Passport Application and Renewal, by Appointment Na

Max Bringula (Abante ME Edition, 29 May 2010)

Para sa kaalaman ng lahat, may bagong patakaran ngayon na pinatutupad ang Department of Foreign Affairs (DFA) ng Pilipinas sa mga kumukuha ng bagong passport at nagre-renew, ito ang Passport Appointment System.

Kung dati rati ay kailangang tumungo ng mga applicants, alas-kuwatro pa lang ng umaga sa dati nitong opisina sa Pasay City (malapit sa Cuneta Astrodome) upang mauna sa pila, ngayon ay hindi na. Yun lamang may appointment schedule (date and time) at appointment reference number ang makakapag-transact para kumuha ng bagong passport o mag-renew sa bagong opisina ng DFA Office of Consular Affairs (OCA) sa ASEANA Business Park, Bradco Avenue corner Macapagal Boulevard, Paranaque City (malapit sa SM Mall of Asia).

Ang bagong patakarang ito ay inilunsad ng DFA-OCA upang maiayos at mapadali ang pag-apply ng bagong passport at pag-renew. Hindi na kailangan pang pumila ng mahaba ang isang aplikante tulad ng dati.

At upang matiyak na ito’y maisasagawa, mahigpit na ipinapatupad ngayon ng DFA-OCA ang “no appointment, no processing” policy.

Narito ang ilang mga dapat malaman sa Passport Appointment System.

1) May dalawang pamamaraan ng pagkuha ng appointment:

a) DFA Appointment Website – mag-log in sa www.passport.com.ph.
b) DVA Appointment Hotline – tumawag sa (02) 737-1000.

2) Tandaan ang inyong Reference Number na siya kakailanganin kapag
nagtungo na sa DFA para sa inyong appointment schedule.

3) Kailangang nasa DFA Consular Office ng 30 minutes before the appointment schedule. Early and late comers would not be entertained. Dapat eksaktong 30 minutes before the time ng iyong schedule ay naroroon ka na.

4) Kailangan ang Physical appearance ng aplikante. Hindi pwede ang
chaperone o kaya’y proxy sa mga aplikanteng 18 years old and above.

5) Bumalik sa araw ng Release Date ng inyong bagong passport. Samantala, maaari ring ipa-deliver na lamang sa inyong address ang passport at hindi na kailangan pang bumalik sa DFA. Tumungo lamang sa Delivery Counter para magbayad ng delivery fee kung nais na ipa-deliver ang passport.

Kung may karagdagang katanungan o nangangailangan ng paglilinaw, maaaring tawagan ng OFW at pamilya nito ang DFA sa mga sumusunod na numero: 831-8971; 551-4437; 551-4402; 834-4424; 836-7760; 836-7748, 836-7750 at 834-4835.


e-Passport, Available Na

Samantala, maaari ng mag-avail ang sinuman ng e-Passport (o Philippine Electronic Passport). Ito ang siyang ipinamamahagi na sa mga bagong nag-a-apply ng passport at sa mga nagre-renew sa Pilipinas.

Mas highly-secured ang e-Passport kumpara sa MRP o sa dating green passport. Ang e-Passport ay hindi pwedeng ma-tamper kung kaya’t nakapagbibigay ito ng mas mainam na border protection at security sa mga mayroon nito.

Sa e-Passport, di na kailangan pang magdala ng passport photos dahil may mahine na gagamitin na siyang magka-capture ng image at personal data.

Ang Fees na babayaran para sa e-Passport ay ang sumusunod -

Regular Processing (20 days) PHP 950.00
Express Processing (10 days) PHP 1,200.00
Lost Passpport (additional fee) PHP 200.00

Magsisimula na ring mag-issue ang Philippine Embassy ng e-Passport. Sa Riyadh, hinihintay na lamang ang makina na gagamitin. Ang e-Passport ang siyang ipapalit sa dating MRP (machine-readable passport).

*********
TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Nagtatanong tungkol sa e-Passport at Embassy On-Wheels

Gud PM po Sir Max. Si Mr. Joel Icawat po ito. Tanong ko lang po kung nag-i-issue na ba diyan sa IPSA ng e-passport.

Hi Joel, sa ngayon ay hindi pa, subalit malapit ng magkaroon at ito’y gagawin muna sa Consular Section ng Philippine Embassy sa Riyadh. Kapag mayroon na rin sa Eastern Province, Saudi Arabia, ipapaalam namin agad ito sa inyo. - Max

Magandang araw po sa inyo, magtatanong lang po ako kung meron na po bang info kung kelan po ang susunod na schedule ng Embassy On-Wheels dito sa Alkhobar? Thank you po and God bless! – Julius Caesar Dimapilis

Hi Julius, katatapos lang ng Embassy On-Wheels dito sa Eastern Province noong 13 and 14 May. Wala pang kasunod na schedule. Kung magkakaroon uli, ito ay kadalasang ini-schedule sa huling Huwebes at Biyernes. - Max

Marami Pa Rin ang Nabibiktima ng Text at eMail Scam

Max Bringula (Abante ME Edition, 27 May 2010)

Dala nga ba ng labis na pangangailangan kung bakit marami pa rin sa ating mga kababayan ang nabibiktima ng Text at eMail Scam, o sadyang mabait lamang ang Pinoy at madaling mapaniwala? Maaaring lehitimo ang dahilang ito kung kaya’t kahit kataka-taka na ika’y mapili sa dinami-dami ng Pinoy na manalo ng isang milyong piso ay agad ka pa ring naniwala at kinalaunan ikaw na itong nagpapadala ng pera sa halip na ikaw ang tatanggap sana ng perang napanalunan.

Ganito ang nangyari sa isa nating kababayan na nagngangalang Miriam Gumpad. Ayon sa text message na ipinadala sa atin ni Amira Bartolome ng Alkhobar, KSA, labis daw siyang nalungkot sa sinapit ng kaibigang si Miriam dahil dalawang buwan na sahod daw nito ay naipadala sa nagpakilalang Atty. Fajardo. Huli na ng malaman ni Miriam na siya’y nabiktima ng scam. Nagsisisi siya na agad naniwala sa text message na natanggap na umano’y nanalo siya ng isang milyong piso mula sa Manny Villar Foundation. Nakadalawang beses siyang nagpadala ng pera na bale pinaka sahod niya ng dalawang buwan.

Malaking kawalan ito kay Miriam pagkat di naman ganoon kadali kitain ang pera lalo pa nga’t di naman kalakihan ang kanilang tinatanggap na sweldo kada buwan. Hiniling ni Almira na mailathala sa Abante ME Edition ang nangyari sa kaibigan upang magsilbing babala sa iba ang gayong karanasan.

Samantala, nagpadala rin ng Advisory ang Philippine Embassy sa Riyadh patungkol sa lumalaganap na bagong eMail scam na ginagamit ang pangalan ng Philippine Embassy at iba pang Philippiine institutions sa abroad.

Isang OFW sa Saipan ang lumapit sa Philippine Consulate General doon upang i-verify ang eMail na natanggap niya na umano’y galing sa Philippine Embassy sa Muscat, Oman na nagsasabing nanalo siya ng 500,000 pounds at hinihingi ang kanyang mga mahahalagang inpormasyon upang mapadala ang perang napanalunan niya.

Dahil dito, nanawagan ang Philippine Embassy sa mga overseas Filipino workers na siyang numero unong target ng mga ganitong panloloko na mag-ingat at huwag magpapaniwala agad kung may matatanggap na eMail at nagsasabing sila’y nanalo ng kagamitan o cash prizes. Sa halip, agad na i-report o i-verify ito sa Embahada at Konsulada sa inyong lugar. Sa Philippine Embassy sa Riyadh, maaari kayong tumawag sa kanilang numero na 01-4823559 (telepono), o mag-fax sa 01-4883945 o mag-eMail sa filembry@sbm.net.sa.

