Woe on EOW – Part 2

Kuha sa isang pulong na isinagawa ng Filipino community groups sa Embassy representatives.

Max Bringula (Abante ME Edition, 29 July 2010)

Ito’y karugtong ng paksang nauna nang nailathala sa column na ito noong Huwebes, 22 July 2010, ang “Woe on EOW”.

Sa ngayon, patuloy pa rin ang samu’t saring mga komento na ating natanggap sa katatapos na Embassy On-Wheels o EOW na idinaos sa Eastern Province noong Huwebes at Biyernes, 15 and 16 July 2010. Sadya ngang naging maalab ang damdamin ng bawat isang OFWs na nagtungo sa IPSA (International Philippine School in Alkhobar) upang magpa-renew ng kanilang passport o magpa-notarize ng SPA (Special Power-of-Attorney) dahil sa di magandang karanasan kanilang kinaharap tulad ng mabagal na proseso, kawalan ng kaayusan, at hayagang palakasan. Sinabayan pa ang nag-aapoy nilang damdamin ng init ng panahon ng mga oras na iyon kung saan nakabilad ang karamihan sa ilalim ng init ng araw, tagaktak ang pawis upang kaharapin lamang ang di kanais-nais na karanasan sa EOW.

Ayon kay George Conejos, Coordinator ng Pag-asa Community Support Group, at isa rin sa nagtungo sa IPSA upang magpa-renew ng passport, napakarami raw tao na nagtungo ng araw na iyon ng Huwebes sa IPSA. Ito’y sanhi ng dalawang buwang di pagkakaroon ng EOW sa Eastern Province.

“Nung Wednesday pa lang ng 11 PM ng gabi ay nakita ko nang may pila sa IPSA. Ako po ay bumalik ng 3 AM ng Thursday at nakita ko po na sobrang dami na nang nakapila at doon na mismo sa labas na IPSA nagsi-tulog upang antayin ang pagbukas nito sa oras ng 8:00 AM. Sobrang haba ang pila at nasa kalye na yung iba. May mga kababayan pa tayo na nagtitinda ng kape sa halagang 2 riyals, samantalang 1 riyals lang yun. First time kong mag-renew ng aking passport dito sa Saudi, ngunit nakita ko ang sistemang katulad sa atin sa Pilipinas. Nawa po ay makarating ito sa kinauukulan upang magawan agad ng aksiyon.”

Samantala, si Vernon Dimaano, isang Materials Engineer sa UNICOIL-Jubail, ay naghahanap ng kasagutan kung papaano na siya at ang apat niyang mga kasama ay di nakaabot sa unang 400 na aplikante na dapat i-process ng araw na iyon? “Nang pumasok kami sa loob ng IPSA, ang bilang namin ay wala pa sa 300. Papaano nangyari na hindi kami nakaabot sa unang 400 para sa encoding? Nang makabayad kami at nabigyan ng numero ay pang-552 na ako. Bakit nagkaganun? Saan nanggaling yung mahigit na 250 na tao? Sa Jubail pa kami galing ng araw na iyon at dumating sa IPSA ng bago mag-ala una ng madaling araw (1:00A.M.) ng Huwebes at nag-tiyagang pumila kasama ng iba pa nating kababayan na mula pa sa iba’t ibang lugar sa Eastern Province. Pumunta kami ng maaga at nagtiyaga na matulog sa nakalatag na karton sa labas ng IPSA para lang makasigurado na matatapos namin ang pakay namin doon. Subalit hindi pala.”

“Dapat ayusin ng taga-Embahada sa tulong ng mga volunteers (various Filipino community groups) ang sistema sa susunod na EOW. Ang isa naming suhestiyon ay magbigay sila ng numero habang nasa pila pa lang para walang makasingit. Sa ganitong paraan, alam na agad ng nakapila na hindi sila aabot sa quota at ng sa gayon ay pwede na silang mag-decide kung tutuloy pa ba o uuwi na lamang”, ang dagdag pa ni Vernon.

Ayon naman kay Tim Mallari, Head ng External Affairs ng Pag-asa, dapat din daw na ipagpasalamat ng maraming OFWs ang pagkakaroon ng EOW sa Eastern Province, dahil kung wala ito, kakailanganin mo pang pumunta ng Riyadh na apat na oras ang biyahe kahit SPA (Special Power-of-Attorney) notarization lang ang pakay mo.

“Sana napansin din ng mga kapwa ko OFW yung mga volunteers at marshals na libreng naglilingkod sa kabila ng matinding init ng araw. Kung wala ang mga volunteers, magiging lalong mas mahirap ang pagsasagawa ng EOW. Yung tungkol naman sa paniningil ng sobra ng iba nating mga kababayan, kung alam lang ng Embahada ang tungkol dito, tiyak na di sila papayag. Lahat ng reklamo na paniningil ay hindi sa Embahada yan kungdi pansariling hanap-buhay ng iba nating mga kababayan”, ang karagdagang nabanggit ni Mallari.

Samantala, naiparating na sa Embahada ng Pilipinas sa Riyadh ang tungkol sa kaganapan sa nakaraang EOW. Nagkaroon na rin ng pagpupulong ang AFCSCOM (All Filipino Community and Sports Commission), ang grupong namamahala at pinagkatiwalaan ng Embahada na mag-assist sa EOW mula ng simulan ito maraming taon na ang nakalipas. Sa pangunguna ni Reggie Montana, Overall Chairman ng AFCSCOM at ni Roi Alojado, EOW Lead Coordinator, isang pulong ang ipinatawag para sa mga volunteers noong Huwebes, 22 July 2010, upang talakayin ang mga problemang naranasan di lamang nitong nakaraang EOW kungdi sa mga nakalipas na buwan.

