday, September 4, 2010

Huwag Nang I-Major Major Pa

Si P’Noy habang nagsasalita sa Senado.

Tinig Sa Disyerto
by Max Bringula (Abante ME Edition, 03 September 2010)

Bukambibig ngayon ang katagang “major major” na hango sa naging sagot ni Venus Raj sa interview portion ng Miss Universe 2010 beauty pageant kung saan hinirang na 4th Runner-up ang kandidata ng Pilipinas.

Sa tanong ng Hollywood actor na si William Baldwin, isang kakatwang sagot ang ibinalik ni Venus sa kanyang interviewer. “In my 22 years of existence, I can say that there’s nothing major major problem that I’ve done in my life because I’m very confident with my family, with the love that they are giving to me…”

Maayos naman kung maituturing ang sagot ng dalawampu’t dalawang taong gulang na dilag mula sa Camarines Sur kung di nga lamang sa “major major” na iyon na siyang naging sanhi kung bakit di niya nai-uwi ang korona bilang ikatlong Pilipina sana na magiging Miss Universe.

Dahil sa sagot na ito, naragdagan na naman ang mayaman at makulay na talasalitaan ng lengguwaheng Pilipino. Salamat sa iyo, Venus. Kahit saan ka man dumako ngayon – sa mall, sa eskuwela, sa opisina, sa plaza, at maging sa topadahan ni Aling Kaka o sa pagupitan ni Mang Isko, o sa anu mang umpukan at bangkaan, maririnig mo ang katagang “major major” na idinurugtong sa usapan. Maging ang mga tanyag na social networking tulad ng Facebook at Twitter ay di rin nakaligtas sa Venus-mania na ito.

Isang Twitter user ang nag-translate ng “major major” sa Tagalog. Wika ni Chris Mercado, ito’y maitutulad sa salitang madalas mo ring maririnig ngayon, ang “bonggang-bongga”, isang gay lingo na ang ibig sabihin ay “extravagant” o “outlandish”. In fact, pinalitan na ng “major major” ang dating expression na ito na “bonggang-bongga”. (Source: Karen Flores of ABS-CBN News)

Taas-noo namang hinarap ni Venus ang mga kritiko sa kanyang naging sagot sa nasabing patimpalak-kagandahan. Maging ang dalawang Pilipina na naging Miss Universe na sina Ms. Gloria Diaz (Miss Universe 1969) at Ms. Margie Moran (Miss Universe 1973) ay sumang-ayon at kumampi sa kanya.

Subalit papaano ba magagamit ang katagang ito sa positibong pamamaraaan? Papaano siya magiging sandata sa mga bumabatikos sa Pilipinas at mga kababayan natin ngayon? Sa panahong ang ating bayan ay sentro ng atensiyon dahil sa malagim na kinasapitan ng hostage-taking drama na naganap noong Lunes, 23 August 2010, kung saan walong banyaga ang namatay (limang turistang Tsino at tatlong Canadian citizens). Sa panahong halos mag-aklas ang mga Tsino sa Hongkong para i-kondena ang pangyayaring kapalpakan ng ating kapulisan at hingin ang hustisya sa mga kababayan nilang nasawi.

Simple lamang. At ito ay ang “huwag na nating i-major major pa” ang mga pagkakamaling nangyari at naganap. Huwag nang magturuan pa at manisi ng iba. Ang maghugas-kamay at iligtas ang sarili. Bagkus panagutin ang may sala at umamin ang nagkamali.

Iwasan din ang mag-major major o mag-generalize.” Yun bang lalahatin o ibabaling sa pangkalahatan ang mali ng isa. Pagkat hindi lahat ng Pilipino ay hostage-taker. Ang totoo niyan, tayo’y maituturing na bihag o hostage din sa pangyayaring ito sa ating bayan.

Nalalagay sa panganib ang mga kababayan natin sa Hongkong at maging sa ibang bahagi ng mundo tulad ng Gitnang Silangan sa maaaring mangyari kung hindi agad masusulusyunan ang krisis na ito na kinasuungan ng bansang Pilipinas.

May magagawa tayo. At ito ay “huwag ng i-major major pa” ang issue. Iwasang gumawa ng makakasakit sa damdamin ng mga naulila ng trahedyang ito.

Magtulungan tayong mga Pilipino na ibangon ang ating bayan. Ang muling ibalik ang respeto at paghanga ng mundo sa galing ng Pilipino.