“Let us try to raise our awareness and be on guard against unscrupulous and insidious cyber criminals who will try all sorts of trickery to steal other people’s identities or swindle their hard-earned money,” ang babalang sinabi ni Ambassador Antonio P. Villamor.

Dapat magtulungan ang bawat isa na masugpo ang ganitong mga panloloko. Paalalahanan natin ang ating mga kasama na huwag na huwag magpapaniwala agad sa mga text at eMail na natatanggap. Pakasiguruhin na lehitimong text at eMail iyon at hindi isang scam lamang. Magtanong at mag-verify bago sumagot o gumawa ng karampatang aksiyon.

Nasa ating mga sarili rin ang ikapapahamak natin. Tulad ng madalas nating naririnig na “walang maloloko kung walang magpapaloko”.

At tila pursigido ang mga ito na makapanloko. Kamakailan lamang ay may natanggap akong text sa aking roaming number mula sa numerong 00-639094877562 na ganito ang sinasaad:

CHARITY FOUND OF CONG. MANNY PACQUIAO N’FORM U DAT UR CELL# WON 750,000, 2ND PRIZE WINNER DRAW, MAY 22, 2010. DTI PERMIT 2168 SERIES OF 2010. PLS CALL ME NOW. ATTY. REY A. CUANGCO. CONTACT # 09206396120.

“Lokohin mo ang lelong mong panot” ang aking naibulalas. Ako pa ang lolokohin ng mokong na ito. At mali-mali pa ang spelling. Gawin daw “Found” yung Fund.

Kaya mga kasama, huwag magpapaniwala agad upang di tayo mabiktima.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Naghahanap kay Jenilyn Ronquillo

Gud AM po, Max. Isa ako sa mahilig magbasa ng Abante. Naisip ko kasi na baka ikaw ang daan para makatulong sa problema ko. Ako si Leonardo Morales. May asawa ako dito sa Riyadh pero hinde ko alam kung san sya dito. Ang name nya, Jenilyn Ronquillo. Gusto ko na syang pauwiin sa Pinas. Salamat. Sana matulungnan mo ako. – Leonardo Morales ng KSA (966-560737226)

Sa mga nakakakilala kay Jenilyn at nakaka-alam ng kanyang kinaroroonan, maaari po ninyong tawagan ang asawa nitong si Leonardo sa nabanggit na numero sa itaas. - Max

Masarap, Masakit ang Maging OFWs

Ang grupo ng mga OFWs sa Bahrain noong Filipino Club 25th Anniversary celebration / Kuha ni Bhoy Biazon.

by Max Bringula (Abante ME Edition, 26 May 2010)

Ang sumusunod na artikulong mababasa ninyo ay mula sa ibinahagi ni Jeremiah Javier sa kanyang Facebook. Hiningi natin ang kanyang permiso na mailathala ito sa Tinig sa Disyerto upang makapagbigay gabay at makapag-bukas ng puso’t isipan ng ating mga kababayan sa Pilipinas patungkol sa tunay na kalagayan ng mga OFWs tulad natin sa labas ng bansa. Binago ko lamang ang titulo upang maging mas akma sa nilalaman nito. - Max

Sa may asawa, kapatid, anak, kaibigan, at kamag-anak na OFW. At lalo na sa mga gustong mangibang-bansa, nais kong ibahagi sa inyo, ang natanggap kong eMail na ito. Maaaring makatulong ito upang lalong maintindihan ng bawa't isa ang tunay na ibig sabihin ng pagiging isang OFW. Tiyak na may mapupulot tayong aral dito.

Hindi mayaman ang OFW. We have this notion na 'pag OFW o nasa abroad ay mayaman na. Hindi totoo yun. A regular OFW might earn from P20K-P30K per month, depende sa lokasyon. Yung mga taga-Saudi or US siguro ay mas malaki ang sweldo, but to say that they're rich is a fallacy. Malaki ang pangangailangan kaya karamihan sa amin ay nag-a-abroad. Maraming bunganga ang kailangang pakainin kaya umaalis kami sa Pinas. Madalas, 3/4 o kalahati ng sweldo ay napupunta sa tuition ng anak at gastusin ng pamilya.

Mahirap maging OFW. Kailangan naming magtipid hangga't kaya. Oo, masarap ang pagkain sa abroad pero madalas ay paksiw o adobo (hindi kc agad nasisira ito) at itlog lang ang kinakain namin para makaipon. Pagdating ng kinsenas o katapusan, ang unang tinitingnan eh ang conversion ng peso sa dollar o riyal o euro. Mas okay na kami na lang ang magutom kaysa gutumin ang pamilya.

Kapag umuuwi kami, kailangan may baon/pasalubong kahit konti, kasi maraming kamag-anak ang sumusundo sa airport o naghihintay sa probinsya. Alam nyo naman 'pag Pinoy, yung tsismis na OFW ka attracts a lot of relatives. Kapag hindi mo nabigyan ng pasalubong eh magtatampo na yun at sisiraan ka na. Well, hindi naman lahat pero I'm sure sa mga OFW dito eh may mga pangyayaring ganun.

Magtatrabaho ka sa bansang iba ang tingin at trato sa gaya nating mga Pinoy, kahit na masipag at mas may utak tayo kaysa sa kanila. Malamang marami ang naka-experience na nang pang-gugulang o discrimination at their various workplaces. Sige lang, tiis lang, iiiyak na lang namin kasi kawawa naman ang pamilya 'pag umuwi kami sa Pinas.

Besides, wala ka naman talagang maasahang trabaho sa Pilipinas ngayon. Mahal ang bigas, ang gatas, ang sardinas, ang upa sa apartment. Tiis lang kahit maraming pasaway sa trabaho, kahit may sakit at walang nag-aalaga, kahit hindi masarap ang tsibog, kahit pangit ang working conditions, kahit delikado, kahit mahirap. Kapag nakapag-padala na kami, okay na yun. Tawag lang sa pamilay at pagsasabing, "hello! kumusta na kayo?" ay ayos na.

Hindi bato kaming mga OFW. Tao rin ang OFW, hindi kami money o cash machine. Napapagod rin, nalulungkot, nagkakasakit, nag-iisip at nagugutom. Kailangan din ang suporta, kundi man physically, emotionally o spiritually man lang.

Tumatanda rin kaming mga OFW. Sa mga nakausap at nakita ko, marami ang panot at kalbo na. Most of them have signs and symptoms of hypertension, coronary artery disease and arthritis. Yet, they continue to work thinking about the family they left behind.

Marami ang nasa abroad, 20-30 years na, pero wala pa ring ipon. Kahit anong pagpapakahirap, sablay pa rin. Masakit pa kung pasaway rin ang sinusuportahang pamilya sa Pinas - ang anak adik o nabuntis/nakabuntis; ang asawa/gf/bf may kinakasamang iba; ang kapatid nakuntento na lang na umasa at tumambay. Naalala ko tuloy ang sikat na kanta dati, yung "Napakasakit, Kuya Eddie”.

Bayani kaming mga OFW. Totoo yan! Ngayon ko lang na-realize na bayani ang OFW sa maraming bagay. Hindi bayani na tulad ni Flor Contemplacion. Bayani in the truest sense of the word. Hindi katulad ni Rizal o Bonifacio na kalayaan ang ipinaglaban. Mas higit pa dun, mas maraming giyera at gulo ang pinapasok ng OFW para lang mabuhay.

Mas maraming pulitika ang kailangang suungin para lang tumagal sa trabaho lalo na't parang mga ahas at parang mga amag ang mga kasama sa trabaho.

Mas mahaba ang pasensya namin kaysa sa mga ordinaryong kongresista o senador sa Philippines dahil sa takot namin na mawalan ng trabaho at sweldo.