Walong volunteers ang dumating sa pulong tulad nina Ruel Madeja, Jhun Banaticla at Adel Merino ng FILCOM-Jubail, Toto Gonzales ng SAHI (Saudi Hiligaynon), Eduardo Saballa at Jether Barsobia ng GRII, Edgar Cataluna ng SMPII, at Wilda Diaz ng SOFHCARE, kasama sina Reggie Montana, Roi Alojado, Max Bringula at Orly Flores ng AFCSCOM.

Tunghayan sa susunod na labas ng column na ito ang tugon ng Embahada sa isyu ng EOW at ang mga paghahandang gagawin sa pakikipagtulungan ng AFCSCOM upang maisaayos at mapadali ang pagsasagawa ng buwanang EOW.

*********

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Hinampo ng isang Domestic Helper

“Ako po ay katulong. Nabalitaan ko po na ang minimum pay sa katulong ay SR 1500. Mayaman naman ang amo ko at maraming anak, dalawa ang asawa. At saka po ngayon, mababa ang palitan. Dati noon SR 750 kapareho lang ng isang libo ngayon. Walang asenso kaming mga katulong. Walang pabuya kahit sana isang buwang sahod kada taon bibigyan nila ng pinaka-bonus, Wala sahod lang talaga. Kahit sana kami katulong lang, may bonus kami taun-taon. Malaking tulong sa amin iyon. Kawawa kami kaysa mga empleyado. Sila 8 oras lang, kami 16 na oras." – from a reader in Saudi Arabia

Woe on EOW – Part 1

Max Bringula (Abante ME Edition, 22 July 2010)

Woe o sa Tagalog ay paghihinagpis, pagkalungkot o pighati sa nararanasan o sa nakikitang nagaganap. Kalungkutang minsa’y may kasamang pagka-dismaya, pagka-inis at pagbubuntung-hininga.

Ganito maituturing ang naganap sa nakaraang EOW o ang Embassy On-Wheels nitong 15 and 16 July 2010 na idinaos sa IPSA (International Philippine School in Alkhobar). Maraming mga kababayan tayo ang di napigilan ang mainis, magalit at manggalaiti sa pangyayaring kanilang naranasan sa pag-renew o sa pagkuha ng bagong passport at sa iba pang consular services tulad ng notarization ng SPA (Special Power-of-Attorney).

May mga eMails tayong natanggap at mga tawag, at maging pakikipag-usap ng ilan sa atin tungkol sa katatapos na EOW. Kanilang inilahad ang saloobin sa mabagal na proseso, sa kawalan ng kaayusan, sa mga palakasang nagaganap at maging sa pagsasamantala ng iba sa kahinaan at pangangailangan ng mga kapwa natin OFWs na ang tanging hangad lamang ay i-avail ang consular services ng Embahada na ginagawa isang beses sa isang buwan sa Eastern Province, Saudi Arabia.

Tulad na lamang ng eMail sa atin ni Mr. Chito Camcam na nagtratrabaho sa Unicoil sa Jubail. Ito ang kanyang tinuran:

Nais ko lang iparating ang aking karanasan at reklamo sa nakaraang EOW (July 15-16, 2010) dito sa Eastern Province.

1. NAPAKA-HABANG PILA - Napakahaba po ng pila sa labas ng bakod ng IPSA. Napaka-init at lubhang mapanganib sa kalusugan ng mga kapwa OFW. May mahabang pila pa rin sa loob ng IPSA compound at loob ng Gym. SPA (Special Power-of-Attorney) lang po ang aking kukunin. Nagsimula ako pumila ng 8:00 AM at natapos ako ng 4:00 P.M.

Mungkahi ko po na sana “by appointment” ang pagpunta ng OFW para sa passport processing/requirements. Kawawa po ang mga OFW dahil sa kawalang sistema. Buti ang mga staff ng Embassy ay naka-aircon lang.

2. OPERATION PAHID-PIX - May basbas po ba ang Embassy para maningil ng 1.00 SR para maidikit ang picture mo sa form? Di ba’t kasama ito sa serbisyo sa binayarang passport processing fee?

Pero sisingilin ka ng 1.00 SR kada pahid (wow, grabe!). Magkano po ba ang UHU paste? Makatuwiran po ba ang gawaing ito? Bakit pinapayagan ang ganitong racket sa loob ng Embassy?

3. WATER FOR SALE – Mabibili mo ang maliit na bote ng tubig sa halagang 1.00 SR. Pero ang bentahan nito sa labas ay 0.50 SR lamang. 100% po ang tubo sa kada bote. Oo nga’t di naman ito sapilitan. Ngunit bakit pinapayagan ang ganitong klaseng mapang- samantalang pag nenegosyo sa loob ng Embassy? (Hindi Embassy ang IPSA kungdi ginagamit lamang ng Embahada para sa EOW. – Max)

4. DISTRIBUTION OF PICTURES – Napansin ko ang pag distribute ng pictures (ng mga nagpapakuha ng litrato para sa passport) na parang nasa bangketa o palengke at walang kaayusan.

5. PAYMENT – Sa dami ng OFW na magbabayad, iisa lamang ang cash register at isa lamang ang cashier. Di ba’t mas mahusay kong dalawang cash register ang naka-abang? Kaya’t hayun, parang ahas ang pila.