Malas naming mga OFW, swerte ng mga buwayang pulitiko. Hindi umuupo ang OFW para magbigay ng autograph o interbyuhin ng media (unless nakidnap o na-maltrato). Madalas nasa sidelines lang ang OFW.

Kapag lilisan ng bansa, malungkot, and on the verge of tears. Kapag dumarating, swerte 'pag may sundo; Kapag naubos na ang ipon at wala nang maibigay, wala na rin ang kamag-anak. Sana sikat kaming mga OFW para may boses kami sa Kamara.

Ang swerte ng mga buwayang pulitiko nakaupo lang sila at ginagastusan ng pera ng Filipino. Hindi nga sila naiinitan ng matinding araw o napapaso ng langis; napagagalitan at nasasampal ng amo; kumakain ng paksiw para makatipid; nakatira sa compound with conditions less than favorable; nakikisama sa ibang lahi para mabuhay. Ang swerte ninyong mga buwayang pulitiko kayo, sobrang swerte ninyo.

Matatag kaming mga OFW. Matatag ang OFW, mas matatag pa sa sundalo o kung ano pang grupo na alam nyo. Magaling sa reverse psychology, negotiations at counter-attacks.

Tatagal ba ang OFW? Tatagal at dadami pa kami hangga't hindi pa natin alam kung kailan magbabago ang Pilipinas. Kailan nga kaya?... o may tsansa pa ba?

Masarap isipin na kasama mo ang pamilya mo araw-araw. Nakikita mo mga anak mong lumalaki at naaalagaan ng maayos na kasama ka. Masarap kumain ng sitaw, ng bagoong, lechon, inihaw na isda, taba ng talangka. Masarap manood ng pelikulang Pinoy, luma man o bago.

Iba pa rin ang pakiramdam kung kilala mo at nakakakuwentuhan mo ang kapitbahay mo. Iba pa rin sa Pilipinas; iba pa rin kapag Pinoy ang kasama mo except ('pag hambog at utak-talangka); Iba pa rin 'pag nagkukwento ka at naiintindihan ng iba ang sinasabi mo; Iba pa rin ang tunog ng "mahal kita!", "day, ginahigugma tika"," "Mingaw na ko nimo ba, kalagot!". Iba pa rin talaga.
Sige lang, tiis lang, saan ba't darating din ang pag-asa.

Kung may kamag-anak kang OFW mapalad ka at wala ka dito sa kinalalagyan namin at andiyan ka kasama mo ang mga mahal mo sa buhay.

Kung OFW ka at binabasa mo ito, mabuhay ka dahil ikaw ang tunay na BAYANI ng lahing PILIPINO!!!

TSD - Isang Taon Na!

Ang inyong lingkod kasama ng aming Editor In-Chief at Press Photographer, Bhoy Biazon.
Kopya ng unang artikulo sa Tinig sa Disyerto, 16 May 2009.
Max Bringula (Abante ME Edition, 24 May 2010)

Parang kaylan lang. Isang taon na pala ang column kong ito sa Abante Middle East Edition, ang Tinig sa Disyerto (o TSD). 16 May 2009 nang unang lumabas ang TSD sa Abante ME sa pamamagitan ng ating artikulo noon na may titulong “Alikabok Muling Nanalasa”. At mula noon ay sunud-sunod na ang naging mga panulat natin na tumatalakay sa wide-ranging topics sa buhay OFW dito sa Gitnang Silangan.

Sa isang taon ng TSD, maraming mga talakayin na rin ang ating inihatid sa mga mambabasa para sa kanilang dagdag-kaalaman, gabay at pag-iingat. Ilan sa mga ito ay ang “Paano Ba Aawitin ang Lupang Hinirang” (19 May), “Kahirapan sa Bansa, May Solusyon Pa Kaya” (24 May), “Pilipinas, Malaya Ka Na Nga Ba?” (12 June), “Mabilis na Pagtaas ng Swine Flu Cases, Nakaka-alarma” (24 June), “Proteksiyon at Paalala sa OFWs” (12 July), “Muling Pagdaraos ng OAV Registration” (18 July), “Computer-Literacy ng Bawat OFWs” (29 July), “Huwag Nagpapaniwala Agad” (12 Aug), “Akyat-Bahay Patuloy na Umaatake – Dapat Mag-ingat” (13 Aug), “Karapatang Bumoto, Wag Sayangin” (24 Aug), “Mga Dapat Tandaan sa Buwan ng Ramadan” (25 Aug), “Mag-ingat sa mga Mapag-panggap” (15 Sep), “e-Passport Ready Na, Mga Dating Passport Pwede Pa Rin” (06 Oct), atbp.

May mga patungkol din sa iba’t ibang Filipino community activities at mga mahahalagang balita sa atin tulad ng “Filipino Professionals, Sama-samang Nag-Oath-Taking” (20 July), “Cory Aquino, Simbolo ng Demokrasiya” (03 Aug), “PBL Games Muling Bubulusok” (15 Aug), “Isang Victory Party Para Kay Kimverlie” (19 Aug), “IBL 5th Season Opening, Matagumpay na Idinaos” (05 Sep), “Natamong Tagumpay sa Pagbisita ni PGMA” (28 Sep), “Dahil Kay Ondong at Pepeng” (14 Oct), “Pag-asa, Isang Dekada Na” (23 Oct), “Dam…Dam…Dam…ang Kawawang Dam” (25 Oct), “Embassy On-Wheels sa EP, Tuloy-Tuloy Na” (27 Oct), “Saring-Himig, Nagwagi ng Silver Award” (29 Oct), “Dagdag na Manpower Para sa POLO-ERO” (31 Oct), “Efren Penaflorida, Tinanghal na Kampeon” (28 Nov), “Isang OFW Nakasama sa Napaslang sa Maguindanao Massacre” (08 Dec), atbp.

Nagkaroon din tayo ng mga sensitibong isyu at balita kung saan nakatanggap din ang inyong lingkod ng mga puna, pagbatikos at kung anu-ano pang mga di magagandang salita na kaakibat na ng buhay ng isang mamamahayag. Subalit ang lahat ng ito’y ating napagtagumpayan pagkat tayo’y panig sa totoo at tama lamang. Ilan sa mga panulat na ito ay ang “Simpatiya Kay Laila” (06 July),
“Opisyal Na Pahayag ng Programang Bantay OCW ni Susan K” (19 July), “Pagtulong sa Kapwa OFW ang Tanging Hangad Ko” (25 July), “Paano Nga Ba ang Tamang Pagtulong” (12 Sep), “Reaksiyon sa Press Release ng Migrante” (18 Oct), at “Panawagan ng isang HSW na Magkaroon ng Day-Off” (06 Nov).

Iba’t ibang personalities din ang ating nailathala sa ating column na naging laman ng mga balita’t peryodiko tulad ni Pound-for-Pound King na ngayon ay Congressman na ng Saranggani District, Manny Pacquiao, ang yumaong Ginang Cory Aquino, gayundin ang King of Pop, Michael Jackson, Pangulong Gloria Macapagal-Arroyo, Ambassador Antonio P. Villamor ng Philippine Embassy, Riyadh, Labor Attache David Des T. Dicang ng POLO-ERO, TFC Pop Star Champion Kimverlie Molina, CNN Hero Efren Penaflorida, at marami pang iba.

Sa puntong ito, nais kong pasalamatan ang mga taong naging daan upang maisakatuparan ang pagkakaroon ng Tinig sa Disyerto sa Abante ME Edition. Unang-una, of course, ang aming Editor In-Chief at guwapong tulad ko rin (hehehe… ) na si Bhoy Biazon na naka-base sa Bahrain. Gayundin si Manong George Palencia, Bagong Bayani awardee, na siyang nagpakilala sa akin kay Mr. Biazon, at sa mga kapwa ko manunulat at mamahayag na siyang umalalay sa akin at nagbigay ng lakas ng loob sa larangang aking pinasok tulad nina Flor Catanus ng ABS-CBN TFC Middle East, Joe Avancena ng Saudi Gazette, at Dinan Aranan ng ABS-CBN TFC Middle East and Arab News.