Minsan pa lamang akong nag punta sa EOW sa loob ng 13 years kung pagtratrabaho sa Saudi, pero ayaw ko ng maulit pa. For sure ganito rin ang damdamin at reklamo ng marami nating mga kababayan na pababalik-balik tuwing may EOW.

Mukhang di yata naibabalita ito sa Pilipinas. Kasi tuwing may balita sa TFC (The Filipino Channel) tungkol sa Embassy, laging magaganda ang sinasabi at pinapakita. May kumukuha ng photos kahapon, pero patapos na ng sila’y pumunta, kaya kaunti na lamang ang makikitang tao. Bago na po ang Pangulo natin at for sure di gusto ni P’Noy yan. Magpalit na po tayo ng bagong sistema.

Sumulat po ako sa inyo upang maiparating ang mga reklamo na ito at mga mungkahi sa ating Embahada. At kung maaari, ganun din sa TFC at sa Abante ME Edition.

Mr. Camcam, salamat sa pagpaparating mo ng iyong obserbasyon sa nakaraang EOW. Bilang isa sa mga community leader, expected na namin na ganito karaming pila ang magaganap pagkat dalawang buwan halos sila (ang mga taga-Embahada sa Riyadh) na di nakarating dito sa Eastern Region para sa buwanang EOW. Bagama’t sinabi na namin sa Embahada ang magiging resulta sa di nila pagpunta.. Ang madalas nilang idinadahilan ay kakulangan sa Budget kung kaya’t di nila naidaraos ang EOW. At nitong nakaraang buwan ang kanilang abiso ay ang pagdaraos ng Independence Day at paghihintay daw ng makinang gagamitin para sa e-Passport ang dahilan ng di nila pag-iskedyul agad ng EOW. Ako’y nabigla sa binabanggit mo na pinagkakakitaan na pala ng iba nating mga kababayan ang nagaganap na EOW. Bilang isang manunulat at isa sa mga community leader, ipararating natin sa kinauukulan ang iyong mga nabanggit – sa aming pulong, at pati na ng media kung saan kabilang ang inyong lingkod. – Max

Tunghayan sa column na ito ang kasunod na ulat tungkol dito, at ang mga developments sa isinasagawang pagpupulong ng AFCSCOM (All Filipino Community and Sports Commission) at maging ng Embahada upang masolusyunan ang problemang ito.

Induction ng Bagong Pangulo at Opisyales ng UAP-KSA

Max Bringula (Abante ME Edition, 16 July 2010)

Matagumpay na idinaos noong Biyernes, 09 July 2010, ang Induction ng bagong opisyales ng United Architects of the Philippines, KSA-Eastern Province Chapter (UAP-KSA-EPC) para sa taong 2010-2011, at ang pagpapakilala sa mga bagong miyembro nito. Ang seremonya ay ginanap sa Arwad Suite, Alkhobar kung saan mismong si Labor Attache David Des T. Dicang ng POLO-Eastern Region Operations ang nagsagawa ng Induction at Oath-Taking sa mga sumusunod na opisyales at miyembro:

Liyo C. Cefre (President), Dionne S. Monteloyola (Vice-President for Program and Development), Arsenio Q. Laborte (Vice-President for Operation), Geraldin G. Suede (Secretary), Ronald Z. Cruz (Treasurer), Perfecto S. Catis, Jr. (Auditor), Directors (Celfred G. Recato, Hermoso Y. Delos Reyes, Rosario F. Fernando, Joselito A. Diasanta, Joel Catiis and Francis F. Fernandez), and Ex-Officio, Errol J. Pineda (President, 2009-2010). Sila ang bumubuo ng 2010-2011 UAP-KSA-EPC Board of Directors.

New Members: Noel P. Macaraeg, Hermoso Y. Delos Reyes, Jr., Nerwin S.D. Hernandez, Arturo F. Soriano, Romualdo P. Quario at Wilfredo M. Calimlim.

Si LabAtt Des Dicang din ang naging Guest Speaker kung saan ang theme ng okasyon ay “Architects Innovation and Competitiveness towards Globalization”. Hinamon ni Dicang ang grupo na lalo pang paglinangin ang kanilang kaalaman upang magiging competitive sa lumalaking market ng architecture sa buong mundo.

Sa ngayon, pinagtutuunan ng grupo ang pagtuturo at pagsasanay sa mga aspiring architects na nagnanais na kumuha ng Special Professional Licensure Board Examination (SPLBE) sa taong ito. Nagkaroon din sila ng Technical Product presentation noong nakalipas na Marso ng taong kasalukuyan, at hinihikayat ang kanilang miyembro na patuloy pang magsaliksik at mag-aaral ng mga bagong pamamaraan at disenyo sa arkitektura.

Ang UAP-KSA-Eastern Province Chapter ang kauna-unahang chapter o sangay ng UAP-Philippines na itinatag sa Saudi Arabia. Bilang mother chapter, inaasahan na ang UAP-KSA-EPC ay handang harapin ang hamon na buklurin ang mga Filipino architects di lamang sa Eastern Province kungdi maging sa Central at Western Region upang kilalanin ng kapwa architects at ng iba pang Filipino professionals organizations sa Saudi Arabia bilang accredited professional organization of Filipino architects.