At syempre, hindi magiging tagumpay ang column na ito kung wala ang mga libo-libong mambabasa na sumusubaybay sa aking panulat mula sa iba’t ibang bahagi ng Gitnang Silangan tulad ng Bahrain, Qatar, UAE, Kuwait at Saudi Arabia na walang-sawa ring nagpapadala ng mga eMail at text messages sa inyong lingkod.

Sa inyo pong lahat, maraming-maraming salamat sa inyong pagtitiwala. Ang papuri ay sa ating Diyos lamang!

Sa mga nagnanais na makakuha ng sipi ng mga nabanggit na artikulo, maaari kayong sumulat sa aming Editor In-Chief, Mr. Bhoy Biazon, P.O. Box 50, Manama, Kingdom of Bahrain, o kaya’y tumawag sa telepono 00-973-17877525 o mag-fax sa 00-973-1717877526. Maaari rin kayong mag-eMail sa abantenews@yahoo.com, o sa pinnacle@batelco.com.bh. O kaya nama’y bumisita sa website ng Tinig sa Disyerto, ang http://abanteme.blogspot.com/.

*********

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Nagtatanong sa Kalagayan ni Wilfredo C. Andrada

Good PM, Sir. Isa po akong avid reader of your article here in Qatar. Gusto ko sanang humingi ng tulong sa inyo. Tungkol sa aking pamangkin na si WILFREDO C. ANDRADA. Siya po ay nagtratrabaho sa Riyadh. 3 yrs na po na wala kaming balita sa kanya. Ang sabi ng iba baka nakakulong siya. Paano po naming matutukoy ang kanyang kinaroroonan? Sana po matulungan ninyo kami. Lubos na gumagalang – Jorge ng NDIA. Doha, Qatar – 974-3263145

Dear Jorge, nakipag-ugnayan na kami sa Embahada ng Riyadh tungkol sa pamangkin mo. Advise kita kapag may balita o development akong matanggap mula sa kanila. - Max

JEJEMON FEVER PATAYIN! - DepEd

Nina Nonnie Ferriol at Al Jacinto (Abante, 24 May 2010)

Mahigpit na nananawagan ang Department of Education (DepEd) sa mga magulang na makipagtulungan sa mga guro upang masugpo ang lumalalang problema ng mga mag-aaral dahil sa pagiging "jejemon".

Sinabi ni DepEd Sec. Mona Valisno na bagama't sa paaralan at ang mga guro ang pangunahing nagtuturo sa mga estudyante ng tamang edukasyon, subalit malaking responsibilidad pa rin ng mga magulang na gabayan at magsilbing modelo sa kanilang mga anak.

Dahil sa problema sa nauusong "jejemon" kung kaya't bumabalangkas na ang DepEd ng mga solusyon at regulasyon sa mga paaralan na ipatutupad kontra sa paglaganap ng "jejemon fever" na siyang dahilan ng mali-maling spelling (Filipino man o English) at pagbagsak sa "composition at grammar" ng mga mag-aaral.

Nananawagan din si Valisno sa mga mag-aaral na gumagamit ng cellphone na sa halip na i-shortcut ang mga mensahe ay buuin na lamang at i-maximize ang nakalaang mga karakter para sa small messaging system (SMS) at huwag ng gumamit ng mga salitang "jejemons" dahil maling-mali umanong pausuhin ang ganitong mga klase ng spelling at komposisyon.

Sinasabing mayroong apat na kategorya ang jejemons, ito ay ang: MILD - e0wpU. mxTAh p0eh; MODERATE - e0w pf0w. nAh m1sz pf0u qtAh. MwAhxx!; SEVERE - 30w Po3h! an0h p03h gWa U? Txt nA An6 mGa giZing pFa!; at TERMINAL JEJEMONS - 30w p0EH. m3n4 p1p0L! nUam1Xz k0 pHoU k30! j3j3j3j3!.

Mula sa Zamboanga City, isinatinig din ni DepEd Asst. Sec. Jonathan Malaya ang determinasyon ng kagawaran na sugpuin ang masamang impluwensiya ng "jejemon fever" sa kaisipan ng mga kabataan.

"They should be able to send communication in a manner that is comprehensible and the Department of Education has to make a stand. The teachers should teach students the right way to communicate," ani Malaya.

Isang halimbawa ng "jejemon" texting ay: "e0wSsZz p0wh-hZzmUsZtAhH nUah pOwhHzz kEowHsz?" na kung iintindihin lamang ay ang ibig sabihin: "Hello po, musta na po kayo?"

Samantala, isang "jejemon" texter ang nagsabing dapat napuna rin ng Department of Education ang kanta ng Sex Bomb Dancers na "Bilog na Hugis Itlog" dahil kahit saan anggulo tingnan ang hugis ng itlog ay hindi ito bilog kundi oblong.

"Ang dami pong problema naming mga estudyante tulad ng libro, desk at silya, silid-aralan, pero ang pagte-text ba namin ng jejemon ay panghihimasukan pa ng DepEd? Yun nga pong kanta ng Sex Bomb Dancers na Bilog na Hugis Itlog ay mali po, bakit hindi nila pinansin? Bilog po ba ang hugis ng itlog?" tanong pa ni Jejemon Rhea.

Free Medical and Dental Check-up Para sa OFW

Ang nursing staff ng Mohammad Dossary Hospital habang nagkakaroon ng medical mission. Ang buong staff ng Mohammad Dossary Hospital kasama si Mary Jane Tupas. Makikita sa larawan (nakaupo sa may kaliwa) si Mr. Abdul Fettah Ennayel, ang Director General ng MDH

Max Bringula (Abante ME Edition, 21 May 2010)

Bilang pagkilala sa naiambag ng Filipino expatriates sa Saudi Arabia, at sa kanilang likas na kasipagan at abilidad sa trabaho, buong pagmamalaking inilulunsad ng Mohammad Dossary Hospital (MDH) ang isang Free Medical and Dental Check-up para sa mga OFWs sa Eastern Province, Saudi Arabia, sa pakikipagtulungan ng OFW Congress-Eastern Province.

Ang medical mission ay gaganapin sa Biyernes, 28 May 2010, mula ala-siyete ng umaga hanggang ika-apat ng hapon (8:00 AM – 4:00 pm) sa hospital ground and facilities ng Mohammad Dossary Hospital kaalinsabay ng kanilang programang Health Awareness.

Magkakaroon ng sumusunod na medical services and consultation:

1) Free blood pressure check-up and consultation.
2) Free Laboratory tests – fasting cholesterol, fasting blood sugar, plus CBC and Thyroid function test for female over 35 years of age.
3) Free dental check-up and consultation (only for the first 250 persons registered on the said date)
4) Free eye check-up and consultation (only for the first 250 persons registered on the said date)

Ayon kay Mary Jane P. Tupas, Director of Nursing ng Mohammad Dossary Hospital at President ng OFW Congress, ang medical mission na ito ay taun-taong ginagawa ng MDH sa kanilang empleyado at sa buong komunidad ng OFWs, sa pakikipagtulungan ng OFW Congresss.

Kanyang ipinapaabot ang paanyaya sa lahat ng mga Pilipino sa Eastern Province na makibahagi sa programang ito at i-take advantage ang libreng check-up at consultation.