Bumuo rin ang UAP-KSA-EPC ng committees upang tumugon sa iba’t ibang community activities kung saan sila ay kabahagi, tulad ng Committee on Internal Affairs (Chairman - Arch. Arsenio Q. Laborte), Committee on Professional Practice (Chairmen – Arch. Arsenio Q. Laborte and Arch. Ronald Z. Cruz), Committee on Government and External Affairs (Arch. Liyo C. Cefre), Committee on Education (Chairman – Arch. Dionne S. Monteloyola), Committee on Personal Development (Chairmen - Arch. Geraldin G. Suede and Arch. Perfecto S. Catis, Jr.), Committee on Filipino Architecture (Chairman – Joselito A. Diasanta), and Committee on PPO Sportsfest (Chairmen – Arch. Arlie B. Lunar and Arch. Allan P. Del Rosario).

Sa kauna-unahang pagkakataon din ay nagkaroon ng first officer na babae ang UAP-KSA sa katauhan ni Arch. Geraldin G. Suede na siyang nahalal na Secretary ng grupo. Buong puso namang tinanggap ni Arch. Suede ang hamon bilang the lone-woman officer in the usually man’s world of architecture. Nagbiro naman si LabAtt Dicang na halos kasing-taas niya pala ang unang babaeng officer ng UAP-KSA na ikinasiya ng mga naroroon.

Bahagi rin ng programa ang turnover speech ng outgoing President na si Errol J. Pineda at ang turnover ng gavel, UAP Flag, Certificate of Chapter Membership, Financial Statements, atbp. sa bagong Presidente nito na si Arch. Liyo C. Cefre, at ang acceptance speech at paglalahad ng bagong Pangulo ng kanyang programa.

Ipinakita rin ng gabing iyon ang Highlights ng activities na nilahukan ng UAP-KSA-EPC sa taong 2009-2010, tulad ng 3rd SPLBE Passers Oath-Taking Ceremony, Technical Support Presentation, 4th Batch SPLBE Review for 2010, 36th UAP National Convention in Manila, at ang 112th Independence Day Celebration sa Eastern Province, Saudi Arabia.

Sina Arch. Geraldin G. Suede at Arch. Angelito M. Pangilinan ang naging Master of Ceremony sa 2nd UAP-KSA-EPC Induction of Officers and New Members.

Apat na Pilipino, Patay sa Aksidente sa Hofuf

Max Bringula (Abante ME Edition, 09 July 2010)

Isang nakalulungkot na balita ang ipinarating sa atin ni Erwin Camahalan, empleyado ng National Guard Hospital sa Al Hassa, Hofuf sa nangyari sa kanyang kasamahan sa trabaho na si Joyce Demetillo Hasan, nurse sa nabanggit na hospital. Si Joyce na nasa edad na mahigit trenta anyos ay namatay kasama ng kanyang limang taon na anak na si Aldwin Hope, at ng magulang ni Joyce na sina Roberto Demetillo at Beth Demetillo, sa isang aksidenteng naganap kahapon ng Miyerkules, 07 July 2010, sa ganap na ika-walo ng gabi sa Al Oun District ng Hofuf.

Mula sa pagbisita sa pamilyang Camahalan, pauwi na ang apat ng oras na iyon kasama ang dalawa pang kasama na sina Gener na siyang nagmamaneho ng sasakyan at si Peter lulan ng SUV Chevrolet. Habang binabaybay nila ang daan pabalik ng Alkhobar ay biglang may isang sasakyan ang palipad na nag-crossover sa kanilang linya sanhi ng isang aksidente rin at nag-resulta sa collision ng mga sasakyan na bumibiyahe sa gawing iyon kasama na rito ang SUV na totally-wrecked sakay ang pamilyang Demetillo.

Agad nag-responde ang mga awtoridad na naroon at dinala ang mga sugatan sa hospital na malapit sa lugar na pinangyarihan at ang mga bangkay na namatay agad on the spot.

Si Joyce ay magta-tatlong taon ng nagtratrabaho sa NGH at may asawa na nagtratrabaho sa military sa Pilipinas, na si Col. Al Hassan. Samantala ang magulang ni Joyce na si Bert Demetillo ay nagtratrabaho naman sa Tri-Star Company, Hofuf at ang ina nito na si Beth Demetillo ay isang titser sa Al Riyada International School sa Hofuf.

Ipinagbigay-alam na ng asawa ni Joyce ang pangyayari sa Department of Foreign Affairs (DFA) at nakipag-ugnayan na rin ang NGH sa Embahada ng Pilipinas, gayundin ang Tri-Star Company at ang Al Riyada International School ay naabisuhan na rin. Habang tinitipa ko ang balitang ito, papunta na sa Al Hassa, Hofuf ang representatives ng Embahada at POLO-Eastern Region Operations upang kunin ang buod ng mga pangyayari at maisaayos sa madaling panahon ang pag-uwi sa mga bangkay.

Ayon kay Welfare Officer Ron Bartolome ng POLO-ERO, may instruction na silang natanggap mula sa DFA na i-expedite ang pag-uwi ng mga bangkay kung kaya’t ito ang kanilang dagliang ginagawa ngayon.

Nais naman ng asawa ni Joyce na si Al na pumunta ng Saudi upang personal na maasikaso rin ang pagpapa-uwi ng bangkay ng kanyang asawa’t anak at mga magulang nito.

Marami ng mga aksidente sa sasakyan ang nagaganap hindi lamang dito sa Eastern Province kungdi sa buong Saudi Arabia sanhi ng kakulangan ng pag-iingat sa pagmamaneho lalo na ng mga katutubo rito na kumikitil ng buhay di lamang sa mga kababayan natin kungdi maging ng ibang mga expatriates at locals. Kaya’t puspusan ang ginagawa ng gobyerno ng Saudi para sa Driving Safety awareness sa kanilang mga kababayan at pati na sa mga expatriates. May mga Traffic Rules na pinatutupad at huhulihin at magmumulta ang mga offenders tulad ng di pagsunod sa tamang speed na 120 mph lamang sa daan.