Para sa mga katanungan tungkol sa nasabing programa, maaari kayong makipag-ugnayan sa mga sumusunod na opisyales ng OFW Congress - EP: Junielyn Marte (DG for Health) – 0568892482 / Mary Jane Tupas (President) – 0507886413 / Andrew Nathaniel Santos (Sec. General) – 0553552107 / Joselito Tomas (DG for Information) – 0508124346 / at Martin Valenzuela (DG for Membership) – 0502422157.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Nagnanais na Makauwi

“Sir Max, gud evening. I’m Lea of Dammam. I got your number from my friend. I just want to refer to you my problem. I came here in KSA w/o contract. I’m now 8 months. Pwede ba ako makauwi sa Pinas?”

Dear Lea, kung papayagan ka ng amo mo, maaari ka namang makauwi. Yun nga lamang dahil 8 months ka pa lang, ito’y maituturing na Resignation (kahit walang kang kontrata), at dahil diyan ikaw ang magbabayad ng air ticket mo pauwi. Mas mainam na kausapin mo ng maaayos ang amo mo at ipaliwanag sa kanya kung bakit nais mong umuwi na. Kung hindi naman gaanong kabigat ang kadahilanan ng iyong pagnanais na umuwi, mas makakabuting manatili ka sa iyong trabaho at tapusin ito. Isaalang-alang mo na kung wala ka rin namang mapapasukang iba (dito o sa Pilipinas), mas mainam na na may trabaho ka ngayon. - Max

“Gud PM po, Sir Max. Pwede po humingi ng payo syo? Domestic Helper po ako sa Riyadh. Bale mag-aanim na pong taon ako nagtratrabaho sa amo ko. Ngayon po, balak ko na pong umalis sa kanila. Pwede po ba akong humingi ng employment record. Thank you very much.”

Kabayan, pwede kang makahingi ng employment record. Karapatan mo yan bilang isang manggagawa. Kausapin mo lang din ng maayos ang iyong amo tungkol sa hinihiling mong employment record. - Max

Hindi Pa Tapos Ang Laban

Max Bringula (Abante ME Edition, 18 May 2010)

Ito ang pinanindigan ni Sen. Manuel “Mar” Roxas nang umabante sa kanya si Makati Mayor Jejomar Binay sa pagka-bise-presidente sa katatapos na eleksiyon noong Mayo 10.

Mahigit na walong-daang libong boto ang lamang ni Binay ng Puwersa ng Masang Pilipino (PMP) kay Roxas ng Liberal Party, subalit ayon sa huli mababago ang senaryo kapag naisama na ang boto ng Kabisayaan na siyang balwarte ng mga Roxas.

“Until the canvassing is over, our fight does not end,” ani ng kampo ni Roxas tungkol sa gitgitang laban na Roxas-Binay, o Binay-Roxas, habang ang ibang katunggali nila ay nag-concede na tulad nina Loren Legarda ng Nacionalista Party, Edu Manzano ng Lakas-Kampi-CMD, Bayani Fernando ng Bagumbayan, Perfecto Yasay ng Bangon Pilipinas at Jay Sonza ng KBL.

Maging ang pumapangalawa sa karera sa pagka-Pangulo na si Joseph ‘Erap’ Estrada ay di pa rin sumusuko. Bagama’t milya-milya na ang agwat ni Noynoy Aquino, umaasa pa rin si Erap na magbabago ang ihip ng hangin. Para sa kanya, hindi pa tapos ang laban.

Kamakailan lamang din, binawi naman ni JC Delos Reyes ng Kapatiran Party ang kanyang pagtanggap ng pagkatalo sa pagka-Pangulo nang sumambulat ang balitang irregularities sa katatapos na automated voting. Sa huling mga kaganapan may mga lumalabas na alegasyong nagkaroon ng dayaan. Nagsanib na ng puwersa si Delos Reyes, Jamby Madrigal at Nicanor Perlas upang i-apela ang resulta ng halalan. Ayon kay Delos Reyes, kailangang matukoy ang gumawa ng dayaan at kilalanin ang tunay na nagwagi sa halalan. Hindi pa tapos ang laban ang iginigiit niya.

Ganito rin ang sigaw ng grupong Bangon Pilipinas ni Bro. Eddie Villanueva na nasa ika-limang puwesto sa resulta ng botohan sa pagka-Pangulo. Ayon sa kanila, bagamat may nahalal na na bagong liderato ng bansa na mamumuno sa darating na anim na taon, hindi pa rin tapos sa kanila ang laban. Kanilang ipagpapatuloy ang sinimulang pagsamo at paghikayat sa mamamayang Pilipino na bumangon sa abang kalagayan nito, at ang pagbabantay sa bagong pamunuan para sa matuwid at maka-Diyos na pamamahala. Ayon kay Bro. Eddie, tutulong siya for the “rebuilding of the nation.”

Sa sulat na pinadala ni Bro. Eddie sa mga supporter nito, kanyang pinamanhikan sa kanila na magpatuloy sa sinimulang laban tungo sa tunay na pagbabago. Ito ang buod ng kanyang sulat.

“Sa loob ng tatlong buwang campaign period, naramdaman ko ang pagsama ninyo. Hindi biro ang pinagdaanan nating laban. Mabigat man ang sakripisyo ko, naging magaan dahil sa inyo. Hindi ko na maiisa-isa lahat ng kontribusyon ninyo para sa pagsusulong ng tunay na pagbabago, para sa matuwid na pamahalaan. Hindi ko man kayo maisa-isa, salamat! Kayo ang “unsung heroes” ng Bangon Pilipinas.

Sa panahong ito, dalangin ko na lahat tayo ay magkaroon ng kapayapaan na ang lahat ng ginawa natin ay hindi para sa ating sarili kundi para sa Diyos at Bayan. Ang ginawa natin sa Diyos ay hindi mawawalan ng kabuluhan. Ang ginawa natin para sa bayan ay nakaukit na sa kasaysayan. Wala nang makakanakaw nito sa atin. Sama-sama pa rin tayong magpalakasan sa bawat isa at hindi matitinag sa patuloy na pagdalangin sa Diyos na magkaroon ng matuwid na pamahalaan sa ating minamahal na bansa!”

Samantala, habang tinitipa ko ang artikulong ito, may ginaganap naman ngayon, 16 May 2010, na Thanksgiving Service sa World Trade Center sa Pasay City, kung saan ang mga supporters ni Bro. Eddie, Erap Estrada, Jamby Madrigal, Nicanor Perlas at JC Delos Reyes ay nagsasama-sama upang magpasalamat. Bagamat may mga katiwaliang naganap sa halalan, naroroon pa rin ang hangarin ibalik sa Diyos ang papuri at pasasalamat, pagkat sa lahat ng bagay ito ang nararapat gawin.

Ang kanilang sigaw, “Ituloy ang laban tungo sa pagbabago!”

OAV Sa Alkhobar, Maayos Na Natapos

Makikita sa litrato sina Labor Attache David Des Dicang kasama ang mga volunteers at SBEI’s. Ang mga marshals at volunteers na nag-assist sa mga botante sa Alkhobar. Ang ballot box habang dadalhin sa precinct na pagbbilangan ng boto. Makikita sa likuran ang mga SBEI’s habang binibilang ang mga boto sa isa sa mga voting precinct sa IPSA

Max Bringula (Abante ME Edition, 15 May 2010)

Kasabay ng pagsimula ng halaan sa Pilipinas nitong Lunes, 10 May 2010, ay ang pagtatapos naman ng overseas absentee voting (OAV) sa iba’t ibang bahagi ng mundo, kasama na ang Gitnang Silangan.

Dito sa Eastern Province, Saudi Arabia kung saan mayroong 21,597 registered voters, naging matiwasay at maayos ang eleksiyon na isinagawa sa loob ng isang buwan mula noong 10 April 2010. Maliban sa manaka-nakang pagkakadismaya ng ilang mga botante sa pagkaka-delist o pagkawala ng kanilang pangalan sa certified list of voters na inilabas ng COMELEC, naging payapa sa kabuuan ang katatapos na OAV sa Eastern Province na ginanap sa IPSA (International Philippine School in Alkhobar).