Sa mga kababayan natin, sikaping mag-ingat sa pagmamaneho at ugaliin na mag-seat belt kapag na sa sasakyan.

Sa mga kaibigan ng mga Demetillo na nais malaman ang buod ng pangyayari, at mag-abot ng simpatiya at tulong, maaari ninyong kontakin si Mr. Erwin Camahalan sa CP No. 050-2140157.

TSD Readers’ Corner:

(Para sa mga masusugid nating mambabasa ng TSD (Tinig sa Disyerto), tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Embassy On-Wheels sa Alkhobar, Gaganapin sa 15 ang 16 July 2010

Sa mga nagtatanong sa atin thru text and eMail tungkol sa Embassy On-Wheels (EOW) kung kaylan ito gaganapin ulet sa Eastern Province, nakatanggap na po tayo ng official advice from Philippine Embassy, Riyadh, Saudi Arabia, na ang EOW ay gaganapin sa darating na Huwebes at Biyernes, 15 and 16 July 2010.

Sa dati pa ring venue, ang International Philippine School in Alkhobar (IPSA), gaganapin ang EOW, na magsisimula ng ika-walo ng umaga (8:00 AM) ng Huwebes at magtatapos ng ika-lima ng hapon (5:00 PM). Sa Biyernes naman, magsisimula ito ng ika-walo ng umaga (8:00 AM) hanggang alas-dose ng tanghali lamang (12:00 NN).

Sa mga naghihintay ng release ng kanilang passport, mainam na bumisita o i-tsek muna sa site ng Embahada kung available na ang inyong passport. Maaari kayong bumisita sa kanilang site sa www.philembassy-riyadh.org.

Pinoy Umaasa kay P'Noy

Max Bringula (Abante ME Edition, 07 July 2010)

Matapos ang siyam na taong pagtitiis sa administrasyong GMA, nakahinga na rin ng maluwag ang sambayanang Pilipino nang tuluyan ng iluklok si Benigno Simeon “Noynoy” Aquino III bilang ika-15 Pangulo ng Pilipinas. Nanumpa si Aquino sa may Quirino Grandstand, Luneta noong Miyerkules, 30 June 2010 sa harap ng mahigit na apat na libong katao na dumalo sa makasaysayang pag-upo ng panganay na anak ni Ninoy at Cory bilang bagong liderato ng bansa.

Umani ng di mabilang na palakpak at sigaw ng kagalakan ang Inauguration Speech ng bagong Pangulo (o P’Noy in short) mula sa mamamayang Pilipino na naroroon at maging ng mga Pinoy na nasa kanya-kanyang tahanan at nakatutok sa telebisyon, sa loob man o labas ng bansa.

Sa bawat pahayag ni P’Noy, isang bagong pag-asa ang maaaninag mo sa kanilang mukha at matamis na ngiti ng pagsang-ayon.

Naging “music to their ears” ang mga pahayag niya na wala ng “wang-wang” na maghahari-harian sa kalsada. “Kami ay narito para magsilbi at hindi para maghari. Ang mandato ninyo sa amin ay pagbabago – isang malinaw na utos para ayusin ang gobyerno at lipunan mula sa pamahalaang iilan lamang ang nakikinabang tungo sa isang pamahalaang kabutihan ng mamamayan ang pinangangalagaan.”

Hinimok ni P’Noy ang bawat Pilipino na makiisa at makipagtulungan sa pamahalaan tungo sa pagbabago at muling pagbangon ng Pilipinas. Wika niya, ang pagbabago ay magsisimula una sa liderato. “Magsisimula ito sa akin. Sisikapin kong maging isang mabuting ehemplo. Hinding-hindi ko sasayangin ang tiwalang ipinagkaloob ninyo sa akin. Sisiguraduhin ko na ganito rin ang adhikain ng aking Gabinete at ng mga magiging kasama sa ating pamahalaan.”

Tulad ng kanyang slogan noong panahon ng kampanya, “Kung walang corrupt, walang mahirap”, ipinangako ni P’Noy na pupuksain niya ang corruption na naka-ugat na sa pamahalaan at kamalayan ng Pilipino.

“Walang pangingibang bayan at gastusan na walang wastong dahilan. Walang lamangan, walang padrino at walang pagnanakaw. Walang wang-wang, walang counter-flow, walang tong,” ang dugtong pa niya.

“Pupuksain natin ang korapsiyon sa Kawanihan ng Rentas Internas (BIR) at Bureau of Customs.”

Tunay nga na may bagong pag-asang sumibol sa bawat Pilipino. Sa pamamagitan ni P’Noy, ito’y isasakatuparan.

Sa mga kapus-palad, ang pamahalaan ang kanilang magiging kampeon. Ipagtatanggol nito ang karapatan ng mga mahihirap at bibigyan ng pagkakataon maka-angat sa kasalukuyang kalagayan. Titiyaking maipagkakaloob ang pangangaiangan ng mga mag-aaral tulad ng silid-aralan at mga libro. Isusulong ang serbisyong pangkalusugan at marangal na tirahan sa mahihirap. Palalaguin ang kapulisan para ma-proteksiyunan ang mga mamamayan at hindi para maghari-harian. Tutulungan ang mga magsasaka sa irigasyon at pagbenta ng kanilang produkto.