Sa pangunguna ni Labor Attache David Des T. Dicang, nagkaroon ng systematic flow ng pagboto hanggang sa mismong araw ng bilangan. Gayundin, upang matiyak ang kaayusan, nagsagawa si LabAtt Des ng continuous briefing at orientation ng mga SBEI’s (Special Board of Election Inspectors) at pulong sa mga volunteers, marshals at poll watchers, kung kailangan.

Sinikap din ni LabAtt Des na maging transparent upang mapawi ang ano mang duda o ibang kaisipan, kung mayroon man. Naging maluwag siya sa ilang mga procedures ng COMELEC na hindi naman naisa-sakripisyo ang sanctity at secrecy ng boto. May mga proper ID’s na ibinigay sa mga volunteers at marshals. Ang Media personnel mula sa TFC (ABS-CBN), GMA-7 at pati na ang inyong lingkod sa Abante Middle East Edition ay binigyan ng pagkakataong mai-cover ang kaganapan ng eleksiyon at pagbilang ng boto.

Malaking tulong din ang nagawa ng “tagging system” na ipinatupad ng COMELEC sa ikakaayos ng eleksiyon, kung saan maaaring makaboto ang isang botante na nasa Eastern Province bagama’t ang pangalan niya ay na sa listahan ng Riyadh, at vice-versa, yaong mga nasa Riyadh na ang pangalan nama’y napunta sa Eastern Province. Ang Eastern Province ay binubuo ng Dammam, Dhahran, Alkhobar, Jubail, Al-Ahsa, Qatif, at iba pang karatig-pook.

Ang “bayanihan” spirit ng mga Pilipino sa mga gawaing tulad nito ay isang malaking kontribusyon din sa tagumpay ng katatapos na OAV sa Alkhobar. Ang iba’t ibang samahan ng mga Pilipino tulad ng AFCSCOM (All Filipino Community and Sports Commission), Guardians Republican International, Inc. (GRII), Pag-asa Community Support Group, at iba pa, ay nagtalaga na kani-kanilang mga volunteers at marshals na siyang nag-assist sa mga botante. Dagdag pa rito ang pagkakaroon ng Poll Watchers mula sa Bangon Pilipinas Party at Gabriella sa buong panahon ng botohan at sa huling araw pati na ang aktuwal na pagbilang sa mga boto.

Mula sa 21,597 certified list of voters sa Eastern Province, mayroong 4,974 ang nakaboto, o 23% sa kabuuang botante. Sa bilangangang naganap, nanguna ang tandem ni Benigno “Noynoy” Aquino III at Mar Roxas bilang Pangulo at Pangalawang-Pangulo na nakakuha ng mahigit na dalawang libong boto bawat isa. Ang natitirang mahigit-kumulang na dalawang libo ay nahati naman sa ibang Presidentiables.

(Photos courtesy of Duane Sta. Ana)

Buhangin, Ulan at Maagang Pagdilim, Naranasan sa EP

Max Bringula (Abante ME Edition, 11 May 2010)

Ito ang naranasan ng mga residente ng Eastern Province nung Sabado (08 May 2010) nang biglang rumagasa ang makapal na buhangin na may kasamang ulan, kulog at kidlat sa kalawakan ng Jubail, Al-Ahsa, Dammam, Dhahran at Alkhobar.

Alas-kuwatro pa lang ng hapon ay dumilim na agad ang paligid na sinabayan pa ng malakas na hangin na sumira sa maraming mga puno at ilang mga gusali. May mga billboards na nabaklas ngunit di naman ito tuluyang bumagsak. Nagkasali-saliwa naman agad ang trapiko sa pagmamadali ng iba na maka-uwi bago pa tuluyang lumakas ang ulan at lumikha ng baha sa daan.

Na-alarma ang ilang mga kumpanya at opisina kung kaya’t pinauwi ng maaga ang kanilang mga empleyado, isa na rito ang kumpanya pinapasukan ng inyong lingkod. Ito’y upang maiwasan ma-stranded kung saka-sakaling lumakas pa ang buhos ng ulan at bumaha tulad ng naganap sa Riyadh kamakailan lamang.

May ilang mga nag-cancel na kanilang mga commitment at meeting. Maging ang inyong lingkod ay nag-abiso sa aking grupo na kanselado ang naka-iskedyul na pulong ng gabing iyon. Ito’y upang makaiwas sa ano mang disgrasya o sakuna kung magtuloy-tuloy ang buhos ng ulan a sandstorm.

Subalit taliwas sa inaasahan, di naman nagtagal ang nasabing bagyo at sandstorm. Makalipas ang apat na oras, naging maaliwalas na ang kalangitan. “Biglang dumating at bigla ring umalis” ang nasambit na lamang ng aking kasamahan.

Gayunpaman, inabisuhan pa rin ng Presidency of Meteorology and Environment Protection (PME) sa Eastern Region ang mga residente nito na maging alerto at handa sa ganitong uri ng panahon.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

Sir, my agency told me that my salary will be SR 900, but my employer insist they give me 800 SR only. Is this a valid reason for me to go back home. I want to apply another, Thanks. – 966-556130209

Kabayan, kung may kopya ka ng kontrata na nagsasaad na SR 900 ang magiging suwedo mo at ito’y pirmado mo at ng iyong employer, subalit ito’y di sinunod ng iyong employer, ito’y matatawag na breach of contract o paglabag sa napagkasunduang kontrata. Sa kasong ito, ang lumabag ay ang iyong amo o employer. Maaari mo itong dalhin sa Labor Office ng Saudi upang ipaglaban na ibigay sa’yo ang tamang sahod na napagkasunduan ninyo. Yun nga lamang, dapat ay handa ka sa mahabang proseso na kadalasan ay nangyayari sa mga nagsasampa ng kaso sa Labor, bagamat di naman lahat.

Maaari mong hilingin sa Labor Office na kung di maibibigay ng iyong amo ang napagkasunduang sahod ay pauwiin ka na lamang at ang gastos ay dapat sa iyong employer at hindi syo pagkat siya ang lumabag sa kontrata. Subalit, kung ikaw ang magkukusang uuwi dahil di nasunod ang suweldo mo, maaaring ituring ito ng iyong amo na Resignation at ikaw ang pagbabayarin niya ng iyong tiket pati na ang mga ginastos niya sa iyo nang ikaw ay kanyang i-hire, bagamat siya (ang iyong employer) ang di sumunod sa napagkasunduan ninyong sahod.

Pag-isipan mo ito ng maigi. Mas mainam na kausapin mo ng masinsinan ang iyong amo.

Baha Sa Riyadh, Senyales ng Pagbabago ng Panahon

Makikita sa background ang bantog na Kingdom Tower sa Riyadh.
ni Max Bringula (Abante ME Edition, 07 May 2010)

Ang nangyaring baha sa Riyadh noong Lunes, 04 May 2010, ay di pangkaraniwan. Hindi pa nararanasan ng Riyadh, na siyang sentrong siyudad ng Saudi Arabia, ang ganitong baha, na makikita lang dati sa mga tropical countries tulad ng Pilipinas o kaya’y sa America o Europe, pero hindi sa isang disyertong lupain tulad ng Saudi Arabia.

Lumubog ang siyudad nang hatawin ito ng napakalakas na ulan at rumaragasang hangin. Lumikha ito ng sali-saliwang traffic pagkat agad lumubog sa tubig ang karamihan sa mga daan. Tumagal ng halos isang oras ang pagbuhos ng ulan kung kaya’t tone-toneladang tubig ang sinalo ng siyudad at siyang naging sanhi ng baha na di pa naranasan ng mga residente nito.