Layunin din na paramihin ang trabaho sa loob ng bansa upang hindi na kailangan pang mangibang-bansa ng mga Pilipino. Subalit habang di pa ito naaabot, wika ni P’Noy, “inaatasan ko ang mga kawani ng DFA, POEA, OWWA at iba pang mga kinauukulang ahensiya na mas lalo pang paigtingin ang pagtugon sa mga hinaing at pangangailangan ng ating mga overseas Filipino workers (OFW).”

“Hindi na puwede ang puwede na”, ito ang ipinagdiinan ni P’Noy sa mga proyekto ng pamahalaan na dapat magbigay ng kaginhawaan sa araw-araw na buhay ng Pinoy tulad ng imprastraktura, transportasyon, turismo at pangangalakal.

Ipapairal niya ang hustisya sa bansa. “Sa mga nang-api sa akin, kaya ko kayong patawarin, at pinapatawad ko na kayo. Sa mga nang-api sa sambayanan, wala akong karapatan na limutin ang inyong mga kasalanan”, ang hamon niya sa mga gumawa ng katiwalian.

"Secretary de Lima, you have your marching orders. Begin the process of providing true and complete justice for all.” Ito ang buong paninindigan na utos niya sa bagong Secretary of Justice.

Ilan lang ang mga ito sa makabuluhang inauguration speech ng Pangulo kung saan ang liwanag sa dakong Silangan ay muling naaninag. Nawa’y magtuloy-tuloy na ang pagbabago sa Pilipinas. Sa pamamagitan ng mga salitang binitawan ni P’Noy, maganap nawa ang lahat ng ito sa tulong at gabay ng Poong Maykapal.

“Hindi ko makakayang harapin ang aking mga magulang, at kayong mga nagdala sa akin sa yugto ng buhay kong ito, kung hindi ko maisasakatuparan ang aking mga binitawang salita sa araw na ito. Samahan ninyo ako sa pagtatapons ng laban na ito. Tayo na sa tuwid na landas.” – President Benigno Simeon “Noynoy” Aquino III.

Tunay nga na may pag-asa pa ang Pinoy.

TSD Readers’ Corner:

Mga Komento sa Bagong Pamahalaang P’Noy

President P-Noy is a symbol of hope for all Filipinos. He emulate servant leadership where the leaders are not masters to impose what they want but a servant to serve the people. He showed an example that must be followed by other officials. It is a challenge to everyone to support him so that we could see progress and we as ordinary citizen will have the courage to demand transparency in government services especially to those from POEA and OWWA. - Ransam S. Pirote, Bagong Bayani Awardee.

Unang-unang nag-marka sa aking isipan ay iyang isyu sa wang-wang. Bilang OFW hindi ko naman nabibigyan ng atensyon yan dahil narito tayo sa ibang bansa, pero isang magandang halimbawa ang pinapakita niya na sya mismo kahit may pribilehiyong gumamit nito ay hindi ito ginagamit bagkus sadyang tumitigil sa pa sya sa pulang ilaw ng trapiko (katulad ng ginawa ni Cory nung mga unang araw ng panunungkulan nya). Kung maipagpapatuloy sana ito ni P-Noy, maraming pang-aabuso ang masasawata at muling maibabalik ang pag-galang sa batas ng Pilipinas. Kailangan nating ipatupad ang batas. Di lang sa batas pantrapiko kundi sa pangkalahatan. Kailangang magkadisiplina ang mga Pinoy at nakikita ko na kung ang lider nila mismo ang magbibigay ng halimbawa magiging madali sa kanila ang sumunod at magiging masigasig ang mga kinauukulan sa pagpapatupad nito. Maganda ang simula nya. Ako ay umaasa na gagawin nya yung mga sinabi niya. Nawa’y hindi lang siya pang simula lang, sana tapusin nya ang pinasimulan nya dahil ang tagumpay ni P-Noy, tagumpay din ng Pinoy. - – Lito Nartea, member of Pinoy Expatz

"Kung si P-Noy ay magiging isang mabuting lingkod, di corrupt at may takot sa Diyos; tiyak ang bansa'y susulong at ang dugong Pinoy ay muling babangon". – Arthur Valeros, Coordinator of Pag-asa Community Support Group

Pag-iingat Upang Makaiwas sa Heat Stroke

Max Bringula (Abante ME Edition, 04 July 2010)

Matindi ang init na nararanasan ngayon sa buong Saudi Arabia at tinatayang iinit pa ito ng husto pagpasok ng buwan ng Hulyo at Agosto. Sa ngayon, ang temperatura ay halos umaabot na sa 48-50 degrees Celsius na mataas sa average level. Ang init ay sinasabayan pa ng humidity lalo na sa bahaging may karagatan tulad ng Eastern Region (Alkhobar, Dammam at Jubail) at Western Region (Jeddah).

Kung kaya’t pinag-iingat ang lahat (locals and expatriates) upang maka-iwas sa heat exhaustion o heat stroke na siyang kadalasang nangyayari sa ganitong uri ng panahon. Kamakailan lamang, isang kababayan natin ang nabiktima nito nang uminom ng malamig na malamig na tubig pagkatapos manggaling at mabilad sa matinding init sa labas. Pagka-inom niya ng malamig na tubig ay agad nanigas ang mga muscle nito sa sikmura na siya niyang ikinabagsak at ikinamatay.

Nagbigay na ng kautusan ang Minister of Labor ng Saudi na si Ghazi Al-Ghosaibi na huwag pag-trabauhin ang mga laborers sa ilalim ng matinding init ng araw. Isinasaad ng kautusang ito na ipatupad ang “no work policy from 12 noon to 3:00 PM” para sa mga laborers o yung mga nagtratrabaho sa ilalim ng init ng araw, lalo na sa buwan ng Hulyo at Agosto, ang buwan kung saan matindi ang init ng panahon o temperatura sa Saudi.

Samantala, narito ang mga dapat tandaan tungkol sa heat exhaustion o heat stroke. (Re-published from our article on the same subject on 20 June 2009)

Ayon sa Centers for Disease Control (CDC), ang heat exhaustion ay mararamdaman kapag nabilad ng matagal sa init ng araw o sa mataas na temperatura, kasama na ang pagkaubos ng body fluids o ma-dehydrate dahil sa labis na paglabas ng pawis sa katawan.

Ilan sa sintomas na tayo ay maaaring nakararanas ng heat exhaustion ay ang labis na tagagtak ng pawis, panghihina, pagkahilo, pagsakit ng ulo, panlalamig ng balat, paghinga ng mabilis at malalim (o yung halos hinahabol mo ang iyong hininga), at pagbagal ng iyong pulso.

Kapag naramdaman na ang ganito, tumawag agad ng tulong sa kasama upang ikaw ay maalalayan. Pumunta sa malilim at malamig na lugar at sikaping palamigin ang temperatura ng katawan.

Ang heat stroke naman ay siya ng pinakagrabeng mangyayari sa sinumang mabibilad sa labis na init o mataas na temperatura. Nagkakaroon ng heat stroke kapag mabilis na tumaas ang temperatura ng katawan at mawalan ito ng abilidad na mag-pawis. Ang temperatura’y maaaring umabot ng 106 degrees Fahrenheit o mataas pa sa loob lamang ng sampu hanggang labing-limang minuto, at kung hindi maaagapan ay maaaring ikamatay o ikabaldado ng biktima.

Ayon pa rin sa CDC, ang sintomas ng heat stroke ay nag-iiba sa iba’t ibang indibiduwal, subalit ang pinaka-common na sintomas nito ay ang labis na pagtaas ng body temperature na aabot ng mahigit sa 103 degrees Fahrenheit, pamumula at panunuyo ng balat dahil sa di pagpapawis, malakas at mabilis na tibok ng pulso, labis ng sakit ng ulo, pagkahilo at pagsusuka.

Papaano maiiwasan ang Heat Exhaustion o Heat Stroke?

Narito ang mga recommended tips mula sa Centers For Disease Control upang makaiwas sa heat exhaustion o heat stroke kapag dumating ang matinding init ng panahon o mabibilad sa mataas na init ng araw:

1) Uminom palagian ng malamig na tubig (o non-alcoholic at non-caffeinated beverages). Samantala, iwasan ang sobrang malamig na inumin na halos nagyeyelo na dahil ito’y maaaring makapagdulot ng pananakit ng sikmura.

2) Palagiang uminom ng tubig sa buong maghapon kahit di nauuhaw. Kapag nakaramdam ng pagka-uhaw, ito’y maaari ng pagsisimula ng dehydration.

3) Magpahinga paminsan-minsan at wag masyadong pagurin ang sarili lalo na kung may kabigatan ang trabaho tulad ng mga nasa construction.

4) Magsuot ng manipis na pananamit.

5) Kung maaari, manatili lamang sa loob ng gusali lalo na kapag matindi na ang init ng araw o mataas na ang temperatura.

6) Kung may mapupuntahang malamig na lugar na air-conditioned ay doon manatili.

7) Gawing ugali na maligo. Have a cool shower o sponge bath.

Ilan sa mga practical tips na aking narinig ay ang pagdadala o pagbaon ng iodized salt. Ito raw ay kailangan upang mapalitan ang salt na lumabas sa ating katawan dahil sa labis na pagpapawis.

Doon naman sa mga nagtratrabaho sa disyerto o sa mga open na lugar, sikaping humanap ng masisilungan kapag tumaas ang init ng araw. Magsuot ng caps o anumang panakip sa ulo at gumamit ng sunglass. Maglagay o balutan ang mukha ng panyo o anu mang tela upang ito’y maingatan sa init ng araw.

Sa mga construction, kadalasa’y binabago ang oras ng trabaho kapag di na matatagalan ang init kung araw. Ang trabaho’y ginagawa sa gabi at sa araw ay ipinapahinga na lamang.

Ilan lang ito sa mga dapat tandaan at mga paghahandang dapat gawin kapag sumasapit ang ganitong panahon o heat wave nararanasan ng sa ibanng bahagi ng mundo sanhi ng pagbabago ng klima sa buong daigdig.

Ang kalusuga’y mahalaga lalo na sa ating mga OFWs kung kaya’t sikaping sa anu mang magiging sanhi ng sakit o pagkasawi.

Tulong Para kay Rosa Vilma Recto

Max Bringula (Abante ME Edition)

Likas sa katangian ng Pinoy ang kagandahang-loob at pagiging matulungin. Sa oras ng kalamidad at matinding pangangailangan, maaasahan mo ang Pinoy sa pagtulong, lalo na kung sa ikakabuti ng taong tutulungan.

Ang bagay na ito ay muling napatunayan sa kaso ni Rosa Vilma Recto Balbin, isang OFW sa Riyadh, Saudi Arabia, na may sakit na kanser. Sa pamamagitan ni Dra. Rowena Zaplan ng Al Haramain Clinic, Riyadh, nailapit ang kalagayan ni Rosa Vilma sa Patnubay, isang grupo ng mga Filipino volunteers na umaabot sa mga kapus-palad nating mga kababayan na nangangailangan ng tulong. Isang SOS call ang pinadala ni Dra. Zaplan sa website ng Patnubay, ang www.patnubay.com, na inaksiyunan naman agad ng nasabing grupo.