Ang ganitong pangyayari ay nakakabahala lalo na’t di naman napaghandaan ng pamahalaan ng Saudi Arabia ang ganitong uri ng panahon. Ang mga kalsada nito’y walang mga drainage dahil noong araw na ginawa ito ay di naman umuulan o bumabagyo sa Saudi Arabia. Isang beses lang sa isang taon kung umulan. Mapalad na nga kung mayroon pagkat minsan may mga pagkakataong di talaga umuulan. Kailangan pa nilang manalangin para umulan.

Subalit ngayon ay iba na. Karaniwan na lamang ang pag-ulan sa Saudi Arabia. Parang Pilipinas na rin ang Saudi Arabia. Nagbabago na nga talaga ang panahon. Ang Pilipinas naman ngayon ang nakararanas ng matinding tag-init. Sabi nga ng isa kong kasamahan, “parang Saudi na ang Pilipinas” dahil kamakailan lamang ay umabot sa mahigit na 40 degrees farenheit ang temperatura.

Matandaan din na ang Jeddah na nasa kanlurang bahagi ng Saudi Arabia ay nakaranas din ng mala-Ondoy na baha noong December 2009 na di marahil mangyayari kung dati-rati ay di ganito ang panahon sa Saudi na umuulan at bumabagyo. Maaaring nakapaglagay sila ng mga drainage noon pa sa kanilang mga kalsada tulad sa Pilipinas.

Subalit di pa naman huli ang lahat. Sa pangyayaring ito ng pagbaha, siguradong naglaan na ang Saudi government ng budget para sa pagpapalagay ng drainage. Malaking pagbabago nga lamang ito sa arkitektura ng kanilang mga daan.

Hindi rin mapapasubalian na handa naman ang Saudi government sa mga ganitong mga pangyayari. Mayroon agad silang nakalaan na mga chopper o helicopter sa pag-rescue ng mga tao na maaaring ma-stranded sa gitna ng baha o sa kani-kanilang tahanan na lubog sa baha.

Positibo naman ang pananaw ng karamihan sa mga residente. Wika nila, ang pag-ulan ay makakatulong ng malaki sa kanilang wildlife at pananim. Makapagbibigay ito ng tubig na iinumin at tubig para sa paglaki ng mga halaman. Pagkapos ng ulan ay ang pagbuka ng mga bulaklak, ang paglitaw ng mga luntiang dahon at ang pagsibol ng mga bagong binhi.

Samantala, binigyan naman ng babala ang Eastern Region na maging handa na rin pagkat maaaring makaranas din ito ng naranasan ng Jeddah at Riyadh. Ang Eastern Region ay binubuo ng Alkhobar, Dammam, Dhahran, Jubail, Qatif, Hofuf, Ras Tanura, at ilan pang mga lugar sa palibot nito. Bagamat dalawang linggo na na maganda ang panahon dito sa Silangang bahagi ng Saudi Arabia. Gayunpaman, ang ganitong mga panahon ay maaaring senyales na may darating na unos. Ito ang tinuran ni Mohammad Al-Qahtani, opisyales ng Presidency of Meteorology and Environment Protection (PME) sa Eastern Region. (Arab News.com)

Ilang Araw Na Lang Ang OAV. Boto Na! Now Na!

Si kuya Bobet at ate Gee sa loob ng precint pagkatapos bumoto.

Kuha nang ang inyong lingkod ay bumoto sa Precinct 1 sa Alkhobar.

by Max Bringula (Abante ME Edition, 05 May 2010)

Nakaboto ka na ba?

Kung ika’y registered overseas absentee voter at di ka pa nakakaboto, ala eh, ano pang hinihintay mo? Pasko? Matagal pa yon. Bumangon ka na’t bumoto. Now na!

Ilang araw na lang ang natitira para sa overseas absentee voting na nagsimula noong April 10 at magtatapos sa Lunes, May 10, sa ganap na ika-isa ng hapon dito sa Gitnang Silangan (ala-sais ng gabi sa Pilipinas).

Huwag ng makipagsabayan sa mga kababayan nating kadalasa’y bumubuhos sa huling araw. Huwag ng gumaya pa sa iba na laging “last minute” ang hinihintay. Alisin na natin ang ugaling iyan na nakatatak na sa kamalayan ng Pilipino na kung kaylan ang huling araw ay doon magsusulputan at magkukumahog.

Sa ulat na ating natanggap mula kay Ellene Sana ng Center for Migrant Advocacy (CMA), mayroon lamang 72,034 OFWs sa mahigit-kumulang na 500,000 registered overseas absentee voters sa buong mundo ang nakaboto na mula ng mag-umpisa ang OAV noong April 10. (Philippine Daily Inquirer, 29 April 2010)

Ito’y 14% pa lamang kung tutuusin. Ayon sa DFA Overseas Absentee Voting Secretariat (DFA-OAVS), karamihan sa mga boto na ito ay mula sa Hongkong na mayroong 21,459 ang nakaboto, sa Riyadh na may 5,897 na bumoto, at sa Singapore na may 4,199 na bumoto.

Ang iba pang bilang ng botante ay galing sa Jeddah (3,345 voters), Alkhobar (2,545 voters), Los Angeles, USA (2,162 voters), Kuwait (2,160 voters), Abu Dhabi (1,682 voters), New York (1,467 voters) at London (1,369 voters).

Inaasahan namang tataas pa ang bilang ng mga boboto sa darating na huling mga araw bago mag-May 10.

Kung kaya’t kung di pa tayo nakakaboto, gawin na ngayon, pagka’t siguradong daragsa ang tao sa mga presinto sa May 10 para bumoto. Tumungo na sa embahada at konsulada sa inyong lugar upang bumoto. Sa Saudi Arabia, ang voting period ay ang sumusunod:

Riyadh - 9:00 AM – 5:00 PM during weekdays, at 10:00 AM – 6:00 PM during Thursday and Friday.

Alkhobar – 11:00 AM – 7:00 PM during weekdays, at 10:00 AM – 6:00 PM during Thursday and Friday.

Sa ibang mga lugar, ang opisyal na oras ay 8:00 AM hanggang 6:00 PM araw-araw. Ina-adjust na lamang ito sa araw ng weekends.

Sa May 10, ang voting period ay mula alas-otso ng umaga hanggang ala-una ng hapon (8:00 AM – 1:00 PM) lamang.

TSD Readers’ Corner:

(Para sa mga masusugid nating mambabasa ng TSD o Tinig sa Disyerto, tayo’y maglalaan ng espasyo sa column na ito para sa inyong mga katanungan o kahilingan, at sisikapin ng inyong lingkod na matugunan ito sa abot ng ating kaalaman.)

“Tanong ko po kung puwede me bumoto. Dati po nakaboto ako at may pangalan. May pangalan pa kaya ako ngayon kasi di na ako nakapag-register ulet.” – Dolly ng Riyadh

Hi Dolly, kung nakaboto ka na dati bilang overseas absentee voter, maaari kang makaboto ulet kahit di ka nakapag-register nitong nakaraang OAV registration period. Alamin mo lamang kung naroon ang pangalang mo sa Certified List of Overseas Absentee Voters (CLOAV) na ni-release ng COMELEC. Maaari kang bumisita sa kanilang website, www.comelec.gov.ph o sa website ng Philippine Embassy sa Riyadh, www.philemb-riyadh.org. Maaari ka ring tumawag sa OAV Section ng Philippine Embassy sa Riyadh sa telepono na (01) 4820507 ext. 2127, o mag-fax sa numero (01) 4883945 upang malaman kung nasa listahan ang iyong pangalan.

(For comments and reactions, please eMail at maxbringula@yahoo.com or send text message only on 00-966-502319535. Paki-lagay rin ang inyong pangalan at lugar.)

For previous articles published in Tinig sa Disyerto, visit http://abanteme.blogspot.com/.

Sino Ang Presidente Mo?

by Max Bringula (Abante ME Edition, 01 May 2010)

Nakapagpasiya ka na ba? Meron ka na bang naiisip na ilalagay o isusulat sa balota bilang magiging bagong Pangulo ng Pilipinas sa darating na anim na taon (2010-2016)? O ikaw ay nagdadalawang-isip pa magpahanggang ngayon? Di matiyak kung sino nga ba ang karapat-dapat na iboto. Sa isip-isip mo, “pare-pareho lang kasi ang mga iyan. Kay titino, kay bubuti pag nangangampanya. Pero pag nahalal na at naka-upo, masahol pa kaysa dati. Mangungurakot din, magpapayaman din.”

Ganito na nga halos ang sentimiyento ng nakararami sa mga kumakandidato sa atin. Ang iba’y naubusan na ng pag-asa kung makakabangon pa ba ang Pilipinas sa kanyang pagkalugmok sa kahirapan at abang kalagayan.

Ito rin marahil ang dahilan kung bakit matumal ang mga bumoboto sa kasalukuyang nagaganap na overseas absentee voting. Sa palagay nila, di na kailangan pa. Di na kailangan ang kanilang boto.

Subalit pakatandaan natin na ang halalang ito ay di lamang patungkol sa mga kumakandidato. Ito’y higit kanino pa man ay patungkol din sa atin bilang mga boboto. Bilang isang mamamayan na nagmamahal sa kanyang bayan.

Nasa kamay ng bawat Pilipino ang ika-tatagumpay ng halalang ito. Tulad ng binabanggit sa tagline ng ABS-CBN na “Ako ang Simula”, nasasaatin ang pagbabago. Sa atin magsisimula. Bawat isa’y dapat makibahagi, makiisa sa pagtaguyod at pagbabago ng Pilipinas. Mayroon tayong dapat gawin – ang bumoto ng wasto at tama. Gamitin ang puso’t isipan sa pagpili ng iboboto at hindi ang halaga na babagsak sa ating palad o ang popularidad ng kumakandidato. Let us not just vote right, but vote responsibly.

At sa puntong ito, kakailanganin nating suriing maigi ang bawat kandidato. Alamin ang plataporma de gobyerno nila o yaong nais nilang isulong kapag nahalal na. Kung ano na ang kanilang nagawa sa bayan at higit sa lahat ang kanilang pagkatao. Kung sila ba’y imahen ng katuwiran at tuwid na pamumuhay. Malinis ba ang kanilang hangarin at pakay na maglingkod sa bayan. Sino ang may malinaw na pananaw na nais gawin para sa bayan at hindi yaong nagpapa-kyut lamang pag nasa entablado na. At ito’y higit nating malalaman kapag bibig nila’y ibinukas na para magsalita. Malalaman mo kung sino ang may tunay na pag-ibig sa bayan at kung sino ang animo’y kampanang kumakalembang lamang, malakas subalit hungkag at salat sa katotohanan.

Huwag nagpapaniwala at magpapadala sa mga surveys. Ang mga surveys ay di sumasalamin ng uri ng gobyernong isusulong ng nasabing kandidato kungdi ito’y nagsasabi lamang kung sino ang popular sa oras at pagkakataong ginawa ang surveys. Ang mahalaga pa rin ay ang magagawa ng kandidatong ihahalal kapag nailuklok na sa mataas na puwesto ng pamahalaan.

At bilang tulong sa mga kababayan natin na di pa nakapagde-decide kung sino ang iboboto bilang Pangulo ng Pilipinas, narito ang talaan ng mga kumakandidato at plataporma de gobyerno nila:

1) Benigno Simeon “Noynoy” C. Aquino III (Liberal Party) – kanyang isinusulong ang transformational leadership o yaong mula sa dating Pangulong tinu-tolerate ang corruption patungo sa Bagong Pangulo na siyang unang susugpo sa corruption.

2) Eduardo “Brother Eddie” Villanueva (Bagong Pilipinas Party) – naniniwala ang Bagong Pilipinas Party na upang maiahon ang bansa sa kanyang nakalulunos na kalagayan ng corruption, injustice and poverty ay dapat magkaroon ng pagbabago ang namumuno at mga mamamayan at ibalik ang pagmamahal sa Diyos at sa bayan na siyang kailangan para maibangon muli ang Pilipinas. Isinusulong ni Bro. Eddie ang 7 E’s – empower the people, emancipate the people, educate the people, energize the economy, elevate the living standards of the people, eradicate bad governance, and establish peace in the land.

3) Gilberto Eduardo Gerardo “Gibo” Cojuangco Teodoro, Jr. (Lakas Kampi CMD) – kanya namang isusulong ang basic education reform, health care, agricuture and long-term infrastructure planning bilang pangunahing layunin ng kanyang pamamahala. Kanyang isusulong na ang mga mahihirap ay makatapos ng kolehiyo sa pamamagitan ng pagkakaloob sa kanila ng loan mula sa gobyerno.

4) John Carlos “JC” de los Reyes (Ang Kapatiran Party) – ang kanyang partido ay naglalayon na maging bahagi ng pamamahala ang paghahari ng Diyos sa mga nanunungkulan at ang pamumuhay ng matuwid. Kanyang isinusulong ang abolition of pork barrel system, of gambing, death penalty at ang paggamit ng karahasan.

5) Jose Marcelo “Erap” Ejercito (Puwersa ng Masang Pilipino) – isinusulong ni Estrada ang political, economic and social reforms. Sa economic, isusulong niya ang privatization, deregulation and debt reduction para sa kapakanan ng mga mahihirap. Sa political, ang reconciliation with the insurgents at patas na pagpapatupad ng batas. At sa social reforms, ang pagkakaroon ng equal distribution of wealth.

6) Manuel “Manny” Villar, Jr. (Nacionalista Party) – kanyang prayoridad ang pagpuksa ng kahirapan. Nais niya ring isulong ang tinatawag niyang entrepreneurial revolution kung saan bawat mamamayan ay maging bahagi ng pagsulong sa pamamagitan ng pagkakaroon ng negosyong pagkakakitaan.

7) Maria Ana “Jamby” Madrigal (Independent) – nais niyang unahin ang pagpapatanggal ng VFA (Visiting Forces Agreement) at ng JPEPA (Japan-Philippines Economic Partnership Agreement), na ayon sa kaniya ay siyang nagpapahirap pa sa Pilipinas. Nais niyang itaas ang sweldo ng mga guro at mga kawani ng gobyerno.

8) Nicanor “Nick” Perlas (Partido ng Marangal na Sambayanan) – nais niyang isulong ang tinatawag niyang participatory democracy kung saan kasama ang taong-bayan sa pamamahala at pagpapatupad ng demokrasiya. Nais niyang puksain ang kahirapan at itaguyod ang pagkakaroon ng pantay na pamumuhay ng bawat mamamayan.

9) Richard “Dick” Gordon (Bagumbayan) – kanya namang isinusulong ang iahon ang Pilipinas sa kahirapang nararanasan nito. Kanyang minumungkahi ang pagkakaroon ng transformation na magsisimula sa bawat Pilipino. Nais niya na magkaroon ng isang bansang edukado ang mga mamamayan.

Ito ang ilan sa mga katangian ng plataporma ng bawat kumakandidatong Pangulo ng Pilipinas na kailangan nating malaman upang masagot ang katanungang “Sino ang Presidente Mo”.

Nasasaatin pa rin ang huling desisyon kung sino ang nararapat na iboto. Ang dapat pakatandaan – gamitin ang puso’t isipan sa pagpili ng magiging bagong Pangulo ng Pilipinas.

Don’t just vote right, but vote responsibly.

(For comments and reactions, please eMail at maxbringula@yahoo.com or send text message only on 00-966-502319535)