Isang sulat ang dagliang ipinadala ni Joseph Henry Espiritu, administrator ng Patnubay, kay Ambassador Antonio Villamor ng Embahada ng Pilipinas sa Riyadh para hingin ang tulong na pagpapagamot at repatriation ni Rosa Vilma.

Agad naman umaksiyon ang ating Embahada. Ipinadala nila si Officer Zailon Ibrahim upang kaunin si Rosa Vilma at dalhin sa Bahay-Kalinga upang doon muna manatili habang inihahanda ang kanyang travel documents pauwi sa Pilipinas. Samantala, mangangalap sila ng tulong upang maipagamot muna si Rosa Vilma habang di pa siya nakaka-uwi. At kung makaka-uwi naman siya, sisikapin ng ating pamahalaan na matulungan si Rosa Vilma sa pagpapagamot sa Pilipinas.

Nasa stage two na ang sakit na kanser sa matris ni Rosa Vilma at ito’y nangangailangan ng dagliang operasyon upang di na lumala pa ang kanyang karamdaman. Iminungkahi ni Dra. Zaplan na mas makakabuti sa pasyente kung sa Pilipinas na magpapagamot. Nangangailangan ng gyne-oncology itong si Rosa Vilma at tanging sa Jose Reyes Memorial Medical Clinic (JRMMC) sa Tayuman o sa Philippine General Hospital (PGH) maaaring maipatingin ito. Dagdag pa niya, mas maaasikaso siya ng kanyang pamilya kung nasa Pilipinas.

Ayon kay Vice Consul Rousel Reyes, napag-alaman na tumakas si Rosa Vilma sa kanyang pinagtratrabauhan, ang Annasban sa Jeddah, noong June 2009, at tumungo rito sa Riyadh at nagtrabaho sa iba. Walang legal na transfer na naganap sa pagitan ng dati niyang sponsor at yung sa ngayon. Sa tulong ni Labor Attache Resty Dela Fuente ng POLO, sila’y nakipag-ugnayan na sa Annasban para dagliang mapa-uwi si Rosa Vilma.

(Update: Sa ngayon ay nasa Pilipinas na si Rosa Vilma Recto-Balbin. Umuwi siya noong Linggo, 27 June 2010.)

May mga indibiduwal din mga kababayan natin ang agad na umaksiyon ng marinig nila ang kalagayan ni Rosa Vilma. Isa na rito sa Susan Tobias na isang BA Christian at nagtratrabaho sa RKH Military Hospital. Kanyang ni-refer si Rosa Vilma sa kanyang kaibigang doctor na si Dr. Ishmael Al-Badawi Al Thuraya Clinic na bigyan si Rosa Vilma ng free treatment, at pumayag naman ito. Sumailalim si Rosa Vilma sa isang radiation therapy sa pamamahala ni Dr. Al-Badawi.

Dagdag naman ni Susan, huwag agad pauwiin si Rosa Vilma dahil napakamahal ng pagpapagamot sa Pilipinas. Kung walang din namang sapat na pera, maaaring hindi matustusan ang “continuous medication” na kakailanganin. Pag nagkagayon, madaling kakalat ang sakit. I-saturate muna raw ang lahat ng posibleng tulong na maaaring makalap para sa pagpapagamot kay Rosa Vilma. Gayunpaman, mismong si Rosa Vilma ang humihiling na siya’y pauwiin na lamang sa Pilipinas.

Sa ulat ni Roland Blanco sa Balitang Middle East, nanawagan si Rosa Vilma Recto upang humihingi ng tulong bago ito naka-uwi sa Pilipinas. Wika niya, “humihingi po ako ng tulong….tatanawin ko po na malaking utang na loob. Ang Diyos na po ang bahala sa inyo.”

Sa mga nagnanais na tumulong kay Rosa Vilma Recto Balbin, maaari kayong makipag-ugnayan kina Elma at Enrico Recto sa address na 9110 Barangay 9, Bulangan Street, Mabuya, Carmona, Cavite.

Ipinapaabot naman ni Joseph Henry Espritu ng Patnubay ang pasasalamat sa mga taong tumulong kay Rosa Vilma, tulad nina Dra. Rowena Zaplan na siyang unang naggamot kay Rosa Vilma at sa staff ng Al Haramain Clinic na nag-abot ng tulong pinansiyal, Susan Tobias at Erwin Tobias ng BA group sa pag-aalay at pagbibigay ng pag-asa kay Rosa Vilma, Dr. Ishmael Al-Badawi at staff ng Al Thuraya Clinic ng RKH Oncology Department sa libreng medication at radiation therapy, sa Assistance to National Section ng Embahada, kay Vice Consul Rousel Reyes, Officers Jerome Friaz, Zailon Ibrahim, Jimmy Harris, Lucman Guyamal at sa tanggapan ng POLO sa Pilipinas na nangako na bibigyan si Rosa Vilma ng libreng hospitalization at treatment. Gayundin sa mga kasamang wards na nag-alaga kay Rosa Vilma sa loob ng Bahay-Kalinga, at sa lahat ng mga tumulong kay Rosa Vilma na di napangalanan, maraming-maraming salamat po. Mabuhay ang Bayanihan ng Pinoy.